Rusiyanın Yekaterinburq şəhərində keçirilən Beynəlxalq Universitet İdman Festivalında Azərbaycan idmançıları növbəti medalları qazanıblar.
Gənclər və İdman Nazirliyindən “Xalq qəzeti”nə bildirilib ki, dünən təmsilçilərimiz 7 medal qazanıblar. Komandamızın aktivinə qızıl medalları qadın güləşçimiz Gültəkin Şirinova (53 kq), Mərziyyə Sadıqova (72 kq), boksçu Nicat Hüseynov (51 kq) yazdırıblar. Boksçularımız Fərhad Şeydayev (75 kq), Tural Sarıyev (51 kq), Manjona Sariyeva (50 kq) ikinci, qadın güləşçimiz Birgul Soltanova (65 kq) 3-cü yeri yeri tutublar. Bununla da komandamızın əldə etdiyi medalların sayı 15-ə çatıb.
Qeyd edək ki, avqustun 31-dək davam edəcək Beynəlxalq Universitet İdman Festivalı Yekaterinburq şəhərinin 300 illik yubileyinə həsr edilib. 36 ölkədən müxtəlif universitetlərin tələbələri 14 idman növündə qüvvələrini sınayırlar.
Festivalda Azərbaycanı 10 təhsil ocağından 54-ü kişi 15-i qadın olmaqla 69 idmançı təmsil edir. Təmsilçilərimiz 8 idman növündə - badminton, stolüstü tennis, boks, güləş, taekvondo, futzal, üzgüçülük, sambo üzrə yarışırlar.
Leyla SABİRQIZI, “Xalq qəzeti”
