İqtisadi İslahatların Təhlili və Kommunikasiya Mərkəzinin hazırladığı “İxrac icmalı”nın oktyabr sayına əsasən, 2023-cü ilin yanvar-sentyabr aylarında Azərbaycanın ümumi ixracı 26,5 milyard ABŞ dolları təşkil edib. Hesabat dövründə qeyri-neft sektoru üzrə ixrac 2022-ci ilin 9 ayı ilə müqayisədə 10,6 faiz artaraq 2,4 milyard dollar olub.
Nəşrin məlumatına görə, cari ilin yanvar-sentyabr ayları ərzində ölkəmizdən 616,3 milyon dollar dəyərində yeyinti məhsulları ixrac edilib. Hesabat dövründə spirtli və spirtsiz içkilərin ixracı 3,3 dəfə, elektrik enerjisi 2,7 dəfə, qara metallardan məmulatların ixracı 34,3 faiz, meyvə-tərəvəz ixracı isə 7,1 faiz artıb.
2023-cü ilin yanvar-sentyabr aylarında aqrar və aqrar-sənaye məhsulları üzrə birgə ixracın statistik dəyəri 8,4 faiz artaraq 641,2 milyon dollar təşkil edib. Qeyri-neft/qaz ixracının tərkib hissəsində əhəmiyyətli yer tutan aqrar-sənaye məhsullarının yaratdığı dəyər ötən ilin müvafiq dövrü ilə müqayisədə 22,4 faiz artaraq 145,9 milyon dollara çatıb.
Bu ilin sentyabr ayında ölkəmizdən 223,89 milyon ABŞ dolları dəyərində qeyri-neft məhsulları ixracı olunub. Bunun da 44,9 milyon dolları yeyinti məhsullarının, 178,9 milyon dolları isə qeyri-yeyinti məhsullarının payına düşüb.
XQ