Azərbaycan Prezidenti İlham Əliyev “Bakı şəhərinin inzibati ərazisində avtomobil nəqliyyatı sahəsində idarəetmənin təkmilləşdirilməsi ilə bağlı əlavə tədbirlər haqqında 19 aprel 2023-cü il tarixli Fərman imzalayıb. Dövlətimizin başçısı sənəddə Bakı şəhərinin inzibati ərazisində avtomobil nəqliyyatı, o cümlədən yol hərəkətinin təşkili sahəsində tənzimləmə və idarəetmə mexanizmlərinin təkmilləşdirilməsi, ümumi istifadədə olan avtomobil nəqliyyatı vasitələri ilə müntəzəm sərnişindaşıma, həmçinin taksi minik avtomobilləri ilə sərnişindaşıma sahəsində rəqabətin, eyni zamanda, göstərilən xidmətlərin təhlükəsizliyinin, habelə keyfiyyətinin yüksəldilməsi məsələlərini qarşıya önəmli vəzifə kimi qoyub. 

Fərmanla Bakı şəhərinin inzibati əra­zisində yol hərəkətinin təşkilində iştirak edilməsi, ümumi istifadədə olan nəqliy­yat vasitələri ilə müntəzəm sərnişinda­şıma və taksi minik avtomobilləri ilə sər­nişindaşıma sahəsində tənzimləmənin və nəzarətin həyata keçirilməsi Rəqəm­sal İnkişaf və Nəqliyyat Nazirliyinə hə­valə edilib. Sənədə əsasən, Rəqəmsal İnkişaf və Nəqliyyat Nazirliyinin tabeli­yindəki Yerüstü Nəqliyyat Agentliyi Bakı Şəhər İcra Hakimiyyətinin tabeliyindəki “Bakı Nəqliyyat Agentliyi” publik hüquqi şəxsin həmin quruma qoşulması forma­sında yenidən təşkil edilməsi nəzərdə tutulur. Bakı Şəhər İcra Hakimiyyətinin tabeliyindəki “Bakı Nəqliyyat Agentliyi” publik hüquqi şəxsin balansındakı əm­lak isə adı çəkilən agentliyin balansına verilir. 

Fərmanla Nazirlər Kabinetinə nor­mativ hüquqi aktların təkmilləşdirilmə­si və agentliyin nizamnamə fondunun miqdarının artırılması barədə təklifləri nəzərdə tutulan vaxt ərzində hazırlayıb Azərbaycan Prezidentinə təqdim etmək, “Bakı Nəqliyyat Agentliyi” publik hüquqi şəxsin balansındakı əmlakın agentliyin balansına verilməsini üç ay müddətində gerçəkləşdirmək, agentliyin maddi-tex­niki bazasının möhkəmləndirilməsi üçün zəruri tədbirlər görmək, eyni za­manda, Rəqəmsal İnkişaf və Nəqliyyat Nazirliklərinə agentliyin yenidən təşkili­ni, o cümlədən “Bakı Nəqliyyat Agent­liyi” publik hüquqi şəxsin fəaliyyətinə xitam verilməsinin dövlət qeydiyyatı ilə bağlı zəruri tədbirləri həyata keçirmək tapşırılır. 

Dövlətimizin başçısı İlham Əliyev, eyni zamanda, aprelin 19-da Nəqliyyatı Əlaqələndirmə Şurasının yaradılma­sı haqqında sərəncam da imzalayıb. Sərəncama əsasən, şura nəqliyyatın ayrı-ayrı növlərinin koordinasiyalı fəa­liyyətinin və əhalinin mobilliyinin təmin edilməsi, yol və nəqliyyat infrastruktu­runun inkişaf etdirilməsi, yol hərəkətinin təşkili, təhlükəsizliyi və tənzimlənməsi sahələrində fəaliyyətin əlaqələndiril­məsi və təkmilləşdirilməsi məqsədilə yaradılıb.

Sərəncamla rəqəmsal inkişaf və nəqliyyat naziri Nəqliyyatı Əlaqələndir­mə Şurasının sədri, bir sıra dövlət qu­rumlarının rəhbər və müavinləri isə üzv təyin olunublar.

Sənədlə Nazirlər Kabinetinə bir ay müddətində şuranın əsasnamə layihəsi ilə bağlı təklifləri və şuranın yaradılma­sı ilə bağlı nəqliyyat sahəsində tənzim­ləmənin təkmilləşdirilməsi ilə əlaqədar normativ hüquqi aktların layihələrini ha­zırlayıb Azərbaycan Prezidentinə təq­dim etmək, həmçinin sərəncamdan irəli gələn digər məsələləri həll etmək tapşı­rılıb. 

Emin BAĞIROV,
ETN Riyaziyyat və Mexanika İnstitutunun böyük elmi işçisi, fəlsəfə doktoru

Dövlət başçısının paytaxtımızın inzibati ərazisində avtomobil nəqliy­yatı sahəsində idarəetmənin təkmil­ləşdirilməsi ilə bağlı əlavə tədbirlər haqqında fərmanı, eyni zamanda, Nəqliyyatı Əlaqələndirmə Şurasının yaradılması ilə bağlı sərəncamı mü­hüm əhəmiyyəti ilə diqqət çəkir. Yeri gəlmişkən, etiraf edək ki, nəqliyyat sektorunda bu günə kimi, bir sıra həllini gözləyən problemlər mövcud­dur və ölkə Prezidentinin imzaladığı adları çəkilən sənədlər həmin çətin­liklərin aradan qaldırılması, bu sahə­də dönüşün yaradılması, sözügedən sektorun inkişafının gerçəkləşdiril­məsi məqsədi daşıyır. 

Uzun illər ərzində mövcud siste­min yenidən qurulması, müasirləş­dirilməsi daim diqqət mərkəzində saxlanılıb, bu istiqamətdə çoxsaylı layihələr reallaşdırılıb. İstər yükda­şımada, istərsə də müxtəlif nəq­liyyat vasitələri ilə əhaliyə xidmət göstərilməsində yüksək keyfiyyət göstəricilərinə nail olunub. Əlbəttə, bu məsələdə avtomobil nəqliyyatı parklarının yenilənməsi, xidmət pro­sesində təhlükəsizliyin təmin olun­ması və yol infrastrukturunun müasir səviyyədə qurulmasına xüsusi önəm verilib. 

Bütün bunlara baxmayaraq, sö­zügedən sistemdə görüləsi işlər də çoxdur. Məsələn, hazırda həm paytaxt ərazisində, həm də regi­onlarımızda avtomobil nəqliyyatı, o cümlədən yol hərəkətinin təşkili sahəsində tənzimləmə və idarəetmə mexanizmlərinin təkmilləşdirilmə­sinə ciddi ehtiyac duyulur. Bundan başqa, ümumi istifadədə olan avto­mobil nəqliyyatı vasitələri və taksi minik avtomobilləri ilə sərnişindaşı­ma sahəsində rəqabətin nizama sa­lınmasında müəyyən çatışmazlıqlar böyük narahatlıq doğurur. Şübhəsiz ki, hər iki tərəfdə göstərilən xidmət­lər baxımından müəyyən nöqsanlar da nəzərə çarpır və bu, təhlükəsiz­liyin və keyfiyyətin yüksəldilməsi məsələlərinin həllini zəruri edir. 

Bütün bunlara əsasən, deyə bilərəm ki, dövlətimizin başçısının müvafiq sərəncamı ilə yaradılan Nəqliyyatı Əlaqələndirmə Şurası səmərəli fəaliyyəti ilə nəqliyyatın ayrı-ayrı növlərinin koordinasiya­lı fəaliyyətini və əhalinin mobilliyini təmin edəcək, yol və nəqliyyat in­frastrukturunun inkişaf etdirilməsi, yol hərəkətinin təşkili, təhlükəsizliyi və tənzimlənməsinin daim diqqətdə saxlamaqla, ölkəmizin iqtisadiyyatı­nın daha da güclənməsinə, əhalinin sosial şəraitinin daha da yaxşılaş­masına önəmli töhfə verəcək. 

Yeri gəlmişkən, nəqliyyat sekto­runa göstərilən diqqət və aparılan düşünülmüş siyasət nəticəsində son illərdə bu sahə uğurla inkişaf edib. Yol infrastrukturu yenilənib. Yol hərəkətinin təşkilinə gəldikdə isə nəqliyyat vasitələrinin və ya pi­yadaların təhlükəsizliyini, fasiləsiz və rahat hərəkətini təmin etmək məqsədilə küçə-yol şəbəkəsi daim yenilənib, bu istiqamətdə bir sıra mühəndis və təşkilati tədbirlər real­laşdırılıb. 

Vaqif BAYRAMOV, “Xalq qəzeti”