Baş məşqçi daha çox medal gözləyir
Başa çatmaqda olan 2023-cü il bir sıra parametrlər üzrə, o cümlədən növbəti Yay Olimpiya Oyunlarına hazırlıq baxımından həlledici il kimi mühüm əhəmiyyət kəsb edir. Olimpiya Oyunlarında əsas medal ümidlərimizdən olan sərbəst güləşçilər bu il dörd illiyin baş yarışına vəsiqə əldə etmək üçün bütün gücləri ilə meydanda mübarizə aparıblar.
Onlardan yalnız birinin – Maqomedxan Maqomedovun Olimpiadada iştirakı rəsmiləşib. İdmançımız vəsiqəni Serbiyanın paytaxtı Belqradda keçirilən dünya çempionatında 97 kiloqram çəki dərəcəsində finala yüksəlməklə qazanıb.
Milli güləşimizə çox bənzəyən bu idman növünün sərbəst üsulunda təmsilçilərimizin əldə etdikləri nailiyyətlərə nəzər salsaq, onun ənənələrinin ölkəmizdə nə qədər zəngin olduğunu görərik. Təsadüfi deyil ki, Azərbaycan idmanının ilk Olimpiya medalı (“Helsinki-1952”, Rəşid Məmmədbəyov (57 kq, gümüş) güləşin məhz bu növü üzrə qazanılıb. Daha bir sərbəst güləşçi Aydın İbrahimov (57 kq) “Tokio-1964”də bürünc medal qazanıb.
Müstəqillik illərinin ilk 2 medalı da sərbəst güləşin payına düşüb. İstedadlı güləşçimiz Namiq Abdullayev (42 kq) Atlanta Olimpiadasında gümüş, Sidney Yay Olimpiya Oyunlarında isə qızıl medala sahib olub. Müstəqillik illərində sərbəst güləş üzrə ən yaxşı nəticələr “London-2012” (3 medal) və Rio Olimpiadasında (5 medal) əldə edilib. London Oyunlarında Azərbaycan komandasının aktivinə 2 qızıl medalın 2-sini də məhz sərbəst güləşçilər yazdırıblar. Əvvəlki iki Olimpiadadan fərqli, “Tokio-2020”də isə cəmi 1 idmançımız (Hacı Əliyev, 65 kq, II yer) mükafatçılar sırasında yer ala bilib.
Bəs güləşçilərimizin növbəti Olimpiya Oyunlarında iştirak şansları necə qiymətləndirilir? Ümumiyyətlə, bu ili sərbəst güləşçilərimiz üçün uğurlu hesab etmək olarmı?
Bu suallara Azərbaycanın sərbəst güləş üzrə yığma komandasının baş məşqçisi Xetaq Qazyumov belə cavab verdi:
– Əminliklə deyə bilərəm ki, seçmə turnirdə komandamızdan olan hər bir iştirakçının potensial olaraq lisenziya qazanmaq şansı var. Gələn il Olimpiya Oyunları üçün ilk Avropa təsnifat turniri Azərbaycanda keçiriləcək. İkinci dünya təsnifat turniri Türkiyədə olacaq. İlk turnir Bakıda keçirildiyi üçün yarışa daha məsuliyyətlə hazırlaşacağıq. Təbii ki, maksimum sayda lisenziya qazanmağa çalışacağıq. Düşünürəm ki, lisenziyaların sayı ilə bağlı proqnoz vermək peşəkarlıqdan kənardır.
Azərbaycan Güləş Federasiyasının, məşqçi heyətinin və idmançıların üzərinə böyük məsuliyyət düşür və biz bunu yaxşı dərk edirik. Parisdə keçiriləcək Yay Olimpiya Oyunlarında ölkəmizi layiqincə təmsil etmək üçün əlimizdən gələni etməyə çalışacağıq.
Xetaq Qazyumov Azərbaycan milli komandasının builki nəticələrindən də danışdı:
– Bu ilin birinci yarısı çox uğurlu alındı. Kişilərdən ibarət komandamız Avropa çempionatının qalibi olub. Həmçinin, U-15 və U-17, eləcə də, U-23 komandaları yüksək nəticələr qazanıblar.
Baş məşqçi Azərbaycan Güləş Federasiyasının yeni ildə ən istedadlı gənclər üçün internat məktəbi açmağı planlaşdırdığını bildirdi. O qeyd etdi ki, bütün yaş qrupları üzrə monitorinq və təsnifat yarışları keçiriləcək ki, bununla da istedadlı güləşçilər müəyyənləşdiriləcək.
Ötən Yay Olimpiya Oyunlarında sərbəst güləş üzrə yeganə mükafatçımız, üçqat dünya, dördqat Avropa çempionu Hacı Əliyev karyerasında son Olimpiadaya hazırlaşır:
– Paris Olimpiadasına lisenziya əldə etmək üçün bütün gücümüzlə hazırlaşırıq. Olimpiya Oyunlarının qalibi adını qazanmaq ən böyük arzumdur.
Bu il Avropa çempionatının qalibi olmuş Əliabbas Rzazadə (57 kq), qitə çempionatının ikiqat mükafatçısı Turan Bayramov (74 kq) və digər istedadlı güləşçilərimizdən də gözləntilər böyükdür.
Leyla QURBANOVA
XQ
