ABŞ-ın Federal Təhqiqat Bürosu Massaçusetsdə Milli Qvardiyanın hərbçisini Pentaqonun məxfi sənədlərinin sızdırılmasında şübhəli bilərək həbs edib. Ədliyyə naziri Merrik Harland bəyan edib ki, 21 yaşlı Cek Teyşeyr milli müdafiə ilə bağlı məxfi informasiyaları yaymaqda şübhəli kimi həbs edilib. Xəbəri “Euronews” verib.
Məlumata görə, sənədləri yayan kiçik onlayn oyun qrupunun rəhbəri 21 yaşlı Cek Teyşeyr olub. Həbsdən sonra onun evində axtarış aparılıb. Onu 10 il həbs cəzası gözləyir.
Teyşeyr Massaçusetsdə Milli Qvardiyanın kəşfiyyat qanadında xidmət edib. O, silahlara, videooyunlara həvəsi olan təxminən 20-30 nəfərin bir araya gəldiyi “Thug Shaker Central” adlı özəl internet qrupunun kuratoru olub. Qrup üzvləri sızan sənədlərin sırf məlumat xarakteri daşıdığını, onların çoxunun Ukraynadakı münaqişə ilə bağlı olduğunu qeyd ediblər.
Pentaqonun sözçüsü Patrik Rayder bildirib ki, məxfi sənədlərin sızması qəsdən törədilmiş cinayətdir: “Vurğulamaq istəyirəm ki, bu, mövcud prosedurların pozulması ilə qəsdən törədilmiş cinayət əməlidir”.
Ukrayna Müdafiə Nazirliyi Baş Kəşfiyyat İdarəsinin rəisi Kirill Budanov isə deyib ki, məxfi sənədlərin geniş miqyasda sızmasından yalnız Rusiya qazanır. “Araşdırmadan sonra biz yekun cavabı alacağıq. Bizim ABŞ-ın müvafiq xidmətləri ilə əlaqələrimiz var. İlk saatlardan danışıqlara başladıq. Ukrayna-ABŞ münasibətlərinə xələl gətirəcək heç bir risk yoxdur. Məlumat sızması müharibənin gedişatına böyük təsir göstərə bilməz. Problem varsa, həll ediləcək. Problem yoxdursa, daha yaxşı... Bu, hücum əməliyyatlarının real nəticələrinə təsir edə bilməz. Yaxın gələcəkdə əks-hücumun nəticələrini hamı görəcək və hiss edəcək”.
Xatırladaq ki, sızmış sənədlərdən ABŞ-ın BMT-nin Baş katibi Antonio Quterreşi də izlədiyi məlum olub. Sənədlərdən görünür ki, baş katib taxıl sövdələşməsini qoruyub saxlamaq üçün Rusiyanın maraqlarını nəzərə alıb və Avropa Komissiyasının başçısı Ursula fon der Lyayenin Ukrayna üçün çoxlu silah istehsal etmək zərurəti ilə bağlı çağırışını başa düşmədiyini bildirib.
ABŞ-ın fikrincə, bu addımlar Ukraynadakı hərəkətlərinə görə Rusiyanın məsuliyyətə cəlb edilməsi ilə bağlı səyləri pozub.
“Xalq qəzeti”
