Prezident İlham Əliyevin dəvəti ilə ölkəmizdə dövlət səfərində olan Türkiyə Prezidenti Rəcəb Tayyib Ərdoğan iyunun 13-də mətbuata bəyanatında bir sıra məsələlərlə bərabər, Naxçıvan üzərindən Türkiyəyə dəmir yolu xəttinin çəkiləcəyini də vurğulayıb.
Qardaş ölkənin lideri ən çox həssaslıq göstərilən Zəngəzur dəhlizi layihəsindən danışarkən bu təşəbbüsün sürətlə həll olunacağına əminliyini bildirib. Eyni zamanda, belə bir layihənin hər iki qardaş ölkəyə iki mühüm imkan qazandıracağını deyib. Belə ki, Türkiyə rəhbəri istər avtomobil, istərsə də dəmir yolları ilə bağlı atılacaq addımlar sayəsində Azərbaycandan İğdıra, Naxçıvana yolun açılması ilə qardaş ölkənin muxtar respublika ilə əlaqəsinin daha güclü olacağını diqqətə çatdırıb. Ərdoğan daha sonra bildirib: “Bu əlaqələrin yaradılması Türkiyə ilə Azərbaycan arasındakı münasibətlərin daha da güclənməsinə imkan verəcək. Çünki yol mədəniyyətdir. Əgər yolunuz varsa, mədənisiniz. Yolunuz varsa, mədəniyyətə çatmısınız. Əgər yol yoxdursa, heç bir şey yoxdur. Hazırda Azərbaycanın, xüsusilə müharibələrdən sonra infrastrukturla bağlı böyük həssaslıq göstərdiyi ən əhəmiyyətli məsələ yollardır. Bundan əvvəlki səfərimdə də gördüm, bütün tunellər, viaduklar Azərbaycanın Qarabağ müharibələrindən – istər Birinci, istərsə İkinci Qarabağ müharibəsindən sonra necə inkişaf etdiyini ən gözəl şəkildə ortaya qoyur”.
Bakıda keçirilən Azərbaycan ilə Türkiyə arasında iqtisadi əməkdaşlıq üzrə birgə Hökumətlərarası Komissiyanın 10-cu iclasında da bu barədə ətraflı bəhs edilib. İclasda Azərbaycanın əsas hissəsi ilə Türkiyə arasında Naxçıvan vasitəsilə birbaşa dəmir yolu əlaqəsinin təmin edilməsi baxımından Qars–İğdır–Aralık–Dilucu–Sədərək–Naxçıvan–Culfa dəmir yolu layihəsinin reallaşdırılmasının mühüm önəm daşıdığı xüsusi vurğulanıb. Eyni zamanda, Zəngəzur dəhlizinin açılması və Naxçıvana dəmir yolunun çəkilməsi nəticəsində Azərbaycan–Türkiyə iqtisadi–ticari əlaqələrinin genişlənəcəyi diqqətə çatdırılıb.
Yeni yaranmış reallıqlar fonunda nəqliyyat kommunikasiyalarının açılmasının əməkdaşlıq üçün yaxşı imkanlar vəd etdiyi bildirilən həmin tədbirdə Zəngəzur dəhlizinin açılmasının regional əməkdaşlığı daha da gücləndirəcəyinə, bölgə ölkələrinin iqtisadi tərəqqisinə xidmət edəcəyinə əminlik ifadə olunub.
Zəngəzur dəhlizindən söz düşmüşkən, xatırladaq ki, bu infrastruktur ölkəmizin Qərb hissəsi ilə Ermənistanın ərazisindən keçərək Naxçıvanla nəqliyyat əlaqələrinin yaradılmasını nəzərdə tutur. Bununla da sözügedən dəhliz Mərkəzi Asiya və Cənubi Qafqaz, Avropa və Asiya arasında olan iqtisadi əlaqələrin yaranmasında və inkişaf etdirilməsində həlledici rolu şərtləndirir.
Prezident İlham Əliyev çıxışlarının birində Zəngəzur dəhlizinin iqtisadi əhəmiyyətindən danışaraq deyib: “Təkcə Orta Asiya ölkələrinin yükgöndərmə potensialını və oraya Avropa istiqamətindən gedən yükləri nəzərə alsaq görərik ki, hətta biz bütün bu layihələri icra etsək və genişləndirsək, yenə də çatmayacaq. Ona görə Zəngəzur dəhlizinin iqtisadi səmərəsi heç kimdə şübhə doğurmamalıdır”.
Zəngəzur dəhlizinin iqtisadi əhəmiyyətindən bəhs edərkən bir məqama da toxunmaq istərdik. Bunun üçün əvvəlcə Orta Dəhlizin fəaliyyətinə nəzər salaq. Hesablamalar göstərir ki, Çindən Avropaya gedən yük qatarı bu dəhliz vasitəsilə 12 gün ərzində 7 min kilometr məsafə qət edir. Bu da Asiya ilə Avropa arasında qlobal ticarətdə adıçəkilən infrastrukturun nə qədər sərfəli və təhlükəsiz olduğunu göstərir. Halbuki eyni qatar Cənub Dəhlizi üzrə Süveyş kanalı üzərindən gəmi ilə 20 min kilometr yol qət edir. Bu mənada Azərbaycan reallaşmasına töhfə verdiyi Orta Dəhliz öz imkanları ilə şübhəsiz ki, region ölkələrinin koordinasiyalı əməkdaşlığı sayəsində dünya ticarətinin ən mühüm həlqələrindən biri kimi diqqət çəkir.
Zəngəzur dəhlizinin də Orta Dəhlizə inteqrasiya ediləcəyi nəzərdə tutulur. Belə halda Azərbaycan ərazisindən illik təxminən 35 milyon ton yükün daşınmasına imkan yaranır. Zəngəzur dəhlizinin digər bir iqtisadi əhəmiyyəti isə Mərkəzi Asiya ölkələrinin bu yeni nəqliyyat dəhlizindən gələcəkdə istifadəsi ilə bağlıdır. Başqa sözlə, bu dəhliz “Aşqabad müqaviləsi” adı ilə tanınan anlaşmaya qoşulan ölkələrinin Avropaya reinteqrasiyası üçün yeni perspektivləri şərtləndirir. Belə ki, sözügedən müqavilə Türkmənistan, Özbəkistan, Qazaxıstan, İran, Oman, Hindistan və Pakistan arasında Avrasiya regionunda nəqliyyat əlaqələrinin inkişafını gerçəkləşdirmək məqsədi daşıyır.
Adları çəkilən ölkələr vasitəsilə həyata keçirilən beynəlxalq yükdaşımaların Zəngəzur dəhlizindən Avrasiya bazarlarına çatdırılması Qarabağ regionunun iqtisadi potensialının artmasında xüsusi rol oynaya bilər.
Beləliklə, 123,8 kilometrlik Horadiz–Cəbrayıl–Zəngilan–Ağbənd, 70 kilometrlik Xudafərin–Qubadlı–Laçın, 73 kilometrlik Kəlbəcər–Laçın, 13 kilometrlik Füzuli–Hadrut və 45 kilometrlik Bərdə–Ağdam yollarının inşası Qarabağ regionunun, o cümlədən Azərbaycanın nəqliyyat dəhlizlərinə çıxışını çoxşaxəli etməklə bu coğrafiyadan keçəcək xətlərin önəmini də artıracaq.
Samir HEYDƏROV,
iqtisadçı-ekspert
Türkiyə Respublikasının Prezidenti Rəcəb Tayyib Ərdoğan mətbuata bəyanatında Orta Dəhlizin fəaliyyətini yüksək dəyərləndirib. Cümhurbaşqanı çıxışında Orta Dəhlizin həm Türkiyə, həm Azərbaycan, həm də bütövlükdə Türk Dünyası üçün böyük önəm daşıdığını vurğulayıb.
Mürəkkəb geopolitik vəziyyət səbəbi ilə Orta Dəhlizin dünya ticarətində bir inqilab olması isə göz önündədir. Belə ki, hazırda Çin–Avropa Birliyi (AB) ticarət əlaqələri Çin –ABŞ iqtisadi-ticari əlaqələrini geridə qoyur.
Xatırladım ki, 2022-ci ildə Çin–AB arasında ticarət dövriyyəsi 850 milyard avro olub. Bunun əksinə, Çin–ABŞ arasında xarici ticarət dövriyyəsi 690 milyard dollar təşkil edib ki, burada da xarici ticarət dövriyyəsi 382,9 milyard dollarlıq mənfi saldo təşkil edib. Yəni sadə dildə desək, bir il ərzində iki dövlət arasında əmtəə və xidmət ticarətindən 383 milyard dollara yaxın vəsait Çin iqtisadiyyatına “axıb”.
Prezident İlham Əliyev isə mətbuata bəyanatında indiki geosiyasi şəraitdə Orta Dəhlizin önəminin daha da artdığını, Xəzər dənizi ilə daşınan yüklərin həcminin ildən-ilə çoxaldığını bildirib. Dövlətimizin başçısı məhz bu səbəbdən Azərbaycanda nəqliyyat və logistika imkanlarının genişləndirildiyini, Bakı Dəniz Limanının imkanlarını 25 milyon tona çatdırıldığını vurğulayıb.
Xatırladaq ki, 2017-ci ildə fəaliyyətə başlayan bu layihənin əhəmiyyəti 2022-ci ildə Ukraynada hərbi əməliyyatların başlanmasından sonra özünü daha qabarıq büruzə verib. Belə ki, əgər 2022-ci ilə qədər Trans–Sibir dəmir yoluna üstünlük verilirdisə, hazırda Rusiya–Ukrayna müharibəsi kontekstində mövcud reallıq Avropa İttifaqı ilə ticarət prosesini ciddi şəkildə mürəkkəbləşdirib.
Buna görə də hazırda Orta Dəhliz Avropa ilə Asiya arasında ən təhlükəsiz və qısa yol hesab olunur. Bu nəqliyyat marşrutu həm də okeana çıxışı olmayan Azərbaycan, Türkmənistan, Özbəkistan və Əfqanıstan kimi ölkələr üçün qlobal bazarlara çıxış əldə etmək baxımından mühüm önəm daşıyır.
Vaqif BAYRAMOV, “Xalq qəzeti”