Dünən Bakıda Azərbaycan və Bolqarıstan arasında iqtisadi əməkdaşlıq üzrə Hökumətlərarası Komissiyanın 6-cı iclası keçirilib. İclasdan əvvəl hökumətlərarası komissiyanın Azərbaycan tərəfindən həmsədri, kənd təsərrüfatı naziri Məcnun Məmmədovun rəhbərlik etdiyi nümayəndə heyəti ilə komissiyanın Bolqarıstan tərəfindən həmsədri, energetika naziri Vladimir Malinovun rəhbərlik etdiyi nümayəndə heyəti arasında ikitərəfli görüş olub. 

Görüşdə Azərbaycanla Bolqa­rıstan arasında ikitərəfli əməkdaş­lığın istiqamətləri, enerji, nəqliyyat, kənd təsərrüfatı, texnologiya trans­feri, ticarət dövriyyəsinin artırılma­sı, qarşılıqlı investisiyaların təşviqi, məhsulların üçüncü ölkələrə ixracı zamanı Orta Dəhlizin yaratdığı üs­tünlüklərdən istifadə, qida təhlükə­sizliyi, ətraf mühitin mühafizəsi, əmək və sosial müdafiə, səhiyyə, mədəniyyət, əqli mülkiyyət, turizm sahələrində əməkdaşlıq və digər məsələlər ətrafında fikir mübadiləsi aparılıb.

Azərbaycan–Bolqarıstan iqtisa­di əməkdaşlıq üzrə birgə hökumət­lərarası komissiyanın həmsədri, kənd təsərrüfatı naziri Məcnun Məmmədov çıxışında bildirib ki, iki ölkə arasında əlaqələr yüksələn xətlə inkişaf edir. Bununla belə, Azərbaycan və Bolqarıstan arasın­da iqtisadi sahədə əməkdaşlığın daha da genişləndirilməsi üçün böyük imkanların mövcudluğunu vurğulayan nazir iki ölkənin iqtisadi potensialını nəzərə alaraq ticarət əlaqələrinin daha da şaxələndiril­məsinin, idxal-ixrac əməliyyatlarının artırılmasının vacibliyinə diqqət çə­kib. Qeyd olunub ki, birgə təşkil olu­nan biznes-forumlar, ixracyönümlü və rəqabətqabiliyyətli məhsullarımız haqqında mütəmadi məlumat mü­badiləsi, o cümlədən beynəlxalq sərgilərdə qarşılıqlı fəallıq işgüzar dairələrimiz arasında əməkdaşlığı gücləndirəcək. 

2020-ci ildə Azərbaycanın tarixi ədaləti bərpa etməklə 30 il işğal al­tında olan torpaqlarını azad etdiyini xatırladan komissiyanın həmsədri işğal zamanı Azərbaycanın bütün şəhər və kəndlərinin dağıdıldığını, tarixi, mədəni və dini obyektlərin məhv edildiyini diqqətə çəkib. Nazir əlavə edib ki, hazırda yaşıl bərpa prinsipləri və ağıllı konsepsiyalar əsasında işğaldan azad edilmiş əra­zilərin bərpası, yenidən qurulması, bu ərazilərin gələcək inkişafının təmin olunması, zəruri infrastruktu­run yaradılması istiqamətində ge­nişmiqyaslı tədbirlər uğurla həyata keçirilir.

Azərbaycanın Avrasiyanın eti­barlı nəqliyyat və logistika mərkəz­lərindən birinə çevrildiyini söyləyən nazir Məcnun Məmmədov Şərq–Qərb və Şimal–Cənub beynəlxalq nəqliyyat dəhlizlərinin bir hissəsi olan dəniz və hava limanlarının, eləcə də dəmir və avtomobil yol­larının ticarət əlaqələrini artırmaq­da ölkələrimizə böyük üstünlük­lər verdiyini diqqətə çatdırıb. Orta Dəhlizin Avropanı Mərkəzi Asiya və Çinlə birləşdirən etibarlı və təh­lükəsiz nəqliyyat marşrutu olduğu­nu vurğulayan nazir yeni yaradılmış Ələt Azad İqtisadi Zonasının da bu dəhlizdə yerləşdiyini xatırladıb. M. Məmmədov qeyd edib ki, burada əsas məqsəd xarici investorları cəlb etməklə müasir sənaye müəssisələ­rinin yaradılması, ixracyönümlü məhsul istehsalıdır. Hökumətlərara­sı komissiyanın həmsədri sonda hər iki tərəfdən investorları Azərbaycan və Bolqarıstandakı iqtisadi zonala­rın işi ilə yaxından tanış olmağa və onların üstünlüklərindən maksimum yararlanmağa çağırıb. 

İqtisadi əməkdaşlıq üzrə bir­gə hökumətlərarası komissiyanın Bolqarıstan tərəfdən həmsədri, energetika naziri Vladimir Malinov ölkələrimiz arasında ikitərəfli əmək­daşlıqda enerji sahəsinin xüsusi yer tutduğunu diqqətə çatdırıb. Ölkəsi­nin qarşılıqlı maraq doğuran bütün sahələrdə – ticarət və sənaye, in­vestisiyalar, enerji, nəqliyyat, kənd təsərrüfatı, müdafiə, turizm, mədə­niyyət və bir çox başqa sahələrdə Azərbaycanla əməkdaşlıq üçün mövcud imkanlardan istifadədə maraqlı olduğunu vurğulayan nazir qeyd edib ki, iki ölkə arasında ticarət əlaqələrinin intensivləşdirilməsi, iq­tisadi əlaqələrin genişləndirilməsi istiqamətində işlərin aparılması va­cib əhəmiyyət daşıyır. 

Azərbaycanı Bolqarıstanın ener­ji sahəsində strateji tərəfdaşı adlan­dıran Vladimir Malinov Bolqarıstana və Cənub–Şərqi Avropa regionuna təbii qazın nəqli üçün mənbələrin və marşrutların şaxələndirilməsi is­tiqamətində Azərbaycanın göstər­diyi dəstəyə görə minnətdarlığını ifadə edib. Bolqarıstanın Cənub Qaz Dəhlizinin genişləndirilməsinin tərəfdarı olduğunu deyən energe­tika naziri, Azərbaycandan əlavə həcmdə təbii qazın alınması imkan­larını müzakirə etməyə hazır olduq­larını bəyan edib. 

Bolqarıstanın Azərbaycandan Avropaya “yaşıl enerji” ixracı la­yihəsində mühüm rol oynayacağını bildirən hökumətlərarası komissi­yanın həmsədri bərpaolunan enerji mənbələrinin inkişafını əməkdaşlıq üçün əhəmiyyətli potensiala malik mühüm sahə kimi dəyərləndirib. O, həmçinin xatırladıb ki, ötən həftə Bolqarıstan Nazirlər Şurası ölkənin “yaşıl enerji” layihəsi (Azərbaycan–Gürcüstan–Avropa “yaşıl enerji” dəhlizi) üzrə birgə müəssisədə iş­tirakını təsdiqləyib. Onun sözlərinə görə, layihədə Bolqarıstanın Enerji Holdinqi və onun törəmə şirkətləri iştirak edəcək. 

Sonda Azərbaycan və Bolqa­rıstan arasında iqtisadi əməkdaşlıq üzrə birgə hökumətlərarası komissi­yanın 6-cı iclasının yekunlarına dair protokol imzalanıb. Sənəd iki ölkə arasında iqtisadiyyat, kənd təsərrü­fatı, qida təhlükəsizliyi, energetika, nəqliyyat, informasiya kommuni­kasiya texnologiyaları, elmi-texniki və humanitar, sosial, səhiyyə, ətraf mühit və turizm sahələrində ikitərəfli əməkdaşlığı daha da inkişaf etdir­məyi nəzərdə tutur. Yekun proto­kolda, həmçinin iki ölkə arasında ikitərəfli münasibətlərin hüquqi-nor­mativ bazasının daha da təkmilləş­dirilməsi niyyəti öz əksini tapıb.

Eyni zamanda, tərəflər Azər­baycan–Bolqarıstan iqtisadi əmək­daşlıq üzrə birgə hökumətlərarası komissiyanın 7-ci iclasının gələn il Bolqarıstanda keçirilməsi barədə razılığa gəliblər.

Qeyd edək ki, Azərbaycan və Bolqarıstan arasında diplomatik əlaqələrin əsası 1992-ci il iyun ayı­nın 5-də qoyulub. Ötən müddətdə ölkələrimiz arasında 65 sənəd im­zalanıb ki, bu da bir çox sahələrin, eləcə də iqtisadi əlaqələrin dina­mik şəkildə inkişafına imkan yara­dıb. Hazırda Bolqarıstanın Avropa məkanında ölkəmizin əsas ticarət tərəfdaşına çevrilməsi də bunu təs­diqləyir. Müqayisə üçün qeyd edək ki, 2007-ci ildə iki ölkə arasında ticarət dövriyyəsi vur-tut 15,9 mil­yon ABŞ dolları təşkil etdiyi halda, 2023-cü ildə bu göstərici dəfələrlə artaraq 510 milyon dolları ötüb. Eyni zamanda, ötən il aparılmış idxal-ix­rac əməliyyatlarında ölkəmiz 453 milyon dollara yaxın müsbət saldo əldə edib. Bir maraqlı məqam da ondan ibarətdir ki, 2022-ci ildə Azər­baycanın dünya ölkələri arasında 28-ci xarici ticarət tərəfdaşı olan Bolqarıstan bir il sonra bu göstərici üzrə 18-ci olub. 

2024-cü ilin birinci rübündə isə qarşılıqlı ticarət, təxminən, dörd dəfə artaraq 153 milyon ABŞ dolla­rına çatıb. Hesabat dövründə Azər­baycan Bolqarıstana 146 milyon dollarlıq ixrac həyata keçirib. Belə­liklə, bu ölkə Azərbaycanın “TOP10” ixrac bazarı sırasına daxil olub.

Heç şübhəsiz, Azərbaycan və Bolqarıstan arasında iqtisadi əməkdaşlıq üzrə Hökumətlərara­sı Komissiyanın 6-cı iclası zamanı səsləndirilən fikirlər, müzakirə olu­nan məsələlər, eləcə də imzalan­mış vacib sənədlər dost və müttəfiq ölkələr arasında bir çox sahələrdə əməkdaşlığın daha da möhkəmlən­məsinə səbəb olacaq.