Anqolanın paytaxtı Luandada oktyabrın 23-dən 27-dək davam edən Parlamentlərarası İttifaqın (PAİ) 147-ci Assambleyası işini başa çatdırıb. Milli Məclisin deputatları tədbirdə iştirak ediblər.
Parlamentin Mətbuat və ictimaiyyətlə əlaqələr şöbəsindən bildiriblər ki, oktyabrın 25-də PAİ-nin 147-ci Assambleyası çərçivəsində Azərbaycan Prezidenti İlham Əliyevin təşəbbüsü ilə yaradılmış Qoşulmama Hərəkatı Parlament Şəbəkəsinin (QHPŞ) növbəti görüşü keçirilib. İclasda Azərbaycanın sədrliyi ilə Qoşulmama Hərəkatının institusional inkişafı istiqamətində həyata keçirilən mühüm tədbirlər barədə məlumat verilib, qurumun gələcək institusional inkişafı, beynəlxalq əlaqələri, üzv ölkələr arasında əməkdaşlığın təşviq olunması istiqamətində çoxşaxəli fəaliyyət istiqamətləri və digər maraq doğuran məsələlər barədə danışılıb.
Azərbaycan parlamenti tərəfindən təşkil olunan görüşdə 30 ölkədən 80-ə yaxın nümayəndə iştirak edib. İclasda çıxış edən üzv ölkələrin parlament nümayəndə heyətlərinin təmsilçiləri Azərbaycanın QHPŞ-də sədrliyinin fəaliyyətini yüksək qiymətləndirərək, Parlament Şəbəkəsinin qlobal parlament dialoqunun təşviqində, parlament diplomatiyasının inkişafında oynadığı mühüm rolundan danışıblar.
Xatırladaq ki, Parlamentlərarası İttifaqın 147-ci Assambleyasında 130-dan artıq ölkə parlamenti və 20-dən artıq beynəlxalq təşkilatın nümayəndələri iştirak edib.
Nümayəndə heyətinin üzvləri PAİ-nin daimi komitələrinin və digər qurumların iclaslarında da iştirak ediblər, gündəlikdə duran mövzulara dair münasibət bildiriblər, bir sıra məsələlərlə bağlı ölkəmizin mövqeyini təqdim ediblər.
Deputatlar Sevil Mikayılova, Kamran Bayramov, Əminə Ağazadə, Səbinə Xasayeva qurumun müxtəlif bürolarına, Şahin İsmayılov isə Gənc parlamentarilər Forumunun idarə heyətinə üzv seçilib.
Oktyabrın 27-də PAİ-nin yeni prezidenti vəzifəsinə seçkilər keçirilib və Tanzaniya Milli Assambleyasının sədri Tulia Akson qalib olub.