Bolqar bibərinin yaşlı insanlar tərəfindən istehlakı ürək-damar xəstəliklərinin profilaktikası üçün faydalıdır. Xarici ölkə mütəxəssisləri bolqar bibərini yaşlı insanların rasionunda ən yaxşı tərəvəzlərdən biri adlandırıblar. Onların fikrincə, bibərin tərkibində antioksidant effektinə malik karotinoidlər, eləcə də sağlamlığı (ürək-damar sisteminin sağlamlığını) möhkəmləndirən digər maddələr var.
Bolqar bibəri orqanizmin ürək-damar xəstəlikləri zamanı müdafiəni yaxşılaşdıran mikroelementlər olan kalium və maqnezium mənbəyidir. Bu qida məhsulunun qəbulu yaşla bağlı xəstəliklər – məsələn, hipertoniya ilə mübarizədə səmərəli kömək edir. Bolqar bibəri yaşla bağlı meydana gələn xəstəliklərin profilaktikasında da faydalıdır. Bunlar ateroskleroz, podaqra, hipertoniya xəstəliyidir.
Mütəxəssislər, həmçinin qeyd ediblər ki, tərəvəzin tərkib hissələri sayəsində onun istehlakı hiperqlikemiya və şəkərli diabet əleyhinə müdafiəni yaxşılaşdırır. Bibərdə olan liflər şəkərin qana sorulmasının qarşısını alır, karotinoidlər isə yüksək qlükoza konsentrasiyasının zərərli təsirini neytrallaşdırır.
Z. HÜSEYNOVA, “Xalq qəzeti”