Türkiyə vətəndaşları ölkələrinin tarixində yeni bir eranın başlanğıcını qoya biləcək seçim qarşısındadırlar. Bu il mayın 14-də keçiriləcək ümumi seçkilərin nəticələri qardaş ölkənin daxili və xarici siyasətində böyük dəyişikliklərə yol aça bilər. Dünya bunun fərqindədir və seçkiqabağı kampaniya zamanı gedən gərgin müzakirələri diqqətlə izləyir.
Məlum olduğu kimi, Türkiyədə bu il prezident seçkilərində dörd siyasətçinin namizədliyi qeydə alınıb. Bunlar hakim Ədalət və İnkişaf Partiyasının (AKP) qurucusu və lideri, hazırkı dövlət başçısı Rəcəb Tayyib Ərdoğan, ana müxalifətin rəhbəri sayılan, Cümhuriyyət Xalq Partiyasının (CHP) başçıısı Kamal Kılıçdaroğlu, yeni təsis olunmuş Məmləkət Partiyasının (MP) başqanı Məhərrəm İncə və Millətçi Hərəkat Partiyasının (MHP) rəhbəri Sinan Oğandır.
Rəy sorğularına görə, budəfəki prezident seçkilərində əsas mübarizə 69 yaşlı R.T.Ərdoğan ilə 75 yaşlı K.Kılıçdaroğlu arasında gedəcək. Bununla yanaşı, səsvermənin nəticələrində sürprizlərin olacağı heç də istisna olunmur. Məsələn, mühafizəkar siyasətçi Məhərrəm İncənin cəmiyyətin millətçi kəsiminin səslərinin böyük bir qismini qazana biləcəyi və səs sayına görə CHP liderini üstələyəcəyi mümkün sayılır.
Qeyd etmək lazımdır ki, seçicilərlə görüşlər və ilkin debatlar zamanı bir daha məlum olub ki, prezidentliyə namizədlərin bir çox aktual problemlərin həllinə yanaşmaları fərqlidir. Biz qəzetin ötən sayında namizədlərin suriyalı qaçqınlara münasibətdə fərqli platformalardan çıxış etdikləri barədə söz açmışdıq. Budəfəki yazıda Türkiyənin xarici siyasətində mühüm yer alan Qərbə və Qərb dəyərlərinə münasibət barədə fikrimizi bildirmək istəyirik.
Bu məsələdə AKP lideri R.T.Ərdoğanla rəqibi K.Kılıçdaroğlunun mövqeləri xeyli fərqlənir. İyirmi ildən çox Türkiyənin xarici siyasət kursunu böyük uğurla yönəldən hazırkı dövlət başçısı hesab edir ki, ölkəsinin Avropa İttifaqı (Aİ) ilə əlaqələri bundan sonra da davam etdirilməlidir. Lakin Aİ rəhbərliyi də rəsmi Ankara ilə əlaqələrdə adekvat mövqe sərgiləməlidir.
R.T.Ərdoğanın fikrincə, Aİ bu gün Türkiyə üçün nə qədər vacibdirsə, bir o qədər də Türkiyə Aİ üçün mühüm tərəfdaş kimi qəbul olunmalıdır. Ankara əbədi olaraq Aİ qapısının qarşısında dayanıb onun Ankaraya qarşı nə vaxt ədalətli qərar qəbul edərək üzvlüyünə qəbul etməsini gözləyə bilməz. R.T.Ərdoğan haqlı olaraq Aİ-ni “bir xristian klubu” adlandırır və müsəlman Türkiyəsi ilə imitasiya etdiyini açıq surətdə dilə gətirir.
Bu qətiyyətli və prinsipial mövqe Brüsseldə sözdə demokratik dəyərləri gözə soxan, əməldə isə müsəlman Türkiyəsinə qarşı ayrı-seçkilik edən siyasətçiləri qane etmir. Onlar həqiqəti söyləyə bilmirlər. Həqiqət isə budur ki, “Köhnə və qoca Avropa” 85 milyonluq gənc, çevik, dinamik insan resursları olan Türkiyəni Aİ sıralarına qəbul etmək istəmir. Çünki bu zaman Türkiyə üçün iqtisadi imkanlar daha da genişlənər, qitənin aparıcı dövlətləri olan Fransa və Almaniyadan da zəngin ölkəyə çevrilə bilər.
Digər tərəfdən ABŞ başda olmaqla kollektiv Qərb Türkiyənin NATO-da ikinci böyük hərbi gücə malik olmasını və alyansın cənub cinahını qorumasını göz önünə gətirib Prezident R.T.Ərdoğanın dilindən səslənən “tikanlı sözlərə” dözməli olur. Bunun üçün də Qərb canını çağdaş zəmanəmizin ən xarizmatik və qətiyyətli siyasətçilərindən olan, görkəmli dövlət adamı R.T.Ərdoğandan qurtarmaq istəyir.
CHP lideri K.Kılıçdaroğlu Prezident R.T.Ərdoğandan fərqli olaraq iqtidara gəldiyi təqdirdə ölkəsinin Aİ ilə əlaqələrini daha yüksək müstəviyə yüksəldəcəyini bəyan edir və bu xidmətin qarşısında Brüsselin dəstəyinə arxalanır. Türkiyədə bir çox təhlilçilər bu yanaşmanın Türkiyənin milli maraqlarına cavab vermədiyini düşünürlər.
K.Kılıçdaroğlu unudur ki, 2020-ci illərin əvvəllərində R.T.Ərdoğan da Aİ ilə yaxınlaşmaq üçün cəhdlər etmişdi. Lakin dövlət başçısı tezliklə tərəflər arasında maraqların üst-üstə düşmədiyini hiss edərək Brüsselin üzvlüklə bağlı cəfəng tələblərinə baş qoşmağın mənasız olduğunu anlamışdı.
Böyük ehtimalla, K.Kılıçdaroğlu da prezidentliyi qazansa, Aİ-nin Türkiyə ilə səmimi olmadığını başa düşəcək, təəssüf ki, bu, vaxt itkisindən başqa bir şey olmayacaq. Ankara Bilkənd Universitetinin professoru Əmirulla Məmmədov bildirir ki, bunu birdəfəlik bilmək lazımdır ki, nə Fransa, nə də Almaniya Türkiyənin yüksək inkişaf etmiş, zəngin bir dövlətə çevrilməsini istəyir. Buna görə də Türkiyənin inkişafına qarşı hər cür əngəllər yaratmağa davam edirlər.
Prezidentliyə digər iki namizəd Məmləkət və Millətçi Hərəkat partiyalarının liderləri Məhərrəm İncə və Sinan Oğan isə yaxşı başa düşürlər ki, Aİ hələ uzun illər boyu Türkiyənin Qərbə iqtisadi inteqrasiyasının qarşısını almağa çalışacaq və buna görə də Ankara, ilk növbədə Cənubi Qafqazda Azərbaycan üzərindən Orta Asiyanın türk dövlətləri ilə tarixi birliyini daha da gücləndirməlidir. Onların fikrincə, bu gün artıq Türkiyə dünyanın ən böyük güc mərkəzlərindən birinə çevrilib və qardaş türk ölkələrinin və xalqlarının inkişafı və tərəqqisi üçün lokomotiv rolunu oynamalıdır.
Sinan Oğan seçicilərlə görüşlərində dəfələrlə vurğulayıb ki, güc birlikdədir və türk dövlətləri bir-birinə hərtərəfli dəstək verməlidir. Bunun üçün bu dövlətlər arasında təkcə mədəni, iqtisadi deyil, həm də hərbi əlaqələr gücləndirilməlidir. S.Oğan Türkiyənin qardaş dəstəyilə Azərbaycanın 2020-ci ilin payızında Qarabağda əldə etdiyi parlaq qələbənin Zəngəzur dəhlizinin açılması üçün fürsət yaratdığını vurğulayır və bütün türk dünyasını quru yolla birləşdirəcək bu yolun açılmasının vacib olduğunu vurğulayır. Əslində, Böyük Turanın ortaya çıxaraq möhkəmlənməsi üçün Türkiyənin hazırkı iqtidarı olduqca böyük işlər görmüşdür. Bu mənada bütün türk xalqları böyük siyasətçi R.T.Ərdoğanın yenidən prezident seçilməsini çox arzulayırlar.
Bu yaxınlarda internetdə R.T.Ərdoğanın Daşkənddə necə dərin sevgi, məhəbbətlə qarşılanması mərasimini əks etdirən videoya yenidən nəzər yetirdim. Qürur duydum. Təkcə Azərbaycanda deyil, bütün türk və müsəlman dünyasında sayın R.T.Ərdoğanı çox sevirlər. Belə sonsuz inam və rəğbət qazanmaq çox az siyasətçiyə nəsib olur!
Atamoğlan MƏMMƏDLİ,
Bakı Dövlət Universitetitinin professoru, siyasi icmalçı
Bu il mayın 14-də Türkiyədə keçiriləcək ümumi seçkilər təkcə qardaş ölkənin deyil, bütün regionun taleyində mühüm rol oynayacaq. Məlum olduğu kimi, hazırda yeni dünya düzəni şəkillənir və Türkiyədəki seçkilərin nəticələrinin bu prosesə böyük təsiri olacağı şübhəsizdir.
Təsadüfi deyil ki, Türkiyədəki seçkiləri 2023-cü il üçün nəzərdə tutulan bütün seçkilərin ən əhəmiyyətlisi hesab edirlər. Kollektiv Qərb Türkiyə ilə hərbi müttəfiq olsa da, bu ölkənin hazırkı lideri, Prezident R.T.Ərdoğanın hakimiyyətdə qalmasını istəmir. Buna səbəb odur ki, nə ABŞ-yə, nə də Avropa İttifaqına (Aİ) müstəqil siyasət həyata keçirən, güclü, qüdrətli Türkiyə sərf edir.
Türkiyədə seçkilərin taleyini, əlbəttə, müdrik türk xalqı müəyyən edəcək. Biz qardaş ölkə olaraq, səsvermənin real nəticələrini qəbul edəcəyik. Eyni zamanda bir vətəndaş olaraq R.T.Ərdoğanın daha beş il hakimiyyət sükanı arxasında qalmasının Türkiyənin özü və bütün türk dövlətləri üçün vacib olduğunu qeyd etməyə bilmərəm.
Bir məqamı da vurğulamaq istərdim. O da budur ki, bu gün Türkiyə böyük bir coğrafi ərazidə, yəni Balkanlardan tutmuş Özbəkistana və Qırğızıstana qədər, Qafqazda, Yaxın Şərqda, hətta Afrikada böyük nüfuz sahibidir. Türkiyə çağdaş dünyanın “yumşaq güc”lərindən birinə çevrildiyi üçün onun nümunəsi türk və müsəlman dövlətləri və xalqları üçün çox cəlbedicidir. Allah Türkiyəni və türkü qorusun!
Məsaim ABDULLAYEV,
“Xalq qəzeti”