"Heydər Əliyev İli" çərçivəsində Ulu Öndərin 100 illiyi ilə əlaqədar "N" hərbi hissəsində “Heydər Əliyev müstəqilliyimizin və milli dövlətçiliyimizin banisidir” adlı tədbir keçirilib. Məlumat Müdafiə Nazirliyindən verilib.

 Əvvəlcə Ulu Öndərin hərbi hissənin ərazisində ucaldılmış abidəsi önünə  gül dəstələri qoyularaq xatirəsinə ehtiram nümayiş etdirilib.

Hərbi qulluqçular, şəhid ailələrinin üzvləri, müharibə veteranları, ictimaiyyət nümayəndələri, məktəblilər və digər qonaqların iştirakı ilə keçirilən tədbirdən öncə xalqımızın Ümummilli Liderinin və ölkəmizin azadlığı və suverenliyi uğrunda canlarından keçmiş şəhidlərimizin xatirəsi bir dəqiqəlik sükutla yad edilib. Azərbaycan Respublikasının Dövlət Himni səsləndirilib.

Çıxış edənlər bildiriblər ki, Ulu Öndər Heydər Əliyevin rəhbərliyi, uzaqgörən siyasəti və gərgin fəaliyyəti nəticəsində güclü müdafiə qüdrətinə və peşəkar döyüş qabiliyyətinə malik Azərbaycan Ordusu formalaşıb. Ümummilli Liderin ordu quruculuğu sahəsində həyata keçirdiyi tədbirlərin Müzəffər Ali Baş Komandan cənab İlham Əliyev tərəfindən uğurla davam etdirildiyi diqqətə çatdırılıb.
Sonra Ulu Öndərin şərəfli həyat yolundan və müstəsna xidmətlərindən bəhs edən videoçarx nümayiş etdirilib.

Sonda vətənpərvərliyi və qəhrəmanlığı tərənnüm edən musiqilər səsləndirilib, şeirlər oxunub.

P.ƏMİRCANOV

XQ