Azərbaycan ənənəvi dini icmalar arasında mehriban qarşılıqlı fəaliyyətin nadir nümunəsi, eləcə də din və dünyəvi hakimiyyət arasında qarşılıqlı hörmət və əməkdaşlıq prinsipinə əsaslanan ahəngdar münasibətlərin nümunəsi olan ölkə kimi xüsusi diqqətə layiqdir.
Bu barədə Trend-ə Azərbaycandakı Katolik Kilsəsinin Apostol Prefekti yepiskop Vladimir Fekete deyib.
"Azərbaycan milli adət-ənənələrə, eləcə də cəmiyyətin mənəvi-mədəni müxtəlifliyinə hörmət edən və təşviq edən müasir, dünyəvi dövlətdir və Azərbaycanda dini etiqad azadlığı ilə bağlı bu cür mənfi ideyanın hansı əsaslara dayanır və hansı məlumatlara əsaslandığını anlamıram", - deyə o, ABŞ dövlət katibi Antoni Blinkenin bir sıra ölkələrin, o cümlədən Azərbaycanın dini etiqad azadlığı ilə bağlı müəyyən “izləmə siyahısı”na salınması ilə bağlı bəyanatını şərh edərkən bildirib.
Yepiskop Vladimir Fekete vurğulayıb ki, Azərbaycanda katoliklər konkret addımlarla ifadə olunan daim dövlət dəstəyini hiss edirlər.
"Biz tez-tez ölkənin dini konfessiyalarının rəhbərləri və nümayəndələri ilə birlikdə dinlərarası və mədəniyyətlərarası dialoq məsələlərinə həsr olunmuş müxtəlif beynəlxalq tədbirlərdə iştirak edirik, və mən həmişə bu məsələ ilə maraqlanan hər kəsə Azərbaycana səfər etməyi tövsiyə edirəm və aydın şəkildə görürəm ki, sivilizasiyalararası və dinlərarası dialoqla bağlı bütün bədbin proqnozlara baxmayaraq, cəmiyyətin xoş iradəsini və səriştəli dövlət siyasətini nəzərə alaraq, belə dialoq nəinki mümkündür, həm də cəmiyyətin rifahına, dövlətin güclənməsinə xidmət edir. Biz, Azərbaycan katolikləri Tanrıya şükür edirik ki, bu ölkədə azad şəkildə öz inancımızı etiqad edə bilirik, dini bayramlarımızı təntənəli şəkildə qeyd edirik, digər dinlərin nümayəndələri ilə qarşılıqlı inam və qardaşlıq şəraitində ünsiyyət qururuq, və bacardığımız qədər Azərbaycan cəmiyyətinin rifahına xidmət edirik. Biz Azərbaycan dövlətinin konkret addımlarla ifadə olunan dəstəyini, məsələn, Prezident İlham Əliyevin hər il ölkənin dini icmalarına ayırdığı maliyyə yardımını daim hiss edirik. Və bütün ehtiyaclarımızda biz həmişə səlahiyyətlilərin anlayışına və yardım göstərmək istəyinə cavab veririk", - deyə o əlavə edib.
