İrana hər yaz gələndə, Güneyin el-obalarına Novruz bayramı qədəm qoyanda mollalar ciddi əndişələnirlər. Onlar sıraya düzülərək bu bayramın “islamlaşdırılması” yarışına başla-yırlar.
Budəfəki novruzqabağı məsləhət-məşvərətdə İran Ekspertlər Məclisinin üzvü, Tehranın cümə imamı və Əli Xameneinin yaxınlarından olan Əhməd Xatəmi ölkədə Novruz bayramının keçirilməsi ilə bağlı ikibaşlı təklif verib. O, bayramın “islamlaşdırılması” xülyasını bu sözlərlə ifadə edib: “Biz bayramın keçirilməsinə qarşı deyilik, sadəcə, ənənəvi Novruz bayramı yerinə islami Novruz bayramının keçirilməsinin tərəfdarıyıq”.
Ümumiyyətlə, Əli Xamenei bundan əvvəl də bir neçə dəfə oxşar təkliflər səsləndirib. O, ənənəvi tədbirlər əvəzinə, Məşhəd və Qum şəhərinə səfərlərin təşkilini məsləhət görüb.
Təbrizdən aldığımız məlumata görə, Əhməd Xatəminin xülyasına cavab olaraq, güneylilər bu il Novruz bayramını əski qaydada və ikiqat artıq təntənə ilə qeyd etməyə hazırlaşıblar.
Rəhman GƏNCƏLİ
