“UnHerd”: Bu il daha təhlükəli olacaq
2023-cü il dünya üçün hər günü qana bələnmiş və insan iztirabları hopmuş çox ağır bir il oldu. Çoxsaylı münaqişələr və böhranlar planetimizi sanki didirdi. Kim deyə bilər ki, bu il yaxşı olacaq? Hələ ki, 2024-cü il üçün siyasi analitiklərin və iqtisadçı ekspertlərin proqnozları 2024-cü ilin daha da pis olacağını vəd edir.
2020-ci ildə Mişel Uelbekdən soruşanda ki, koronavirus pandemiyasından sonra dünyanı necə təsəvvür edirsiniz, o, çox sərrast bir cavab verdi: “Eynən belə, ancaq bir az daha pis”. 2024-cü ildə də oxşar bir şeyin bizi gözlədiyini qabaqcadan görmək üçün falçı olmaq lazım gəlmir. 2023-cü ildə dünyada 1945-ci ildən bəri görünməmiş qlobal münaqişələr baş verdi. Bu il isə daha da pis olacaq. Əlbəttə, dünya müharibəsi hələ uzaqda olsa da, planeti qəddar düşmənçilik bürüyüb: birqütblü ABŞ imperiyasından qalan qənimətlərin bölüşdürülməsinin böyük post-qlobalizm dövrü başlayıb. 1940-cı illər Böyük Britaniya üçün və ya 1991-ci il Rusiya üçün necə olubsa, qarşıdan elə bu cür epoxal bir dövr yaxınlaşmaqdadır.
Keçmişdə qalan iki dünya müharibəsindən fərqli olaraq, hazırkı rəqiblər fövqəldövlətləri birbaşa qarşıdurmaya çağırmırlar - ən azından hələlik. Eyni zamanda, Amerika hegemonluğu dolayısı ilə çox ciddi çağırışla üzləşib: zəif satellit-dövlətləri hədəfə alan rəqiblər onun imperiyasının ucqarlarını yavaş-yavaş gəmirirlər. Çünki əmindirlər ki, bugünkü Amerika öz nizamını dünyaya sırımaq üçün kifayət qədər logistik potensiala və daxili siyasi sabitliyə sahib deyil.
1990-2000-ci illərdə, özünün birqütblü dövrünün zirvəsində olan ABŞ, demək olar ki, dünyanın qalan hissəsini özünün satellitinə çevirmişdi. Sonra onlar hesab göstərənlərə, səxavətlə indi çox çətinliklə nağdlaşdırılan təhlükəsizlik çekləri verdilər: eynən iflas kimi, tənəzzül də əvvəlcə tədricən, sonra isə birdən-birə yerə gəlir. Tarixə keçən 2023-cü il kimi, 2024-cü ilin əsas mövzusu da qlobal hökmranlığın sonunu sürətləndirən imperiyanın gərginliyinin həddini aşması olacaq. Hələ ki, Amerika təhlükəsizlik xidmətləri Qırmızı dənizdən Donbasa, Cənubi Amerikanın cəngəlliklərindən Uzaq Şərqə qədər dünya miqyasında alovlanmaq təhlükəsi yaradan lokal yanğınları çılğınlıqla söndürə bilirlər.
Ancaq işlər necə pis olursa-olsun, onlar həmişə daha da pisləşə bilər. Bəlkə də biz çox tələsdik və unutduq ki, cəmi altı ay əvvəl Priqojinin ildırımsürətli və gözlənilməz üsyanından dərhal sonra Rusiya təhlükəsizlik xidmətləri hərarətlə və yüksək səslə – ya Qərbə xəbərdarlıq olaraq Ukraynaya, ya da birbaşa Qərbin özünə, nüvə zərbəsi endirməyin məqsədəuyğunluğunu müzakirə edirdilər. İstər qlobal, istərsə də daxili böhran hissi gündəlik həyatda o qədər dərin kök atıb ki, “soyuq müharibə”dən bəri ən təhlükəli nüvə eskalasiyası faktiki olaraq diqqətdən kənarda qalıb. Biz şükür etməliyik ki, bu an keçdi, lakin bu, özü-özlüyündə Amerikanın qlobal mövqeyinin zəiflədiyinin sübutudur. Nüvə narahatlığının qısa müddət ərzində alovlanması Kremlin həm daxildə görünməmiş təhlükə gördüyü, həm də Ukrayna Silahlı Qüvvələrinin çoxdan gözlənilən yay əks-hücum əməliyyatı ərəfəsində döyüş meydanında məğlubiyyət riski ilə üzləşdiyi bir vaxtda baş verdi. Ancaq əks-hücum, indi bildiyimiz kimi, bütün gözləntiləri alt-üst etdi və Ukrayna üçün ağrılı uğursuzluğa çevrildi. İndi bəlli olur ki, nüvə müharibəsi riskini azaltmaq üçün Kiyev ən yüksək qiyməti ödəməli olacaq.
Sanki anlaşılmaz şahmat oyununda olduğu kimi, Ukraynada cəbhə xəttləri bu il demək olar ki, dəyişməyib - amma gözləntilər tamamilə dəyişib. Bir il əvvəl hamı razılaşdı ki, Xüsusi Hərbi Əməliyyatın özü artıq Putin üçün strateji məğlubiyyətə çevrilib: onun ordusu gözlənilmədən zəif, döyüş meydanında səmərəsiz olub və 2022-ci ilin payızında Ukrayna Silahlı Qüvvələrinin şimal-şərqdəki hücumları nəticəsində dağılıb. Amma NATO alyansı nəinki daxili fikir ayrılıqları səbəbindən dağılmadı, həm də səfərbər olmaq üçün yeni məqsəd tapdı: Rusiya təhlükəsinə qarşı birləşmək və Ukraynanın hərbi qələbəsi üçün artıq mövcud olan və hələ planlaşdırılmamış böyük miqdarda hərbi texnika göndərmək. İndi bu zəfər hissi çoxdan ötüb geçib. Qərbin qələbə naminə vəd etdiyi sursat istehsalında sıçrayış baş tutmadı və Rusiya nəinki iqtisadiyyatını müharibə vəziyyətinə keçirdi, həm də Qərb şirkətlərini ələ keçirməklə Qərbin sanksiyalarına tutarlı cavab verdi. Yəni nəticə gözləntilərin tam əksinə oldu: Rusiya hücum imkanlarını gücləndirdi və iqtisadi bum yaşadı. Qərb Rusiyaya özünün ümid etdiyi hərbi stimul verdi. Nəticədə, indi Ukraynanı qaranlıq və sərt qış gözləyir. Bu il ötənilkindən daha da pis olacaq.
2023-cü ildə Kiyev və onun Qərbdəki himayədarları ölkənin cənub-şərqində bir güclü həmlə ilə münaqişəni uğurla başa vurmağa ümid edirdilər. Gözlənilirdi ki, o, Rusiyanın müdafiə xəttini yarıb Krım və Qara dəniz sahilləri üzərində nəzarəti ələ alacaq, bundan sonra “təhqir edilmiş” Putin, şübhəsiz ki, sülh danışıqlarına başlayacaq. Lakin bu macəra uğursuzluğa düçar oldu və indi münaqişənin daha canlı mərhələsində Zelenskinin verdiyi cəsarətli proqnozda qələbəyə birbaşa yol yoxdur. Ukrayna qoşunları Rusiyanın artan hücum gücünün qarşısını almaq və onu zəiflətmək ümidi ilə şimal sərhədi boyunca və şərqdəki hazırkı cəbhə xəttinin arxasında tələsik müdafiə xətləri çəkirlər. Eynən bu yaxınlarda NATO-nun himayəsi altında formalaşdırılan Ukrayna Silahlı Qüvvələrinin zirehli briqadalarını məhv edən rus istehkamları kimi. Ancaq Rusiyanın Qərbin səxavətlə bağışladığı silahların “polad dağı yaratmaq uğurunu” təkrarlamaq mümkün olmayacaq. Çünki artıq cəbhəyə həvəslə gedən könüllülər dalğası səngidi. İndi onların yerini inadkar çağırışçılar tutub və belə bir vəziyyətdə Kiyev yalnız sıranı saxlamaq üçün yarım milyon insanı səfərbər etməyi planlaşdırır.
Ukrayna Silahlı Qüvvələrinin komandanı Valeri Zalujnıy Prezident Zelenskinin hərbi əməliyyatların sona çatması ilə bağlı hədsiz nikbin proqnozlarını təkzib edəndə və mövcud vəziyyəti “dalan” kimi səciyyələndirəndə, bu, Kiyevdə daxili siyasi parçalanmanın böyüməsini ortaya çıxardı. Sərt reallıq isə ondan ibarətdir ki, indi təşəbbüs Rusiyaya keçib və Ukrayna yalnız bu gün az qala qələbə kimi görünən sülh danışıqları ümidi ilə döyüşləri dalana dirəyə bilər. Amma indiki vəziyyətdə Moskva öz imkanlarına arxayındır və Ukrayna ərazi və siyasi güzəştlərə getməyincə, onlara maraq göstərməyəcək. Ukrayna buna getsə, bu, artıq kapitulyasiyaya bərabər olacaq.
Əgər Kiyev bundan sonra axmaqlıq edərsə, deməli, hegemon dövlət artıq ona marağını itirər. Çünki Birləşmiş Ştatlar bir neçə onilliklər ərzində bataqlığa düşdüyü və çoxlu resurslar sərf etdiyi Yaxın Şərqlə yenidən diqqətini yayındırır. İsrail həm diplomatik, həm də hərbi cəhətdən Vaşinqtondan asılıdır, lakin bu, Netanyahunun Qəzza zolağındakı cəza müharibəsinə heç bir təsir göstərməyib. ABŞ elçiləri İsraildən hərbi şövqünü cilovlamağı xahiş edir, lakin Netanyahu, əksinə, dərhal hərbi əməliyyatları genişləndirəcəyini bildirir. Amerika strateqləri Ukraynaya görə qiymətli arsenallarının tükənməsindən narahatdırlar, İsrail isə ABŞ-ın bağışladığı hərbi sursatları hədələyici sürətlə atmaqda davam edir. Vaşinqton sursat istehsalını artırana və arsenalını doldurana qədər – bu, illər çəkə bilər – Qəzzaya və ya Ukraynanın şərqinə atılan hər mərmi Amerikanın hərbi gücünü zəiflədir. Nəticədə, bu “mərmi aclığı” yaradacaq və mövcud resurslar ABŞ-ın bütün dünyada hərbi öhdəliklərini yerinə yetirməsi üçün kifayət etməyə bilər. Bu kəsir Amerikanın rəqiblərinə fövqəldövlətə birbaşa meydan oxumaq üçün nadir və gözlənilməz fürsət verir. Çünki bilirlər ki, ABŞ üçün istənilən uzun sürən yüksək intensivli müharibə aparmaq çox çətin olacaq.
Amma istehsal məntiqi, diplomatik təcrid və Qəzzadakı müharibə ilə bağlı daxili narazılıq birləşərək, ABŞ-ı münaqişənin tez bir zamanda həllini axtarmağa məcbur edirsə, hadisələrin məntiqi, əksinə, vəziyyətin daha da gərginləşəcəyinə səbəb ola bilər. Münaqişənin Livana sıçrayacağı riski heç də azalmayıb - əksinə, İsrail şimal sərhədlərində genişmiqyaslı müharibəyə başlamaq üçün bütün imkanları səfərbər edir, çünki minlərlə dinc israilli “Hizbullah”ın qarşılıqlı artilleriya atəşlərinə görə artıq evlərini tərk edib. Eyni zamanda, Yəmənin husilər hərəkatının Qırmızı dənizdə gəmiçiliyi blokadaya alması göstərdi ki, İsrailə getdikcə artan dəstək üçün Qərb ölkələri birbaşa xərclər çəkir və regional güclər daha böyük əminliklə ABŞ-a meydan oxuyurlar.
Husilər Yəmənin mülki əhalisinə fəlakətlər gətirən Səudiyyə Ərəbistanı ilə onilliklərlə davam edən müharibədən zəfərlə çıxdılar. Bu kampaniyalar zamanı Səudiyyə qüvvələri Amerika təyyarələrindən, bombalarından və ABŞ kəşfiyyatının dəstəyindən geniş istifadə etdi, lakin döyüş meydanında heç vaxt uğur qazana bilmədilər. Bununla müqayisədə Birləşmiş Ştatların qısa müddətli cəza bombardmanı riski husilər üçün yəqin ki, məqbul görünəcək. Amerikanın həm ölkədaxili, həm də beynəlxalq aləmdə İsraili dəstəkləməsi kimi qiymətləndiriləcək daha geniş bir münaqişəyə qarışmaq istəmədiyini bilən husilər daha böyük cəsarətlə Amerika donanmasının konvoylarına birbaşa hücum edəcəklər.
İsrailin Qəzza zolağındakı kampaniyası siyasi baxımdan o qədər zəhərlidir ki, hətta Amerikanın NATO üzrə ən yaxın müttəfiqləri belə, Vaşinqtonun Qırmızı dənizin təhlükəsizliyini təmin etmək səylərindən uzaq durmağı üstün tuturlar. Eyni zamanda, yanlış satınalma siyasəti nəticəsində ABŞ Hərbi Dəniz Qüvvələri ticarət yollarının təhlükəsizliyini təmin etmək üçün resursları səfərbər etməkdə çətinlik çəkir - bu, əslində qlobal imperiyanın əsas funksiyasıdır. Amma Birləşmiş Ştatlar hətta “Hizbullah” və ya husilərlə birbaşa döyüşməkdən yayındığına görə İrana zərbə endirmək perspektivi (bu hətta Amerikanın gücünün zirvədə olduğu bir zamanda həddən artıq iddialı məqsəd hesab olunurdu) çox az ehtimal olunur. Bu da öz növbəsində sonrakı risklərə getmək üçün Tehranın iştahını artırır. Birləşmiş Ştatlar nəinki həddən artıq yüklənib və həddən artıq missiyalarla gəmilərini çox istismar edir, həm də kömək etməyə həvəsi olmayan daha zəif müttəfiqlərindən də asılı vəziyyətə düşüb. Nəticədə, biz Qırmızı dənizdə Amerikanın gələcək Sakit okean münaqişəsində özünü necə aparacağına dair müqəddiməni görürük: bu, başqasını olmasa da, Çini çox ilhamlandıracaq.
Nizə zərbələri ilə zəifləmiş yaralı mamont kimi qanı axan “hegemon” dünya səhnəsində səndələdi. Amerika ayrı-ayrılıqda bütün rəqiblərindən güclü qalmasına baxmayaraq, güclü regional rəqiblərə qarşı eyni vaxtda üç böyük münaqişəyə tab gətirə bilməyəcək. Bunun üçün hazırkı siyasi şəraitdə ağlasığmaz səfərbərlik lazımdır. Amerika öz gücünün zirvəsində olanda rəqibləri bölünüb itaətkarcasına oturdular. Birləşmiş Ştatlar qlobal təhlükəsizlik yükünü öz üzərinə götürdü. O zaman bunun çox asanlıqla əldə edilə biləcəyi görünürdü, lakin bunun uzun müddət davam etməsi lazımi sənaye bazasını tükəndirdi. ABŞ səhv seçim etdi, indi isə geri qayıtmaq çətindir. Nəticədə Amerika artıq müdafiə rejiminə keçərək dirçələn rəqiblərdən müdafiə olunmaq və qlobal siyasətin möhtəşəm remeykini mümkün qədər gec təxirə salmaq cəhdi ilə daha yaxşı dövrlərdə əldə etdiyi nailiyyətləri qoruyub saxlamağa çalışır. Lakin Rusiya, İran və ya Çindən fərqli olaraq, Amerikanın demokratik sistemi qısamüddətli planlaşdırmanı stimullaşdırır və liderlərə uğursuzluğa görə məsuliyyəti növbəti administrasiya qismində fəaliyyət göstərəcək rəqiblərin üzərinə atmaq imkanı təklif edir. Bayden administrasiyası artıq siyasi gücünü itirib və 2024-cü ildə, demək olar ki, müəyyən siyasi məğlubiyyətə doğru gedir. Onlar artıq yorğun və fikirləri dağınıq gerontokrat kimi hakimiyyətin sükanı arxasındadırlar. Amerika tarixinin daha erkən mərhələsində hakimiyyətin ötürülməsinin rəvan davam edəcəyi, imperiyanın strateji məqsədlərinin qorunub saxlanmasında lazımi varisliyin təmin ediləcəyi təbii qəbul edilmişdi. 2024-cü ildə belə davamlılığa ümid etmək olmaz. ABŞ-ın hər iki keçmiş seçki dövrü onilliklərin ən pis vətəndaş iğtişaşları və siyasi qeyri-sabitlik dalğaları ilə yadda qaldı. Hər iki partiya və onların bürokratik aparatı daxilindəki fraksiyaları, partiyanın silahı kimi çıxış edən satılmış mətbuatın asanlıqla radikallara çevirdiyi coşan vətəndaşlara arxalanaraq, bir-birinin legitimliyini şübhə altına alırlar. Bu il görünməmiş siyasi ixtilaflar Amerikanı daxildən sarsıdacaq və dünyanın qalan hissəsi imperiya taxt-tacı uğrunda mübarizənin kölgəsində donub qalacaq.
Vaşinqtonda hakimiyyət uğrunda mübarizə təkcə Ukraynanın deyil, həm də bütün NATO alyansının taleyini həll edəcək. Amerikada seçki ilində Netanyahunun yeni ABŞ administrasiyasının daha əlverişli olacağı ümidi ilə İsrailin gələcək təhlükəsizliyini riskə ataraq, öz müharibəsini daha da uzağa aparmaq, hətta onu regional münaqişəyə çevirmək stimulu var. İran, “Hizbullah” və husilər üçün, Yaxın Şərqdə böyük bir münaqişədən qaçmağa çalışan ehtiyatlı Bayden administrasiyasının məhvi eskalasiya üçün ən böyük fürsətdir. Həlledici zərbə vurmaq fürsəti gözləyən Çin üçün optimal vaxt Vaşinqtonun daxili qarışıqlıqlardan ən çox diqqətini yayındırdığı vaxt olacaq – ola bilsin ki, qarşıdan gələn seçki mövsümü bu fürsəti təmin etsin. Bunu əldən vermək olmaz, çünki o bir daha təkrarlanmaya bilər. Bu da öz növbəsində Tayvanın ələ keçirilməsini sürətləndirəcək.
Son onilliklər ərzində dünya özünün ən təhlükəli dönəmini yaşayır və hər bir teatrda baş verən hadisələrin məntiqi gərginliyin bu ilə də adlayacağını vəd edir. 2024-cü ildə ABŞ-ın gərgin daxili çəkişmələri Amerika imperiyasının qənimətləri uğrunda gedən qanlı dünya mübarizəsi ilə böyük rezonans doğuracaq. Ötən 2023-cü il qlobal münaqişələr səbəbindən qana bulanmış və insan iztirabları ilə müşayiət olunan çətin bir il oldu. Ancaq geriyə baxsaq, biz, bəlkə də, o ili qorxulu fırtınaların hələ üfüqdə olduğu il və dünya nizamının qızıl payızı kimi xatırlayacağıq. Bu il tarixi il olacaq və biz ondan qorxmaqda həqiqətən haqlıyıq.
Aris Roussinos,
“UnHerd”, Böyük Britaniya
Tərcümə etdi:
İlqar RÜSTƏMOV
XQ