Qərbi Afrika Ölkələrinin İqtisadi Birliyinin (EKOVAS) sammiti avqustun 10-da başa çatdı. Görüşün yekununda üzv ölkələrin qərargah rəislərinə ehtiyat qüvvələrini dərhal hazır vəziyyətə gətirmək barədə tapşırıq verildi. EKOVAS ölkələri, həmçinin Nigerdəki böhranın həlli üçün bütün variantları nəzərdən keçirməyə davam etdiklərini də təsdiqlədilər. Yekun kommünikedə vurğulanır ki, “Nigerdə konstitusiya quruluşunun bərpası üçün bütün variantlar masadadır”. Bu o deməkdirmi ki, Nigerə hərbi müdaxilə olacaq?
EKOVAS sammiti Nigeriyanın paytaxtı Abucada keçirildi. Qeyd etmək yerinə düşər ki, Nigeriya ilə Niger arasında sərhədin uzunluğu təxminən min kilometrdir. On beş ölkənin üzv olduğu EKOVAS-da hərbi çevrilişlər baş verəndən sonra Burkino-Fasonun, Malinin və Qvineyanın üzvlüyünün dayandırıldığı vurğulanır. İyulun 30-da Nigerdəki vəziyyətlə bağlı keçirilən ilk sammitdə EKOVAS liderləri Nigerdəki qiyamçılara qarşı sanksiyalar tətbiq etmək qərarına gəldilər: ölkələr Nigerlə sərhədlərin bağlandığını və hava nəqliyyatına qadağa qoyulduğunu elan etdilər. Bundan başqa, Nigerlə bütün maliyyə əməliyyatları dayandırıldı. Eyni zamanda, birlik 2021-ci ildə seçilən və 26 iyul çevrilişi nəticəsində hakimiyyətdən kənarlaşdırılan prezident Məhəmməd Bazumun hakimiyyətini bərpa etmək üçün hərbi müdaxilə ilə hədələdi. Ancaq qiyamçılar ultimatumu yerinə yetirmədilər.
Avqustun 8-də icma nümayəndələrindən ibarət heyət Nigerin paytaxtına gəlmək istəsələr də, qiyamçı hərbçilər son anda onları qəbul edə bilməyəcəklərini bildirdilər. Amma avqustun 7-də qiyamçılar ABŞ dövlət katibinin müavini Viktoriya Nulandla görüşməyə razılıq vermişdilər. Xanım Nuland Niger paytaxtında qiyamçıların nümayəndəsi general Mussa Salau Barmo və üç polkovniklə görüşdü. İki saatdan çox “son dərəcə səmimi və bəzən çətin” söhbətlər keçirdiyini və bunu telefonla jurnalistlərə söyləyən ABŞ dövlət katibinin müavini dedi ki, “Biz onlara söhbəti davam etdirmək üçün bir neçə variant təqdim etdik və ümid edirik ki, bu işdə bizə dəstək olacaqlar”. Maraqlıdır ki, xanım Nulandın danışıqlar apardığı Mussa Salau Barmonun uzun illər ABŞ ordusu ilə əməkdaşlıq etdiyi, okeanın o tayında təlim keçdiyi məlumdur.
Avropa İttifaqı EKOVAS-ın mövqeyini tamamilə bölüşür. Xatırladaq ki, Brüssel çevrilişini dərhal pislədi və qiyamçıları tanımadığını və tanımayacağını da bildirdi. Aİ Nigerə qarşı sanksiyalar tətbiq etməyə tələsmir, ancaq təhlükəsizlik sahəsində əməkdaşlığı və onun maliyyə dəstəyini (2021-ci ildən 2024-cü ilə qədər 554 milyon dollar) dondurdu. Bununla belə, “Reuters”in mənbəyə istinadən verdiyi məlumata görə, Aİ ölkələri “xunta üzvlərinə qarşı ilk sanksiyaların tətbiqi üçün zəmin yaradırlar”. Bu məsələdə xüsusilə də Fransa canfəşanlıq edir. Paris Nigerlə bağlı siyasətini EKOVAS-ın qərarları ilə uzlaşdırır.
Bəs Nigerə hərbi müdaxilə niyə ləngiyir? Axı EKOVAS buna qədər üzv ölkələrə hərbi müdaxiləyə yol vermişdi. Məsələn, birliyin 1990-cı ildən bəri yeddi hərbi müdaxilə həyata keçirdiyi məlumdur: Liberiya, Sierra Leone, Qvineya-Bisau, Kot-d'İvuar, Mali və Qambiya. Əməliyyatların məqsədləri də fərqlənirdi - seçilmiş liderlərin hakimiyyətə bərpası, islamçılara qarşı mübarizə və vətəndaş barışığını təşviq etmək. 1997-ci ildə Syerra-Leonedə qanuni prezident Əhməd Tejan Kabbahın devrilməsi zamanı EKOVAS hadisələrə müdaxilə etmişdi. Birliyin köməyi ilə Syerra-Leone prezidenti hakimiyyətə qayıtmışdı. Bütün bu hərbi müdaxilələri ona görə həyata keçirmək mümkün olmuşdu ki, birlik üzvləri arasında yekdil mövqe sərgilənmişdi. Ancaq hazırda EKOVAS-da Nigerlə bağlı vahid mövqe yoxdur. Təşkilatda üzvlükləri dondurulmuş Burkina-Faso, Mali və Qvineya Nigerə hərbi müdaxilə olacağı təqdirdə, qiyamçı hərbçilərə yardım edəcəklərini bildirirlər. Nigerlə həmsərhəd olan Əlcəzair də hərbi müdaxiləyə qarşıdır.
Nigeriyada da müdaxilə məsələsində birlik yoxdur. Parlament müdaxiləyə qarşıdır. Yerli ekspertlər də hərbi müdaxilə ideyasını dəstəkləmirlər. Nigeriya mütəxəssisləri vurğulayırlar ki, Nigerə hərbi müdaxilə hərbi və maliyyə itkilərinə səbəb olacaq. Belə deməyə ciddi əsaslar da var. Məsələ ondadır ki, Niger silahlı qüvvələri döyüş təcrübəsinə malikdir və nisbətən yaxşı hazırlıqlıdırlar və bu prosesdə Fransa, İtaliya və ABŞ hərbçiləri də yaxından iştirak ediblər. Nigerin hətta ABŞ hərbçiləri ilə birgə əməliyyatlar keçirdiyi də məlumdur. Bununla belə, Niger bölmələrinin yaxşı təchiz olunmadığı və kifayət qədər zəruri resurslara malik olmadığı bildirilir. “The Military Balance”ın məlumatına görə, 26,2 milyon əhalisi olan Niger silahlı qüvvələrinin şəxsi heyəti 33,1 min nəfərdir. Niger hökumətinin ixtiyarında 24,5 min jandarma və yarımhərbi birləşmələr də var.
“The Wall Street Journal” qəzetinin yazdığına görə, qiyamçıların prezident Bazumun iqamətgahını mühasirəyə almasından altı həftədən az müddət əvvəl amerikalı hərbçilər xanım Nulandın görüşdüyü general Barmanın paytaxtda yerləşən Niamey Hava Bazasında ABŞ Ordusu Xüsusi Əməliyyatlar Komandanlığı komandanı general-leytenant Conatan Braqanı gülümsəyərək qucaqladığı əks olunan fotosunu paylaşmışdılar. Qəzetin istinad etdiyi generalın sözlərinə görə, 2021-ci ildə general Barma Niameydəki evində fransız zabitlərini deyil, amerikalı və ingilisləri dəvət edərək Yeni il şənliyi təşkil etmişdi. Niger generalı Fransanın yerli komandirlərlə məsləhətləşmədən silahlı qruplara qarşı hərbi əməliyyatlar aparmasından narazıdır. Buna görə də, qiyamçıların Fransanın hər hansı vasitəçiliyinə razılıq verməyəcəyi şübhə doğurmur.
Səbuhi MƏMMƏDOV, “Xalq qəzeti”