Dünən Laçın rayonunun Malıbəy kəndində eyni adlı kiçik su elektrik stansiyasının təməli qoyulub. Stansiyanın Həkəri çayının qolu olan Zabux çayının üzərində, Avropa və Çin texnologiyaları əsasında inşa edilməsi planlaşdırılır.
Qeyd edək ki, işğaldan azad olunmuş ərazilərdə inşası 2025-ci ildə tamamlanacaq 5 kiçik su elektrik stansiyasının ümumi gücü 13,8 meqavat olacaq. Həmin stansiyalarda ildə 39,7 qiqavat elektrik enerjisi istehsal ediləcək. “Malıbəy” stansiyası isə 5,1 meqavat gücünə malik olmaqla ildə 14,57 qiqavat elektrik enerjisi istehsalına imkan yaradacaq. Layihənin ümumi dəyəri 25 milyon manat, stansiyaların istismar müddəti isə 30 ildir. Bu stansiyalarda 25 nəfər çalışacaq.
Stansiyanın təməlqoyma mərasimində çıxış edən Prezidentin Laçın rayonunda xüsusi nümayəndəsi Məsim Məmmədov bildirib ki, Azərbaycanın işğaldan azad edilmiş əraziləri “sıfır emissiya” zonası elan edilib. “Malıbəy” kiçik su elektrik stansiyasının həmin siyasətin bariz nümunəsi olduğunu diqqətə çatdıran xüsusi nümayəndənin sözlərinə görə, indiyədək Laçında ümumi gücü 80 meqavata yaxın olan 9 kiçik SES istifadəyə verilib.
XQ
