“Şimali Atlantika Alyansı” – NATO qlobal sülh və sabitlik üçün real təhlükə mənbəyidir. Bunu Çin Xalq Respublikasının Xarici İşlər Nazirliyinin rəsmi nümayəndəsi Lin Cyan bildirib.
Onun sözlərinə görə, “Soyuq müharibə”nin məhsulu və dünyanın ən böyük hərbi ittifaqı özünü regional müdafiə təşkilatı adlandırsa da, daim səlahiyyətlərini genişləndirir, müdafiə sahəsindən kənara çıxaraq dünyanın müxtəlif ölkələrində qarşıdurmalar yaradır. Lin Cyan qeyd edib ki, bu, NATO-da Soyuq müharibə təfəkkürünün və ideoloji ön mühakimələrin möhkəmləndiyini göstərir: "Bu isə qlobal sülh və sabitliyi təhdid edən real riskdir".
Çin diplomatı alyansı Asiya–Sakit okean regionunda gərginliyi artırmamağa və blok qarşıdurmasından xilas olmağa çağırıb.
Xatırladaq ki, iyulun 1-də NATO-nun baş katibi Yens Stoltenberq Çini son 80 ildəki fəaliyyəti ilə Avropada ən böyük münaqişəni törətməkdə ittiham edib. Onun sözlərinə görə, Çin tərəfi Moskvaya raket və pilotsuz uçan aparatların istehsalı üçün ən müasir texnologiyalar və elektronik avadanlıqlar verib.
Buna cavab olaraq Çin Xarici İşlər Nazirliyinin sözçüsü Mao Ning bildirib ki, NATO Avropada qarışıqlıq yaradıb və Ukraynada müharibənin genişlənməsinə səbəb olub. O, daha sonra vurğulayıb ki, alyans fəaliyyəti ilə Asiya–Sakit okean regionuna zərər vurur və bunu dayandırmalıdır.
PÜNHAN
XQ
.jpg)
