“Xiaomi” şirkəti Çində növbəti təqdimatını keçirərək özünün ilk elektrik avtomobilini – “SU7” və “SU7 Max” markalarını təqdim edib. Bu barədə “Rozetked” portalı xəbər verib.
Bildirilib ki, “Xiaomi SU7” elektrik avtomobili “Tesla Model 3” və “Porsche Panamera” modellərinə bənzəyir. Bu da səbəbsiz deyil. Onun dizaynını bəzi BMW, “Mini” və “Rolls-Royce” modelləri üzərində işləmiş tanınmış rəssam Kris Benql hazırlayıb. Başlanğıcda alıcılara üç rəngdə elektrik avtomobilləri təqdim edilir: mavi, boz və yaşıl. Bu markalı avtomobillərdə modifikasiyasından asılı olaraq 3 fərqli “Xiaomi” markalı mühərrikdən istifadə edilir: “Super Motor V6” (299 at gücü), “Super Motor V6s” (374 at gücü) və “Super Motor V8” (578 at gücü).
Şirkətdən bildirilib ki, “Super Motor “V8”ə malik SU7 versiyası 265 km/saat sürət yığır. Onun sıfırdan 100 km/saat sürət yığması üçün isə 2,78 saniyə kifayət edir .
“SU7”nin bütün versiyaları 101 kVt/saatlıq özəl “Xiaomi” batareyası ilə təchiz edilib. Bir dəfə elektrik yüklənməsi ilə 800 kilometr yol gedə bilir. Yeni elektrik avtomobillərinin “Hyper Charge” sürətli enerji doldurma dəstəyi var. 15 dəqiqə kifayətdir ki, onlara 510 kilometri qət etmək üçün “yanacaq doldurulsun”. “Xiaomi” şirkəti qiyməti və satışların başlama tarixini açıqlamayıb.
P.ƏFƏNDİ
XQ