Rəqabət Məcəlləsinin qəbul edilməsi ölkəmizdə azad sahibkarlığın inkişaf səviyyəsinin yüksəlməsinə, iqtisadi göstəricilərin, məhsul və xidmətlərin keyfiyyətinin, həmçinin istehlakçıların rifahını daha da yaxşılaşmasına müsbət təsir göstərəcək.
Qeyd edək ki, iqtisadiyyatın dayanıqlı inkişafının gerçəkləşməsində yüksək rəqabətqabiliyyətliliyin mövcudluğu mühüm önəm daşıyır. Çünki bu amil iqtisadi səmərəliliyin qiymətləndirilməsində əsas rol oynayır, iqtisadi sahənin beynəlxalq inteqrasiyasını şərtləndirir.
Son illərdə ölkəmizdə rəqabətə davamlı milli iqtisadiyyatın yaradılması, rəqabətlilik mühitinin təminində korrupsiyaya qarşı mübarizənin gücləndirilməsi, rəqəmsal iqtisadiyyatda rəqabət siyasətinə rəqəmsal baxışın diqqət mərkəzində saxlanılması kimi məsələlərə böyük əhəmiyyət verilib. Bundan başqa, istehlak bazarında rəqabət üstünlüyünün gerçəkləşdirilməsinə, eyni zamanda, müəssisələrin rəqabətqabiliyyətliliyinin və dayanıqlılığının rəqəmsal transformasiya texnologiyaları vasitəsilə yüksəldilməsinə həlledici vasitə kimi yanaşılıb.
Ekspertlər bildirirlər ki, vergi, gömrük, dövlət satınalmaları və iqtisadi subyektlərlə qarşılıqlı əlaqədə olan digər dövlət sektorlarında şəffaflıq və ədalətliliyin təmini rəqabət mühitini gücləndirir. Bu, həm də sahibkarlıq fəaliyyətinin qanun çərçivəsində qurulması, iqtisadiyyatın əsaslarının möhkəmlənməsi baxımından da zəruri şərtlərdən biridir. Çünki sağlam rəqabətli iqtisadiyyat həm xalqın rifah səviyyəsini yüksəldir, həm də xaricdən ölkəyə investisiya axınının miqyasını artırır. Bununla yanaşı, rəqabət mühitinin formalaşması ölkənin qlobal iqtisadiyyata inteqrasiyasını sürətləndirir, respublikamızın bu istiqamətdə lider mövqeyə yüksəlməsini reallaşdırır.
Azərbaycanda Rəqabət Məcəlləsinin qəbul edilməsi bir daha göstərir ki, iqtisadiyyatın rəqabət qabiliyyətinin artırılması makroiqtisadi sabitliyin qorunmasında, həmçinin monetar və fiskal siyasətin koordinasiyasının gücləndirilməsində əhəmiyyətli rol oynayır. Eyni zamanda, bu amil biznes mühitinin yaxşılaşdırılmasını və özəl təşəbbüsün dəstəklənməsini şərtləndirir, maliyyə xidmətləri bazarının inkişaf etdirilməsi, xarici ticarət və investisiya siyasətinin təkmilləşdirilməsi kimi istiqamətləri özündə cəmləşdirir.
Rəqabət Məcəlləsində əhəmiyyətli məqamlardan biri də qüvvədən düşən “Haqsız rəqabət haqqında”, “Antiinhisar nəzarəti haqqında” və “Təbii inhisarlar haqqında” qanunlardan sonra sistemləşdirilmiş bütün müddəaları özündə əks etdirməsidir. Burada haqsız rəqabət, iqtisadi təmərküzləşmə, habelə rəqabət haqqında qanunvericiliyə əməl edilməsinə dövlət nəzarəti tədbirləri, rəqabət qanunvericiliyinin pozulması haqqında işlərə baxılması qaydaları kimi məsələlərin tənzimlənməsi diqqət çəkir. Belə bir halda təbii ki, rəqabətlə bağlı pozuntuları aşkarlayan, eyni zamanda, araşdıran İqtisadiyyat Nazirliyi yanında Antiinhisar və İstehlak bazarına Dövlət Nəzarət Xidmətinin səlahiyyətləri daha da genişlənir.
Ekspertlərin fikrincə, Rəqabət Məcəlləsinin qəbul edilməsi ilə ölkəmizdə iri əmtəə bazar subyektləri arasında sövdələşmə və razılaşmalara dövlət tərəfindən nəzarət daha da gücləndiriləcək. Bu isə rəqabət mühitinin şəffaflaşmasına, kiçik və orta sahibkarların bazara daxil olmasına geniş imkan açacaq. Bundan başqa, satınalmalar haqqıdnda yeni qanunun qüvvəyə minməsi də biznes mühitinin daha da şəffaflaşmasını şərtləndirəcək. Təbii ki, bu qayda ilə müəyyən bazar subyektinin qiymətlərə manipulyasiyası aradan qaldırılacaq. Nəticədə istehlakçının ədalətsiz qiymət problemi də həllini tapacaq.
İqtisadiyyat Nazirliyi yanında Antiinhisar və İstehlak bazarına Dövlət Nəzarət Xidmətinin şöbə müdiri Xamis Seyranov isə bildirir ki, Rəqabət Məcəlləsinin qəbul edilməsi ilə iqtisadi tənzimlənmədə səmərəlilik yüksələcək. Məcəllənin tətbiqi bazarlara giriş maneəsinin aradan qaldırılmasını təmin edəcək, mikro, kiçik və orta sahibkarlığın inkişafına töhfə verəcək. Bütün bunlarla bərabər, bazarda rəqabət mühiti və azad rəqabət şəraitinin formalaşması bazar iştirakçılarının sayının çoxalmasını, yerli təsərrüfat subyektlərinin daxili və xarici bazarlarda rəqabət qabiliyyətinin güclənməsini şərtləndirəcək. Rəqabət mühitinin formalaşdırılması, eyni zamanda, özəl sektor tərəfindən innovasiya fəaliyyətinin və rəqəmsallaşmanın tətbiqinin genişləndirilməsinə, bu çərçivədə yeni alətlərin tətbiqinə imkan yaradacaq.
X.Seyranov, həmçinin əlavə edib ki, Rəqabət Məcəlləsinin tətbiqi ilə işğaldan azad olunan ərazilərin bərpası və yenidən qurulması prosesində özəl sektorun inkişafının sürətlənəcəyi gözlənilir. Məcəllənin reallaşdırılması ilə sosial rifahın yüksəldilməsi üçün də yeni impulslar müəyyənləşdirilir. Başqa sözlə, kiçik və orta sahibkarlıq subyektlərinin sayı artmaqla yanaşı, yeni iş yerləri açılır, məhsul və xidmətlərin çeşidliliyi üçün seçim imkanı genişlənir. Həmçinin istehsalın və təklifin artması nəticəsində qiymətlər də azalır. Deməli, bu məcəllə əsassız qiymət artımı ilə mübarizədə əsas alətə çevrilir və bununla da qiymətlərin optimallaşdırılmasına nail olunur.
Eyyub KƏRİMLİ,
iqtisadçı-ekspert
Rəqabət Məcəlləsinin qəbul edilməsinin ölkə iqtisadiyyatına müsbət təsirləri olacaq. Məsələn, respublikamızda biznes imkanlarının səmərəliliyi yüksələcək, idxal-ixrac potensialı daha da genişlənəcək. Digər tərəfdən bu, ölkədə monopoliyanın təsirlərinin aradan qaldırılmasına və bazar payının azaldılmasına böyük təsir göstərəcək. Nəticə etibarilə Rəqabət Məcəlləsinin qəbul edilməsi respublikada rəqabət mühitinin daha da müsbət istiqamətə dəyişməsini şərtləndirəcək, onun liberallaşmasına əlverişli şərait yaradacaq. Bu isə qiymətlərin daha sabit qalmasını gerçəkləşdirəcək və süni bahalaşmanın qarşısını alacaq.
Məcəllənin qəbulunun kiçik və orta biznesə də müsbət təsirləri olacaq, onların fəaliyyətinin stimullaşdırılmasına, investisiya yönümünə təsir edəcək, idxal-ixrac əməliyyatları sürətlənəcək və fəaliyyət istiqamətləri genişlənəcək.
Məcəllənin tətbiqi valyuta gəlirlərinin artmasında, qeyri-neft sektorunun inkişafında əhəmiyyətli rol oynayacaq. Kənd təsərrüfatında, həmçinin emal sahəsinin genişləndirilməsində də yeni mərhələ başlanacaq, həm yerli, həm də xarici investisiyaların artmasına əlverişli şərait yaradacaq. Bütün bunlar yeni iş yerlərinin yaranması və məşğulluğun artmasına səbəb olacaq.
Sonda bildirmək istərdim ki, Rəqabət Məcəlləsi inhisarçılığa qarşı mübarizənin qanuni əsaslarını və prosessual normalarını müəyyən edən Rəqabət Məcəlləsinin layihəsi müxtəlif dövlət qurumları, biznes assosiasiyaları ilə geniş müzakirələr əsasında, onların rəy və təklifləri nəzərə alınaraq hazırlanıb. “Antiinhisar fəaliyyəti haqqında”, “Haqsız rəqabət haqqında”, “Təbii inhisarlar haqqında” qanunlar və digər normativ hüquqi aktlar məcəllədə təkmil sənəddə birləşdirilib.
Vaqif BAYRAMOV
XQ