Tezliklə aqrar sahənin 10 faiz məhsulu bu bölgədə yetişdiriləcək
İşğaldan azad edilən ərazilərin yenidən bərpası, kənd təsərrüfatının muasir texnologiya ilə təmin edilməsi, yeni yaradılan nəqliyyat-logistika dəhlizləri, dayanıqlı inkişaf proqramları Qarabağ və Şərqi Zəngəzur iqtisadi rayonlarının simasını dəyişdirir. Aqrar, emal və hasilat sənayesinin inkişafına zəmin yaradır. Bu barədə iqtisadçı alim Elmir Səfərli dedi:
– Qarabağın münbit torpağı, zəngin təbiəti, o cümlədən, su ehtiyatları işğaldan azad edilmiş ərazilərdə kənd təsərrüfatının müxtəlif sahələrinin inkişafına səbəb olacaq və məhsuldarlığı artıracaq. Burada heyvandarlıq, üzümçülük, baramaçılıq, kartofçuluq, pambıqçılıq, taxılçılıq, tərəvəzçilik, meyvəçilik aparıçı sahələr olacaq. Bu bölgədə kənd təsərrüfatının inkişaf potensialı böyükdür. İşğaldan əvvəlki dövrdəki göstəricilər də bunu sübut edir. Həmin tarixdə ölkədə taxıl istehsalının 14,3 faizi, pambıq istehsalının 3,3 faizi, üzüm istehsalının 31,5 faizi, kartof istehsalının 6,3 faizi, tütünün 8 faizi ət istehsalının 14,5 faizi, barama istehsalının 17 faizi həmin ərazilərin payına düşürdü.
Rəqəmlər azad olunmuş ərazilərin kənd təsərrüfatı potensialının nə qədər yüksək olduğunu təsdiqləyir. Təsadüfi deyil ki, Azərbaycan Prezidentinin azad olunmuş torpaqlarla bağlı ilk tapşırığı bu torpaqların əkilib becərilməsi ilə bağlı olub. Tapşırığa əsasən, müharibənin başa çatdığı ilk günlərdən etibarən Kənd Təsərrüfatı Nazirliyi və digər aidiyyəti qurumlar tərəfindən işğaldan azad edilmiş ərazilərdə kənd təsərrüfatının gələcək inkişafının planlaşdırılmasına başlanılıb. Kənd təsərrüfatı sahəsinin bərpası istiqamətində tədbirlər görülüb.
Elmir Səfərlinin sözlərinə görə, Qarabağın təbii-iqlim və relyef xüsusiyyətləri nəzərə alınmaqla, bölgədə, xüsusilə taxıl və yem bitkiləri və heyvandarlıq məhsulları istehsalı üstünlük təşkil edəcək. Qabaqcıl ölkələrin təcrübəsindən istifadə etməklə aqrar sektorda böyük uğurlar əldə etmək olar. Bu uğurların mənbəyində təbii ki, bölgənin münbit torpağı, zəngin su ehtiyatları dayanır. Məhsuldarlığın artmasında çox mühüm rol oynayan bu amillər xarici investorların əraziyə cəlb olunmasına yol açacaq. Bu, həm də o deməkdir ki, həmin rayonlarda kənd təsərrüfatı ilə yanaşı, emal sənayesi də genişlənəcək.
İqtisadçı Mahir Zeynalov isə bildirdi ki, Qarabağ iqtisadi bölgəsinə daxil olan rayonların hər biri özünəməxsus zəngin təbii resurslara, yüksək iqtisadi potensiala və inkişaf perspektivlərinə malikdir: – Bu rayonların iqtisadiyyatında ənənəvi sahələrə üstünlük verilməklə yanaşı, rəqabətədavamlı qeyri-ənənəvi sahələrin də inkişaf etdirilməsi zəruridir. Xüsusən də Qarabağda kənd təsərrüfatının və emal sənayesinin, tikinti sektorunun, mədən sənayesinin, xidmət sahələrinin, turizmin inkişafı üçün yaxşı imkanlar var. Təkcə aqrar sektorla bağlı onu demək kifayətdir ki, çox münbit və məhsuldar torpaqlara malik Qarabağda taxıl, üzüm, pambıq, tütün, kartof, tərəvəz və bostan məhsulları, meyvə və giləmeyvə istehsalı ənənəvi sahələrdir.
Ənənəvi sahələr arasında üzümçülük və taxılçılıq həm əhatə etdiyi əkin sahələrinə, həm də istehsal həcminə görə xüsusi çəkiyə malik olmaqla üstün və inkişaf etmiş sahələr olub və olacaq. Əvvəlki dövrün yaxşı ənənələri, hazırkı potensial imkanları və müqayisəli üstünlükləri nəzərə alınmaqla Qarabağ iqtisadi rayonunun yeni bazar tələblərinə uyğun müasir standartlar səviyyəsində inkişafı Azərbaycan iqtisadiyyatının daha da böyüməsinə təkan verəcək.
Bölgədə aqrar sektorun inkişaf etdirilməsinin əsas istiqamətlərindən biri də yeni logistika infrastrukturunun qurulması və fermerlərin texnika ilə təchiz edilməsidir. Çünki logistika imkanlarının genişlənməsi kənd təsərrüfatı məhsullarının ixrac bazarlarına çıxarılmasına imkanlar yaradacaq. Bütün bunlar göstərir ki, azad olunmuş ərazilərin aqrar potensialından səmərəli istifadə ölkə üzrə kənd təsərrüfatı məhsullarının istehsalını ciddi çəkildə artıracaq.
Aqrar texnika təchizatına gəlincə, artıq Kənd Təsərrüfatı Nazirliyi planlar hazırlayıb. İnsanlar məskunlaşdıqca, torpağın əkilib-becərilməsinə başladıqca, onların kənd təsərrüfatı texnikasına, eləcə də toxum, gübrə və pestisidlərə olan ehtiyacları ödəniləcək.
Bəs nə qədər torpaq sahəsi əkinə cəlb ediləcək? Bu barədə İqtisadi İslahatların Təhlili və Kommunikasiya Mərkəzinin (İİTKM) icraçı direktoru Vüsal Qasımlı bildirdi ki, 200 min hektar kənd təsərrüfatı sahəsi və bundan da çox örüş sahəsi, həmçinin keçmiş cəbhə xətti boyunca istifadəsiz qalan on minlərlə hektar torpaq sahəsi aqrar biznesin resurs əsasını təşkil edir. Hesablamalar göstərir ki, orta müddətli perspektivdə Qarabağ bölgəsi ölkənin kənd təsərrüfatına 10,4 faiz töhfə verəcək.
Qeyd edək ki, bölgənin aqrar inkişafı Azərbaycan iqtisadiyyatına təsir edəcək. Keçmişlə müqayisədə yeni və daha üstün iqtisadiyyat qurmağa imkan verəcək. Qarabağa Böyük Qayıdış reallaşdırıldıqdan və yerli iqtisadiyyat dirçəldildikdən sonra bölgə sosial-iqtisadi cəhətdən özünü təmin etməklə yanaşı, bütövlükdə, Azərbaycan iqtisadiyyatına böyük töhfə verəcək, ölkədə ərzaq təhlükəsizliyi təmin olunacaq, yeni iş yerləri yaranacaq, ixrac potensialı artacaq.
Pünhan ƏFƏNDİYEV
XQ
Ağdam