ABŞ-nin sabiq dövlət başçısı Barak Obama və onun həyat yoldaşı Mişel noyabrın 5-də keçiriləcək prezident seçkilərində Kamala Harrisin namizədliyini dəstəkləyiblər. Bu barədə ABŞ mediası məlumat yayıb. Məlumatda Barak və Mişel Obamaların siyasi mövqelərini özlərinin sosial media hesablarında da bildirdikləri qeyd olunur.
Amerikanın sabiq prezidenti Barak Obama şəxsi səhifəsində belə yazıb: “Mişel və mən dostumuz Kamala Harrisə zəng edərək, onun çox yaxşı prezident olacağını və Kamalanı bu yolda tam dəstəklədiyimizi dedik. Seçkilərdə onun qalib gəlməsi üçün əlimizdən gələni edəcəyik”.
Mişel Obama isə öz növbəsində insanlara bəxş etdiyi gözəl əhval-ruhiyyə, yumor hissi və ümid vermək bacarığına görə Kamala Harrisin Demokratlar partiyasından dövlət başçısı postuna namizədliyini dəstəklədiyini vurğulayıb.
Xatırladaq ki, iyulun 21-də ABŞ-nin hazırkı Prezidenti Cozef Bayden dövlət başçısı postuna yenidən seçilmək istəmədiyini elan edib və vitse-prezident Kamala Harrisin namizədliyini dəstəklədiyini bildirib.
S.FİDAN
XQ
