Bakı İdman Sarayında keçirilən və ümummilli lider Heydər Əliyevin anadan olmasının 100-cü ildönümünə həsr olunmuş ali və orta ixtisas təhsili müəssisələrinin tələbələri arasında futzal üzrə turnirin qalibi müəyyənləşib.
Birinci yer uğrunda mübarizədə Azərbaycan Dövlət Bədən Tərbiyəsi və İdman Akademiyasının komandası Azərbaycan Dövlət Neft və Sənaye Universitetinin yığmasını məğlub edərək qalib adına sahib olub. Üçüncü yer uğrunda oyunda isə Bakı Dövlət Universiteti Gəncə Dövlət Universitetinin futzalçılarını məğlub edərək bürünc medala layiq görülüb.
Yarışda 19-u Bakı, 13-ü regiondan olmaqla, ümumilikdə 32 ali və orta ixtisas təhsili müəssisələrinin komandaları iştirak ediblər. Yarışlar yarımqrup oyunları, pley-off, yarımfinal və final mərhələləri üzrə keçirilib.
Çempionatın təşkilində məqsəd ulu öndər Heydər Əliyevin irsinin aşılanması, tələbələr arasında futzal idman növünün kütləviliyinin təmin edilməsi, beynəlxalq yarışlarda iştirak üçün respublikanın tələbələrdən ibarət yığma komandasına namizədlərin müəyyənləşdirilməsidir.
L.QURBANOVA, “Xalq qəzeti”