Rubl dollar qarşısında, təxminən, 0,88 faiz ucuzlaşıb, dollar/rubl pariteti isə 98-ə yüksəlib. Beləliklə, dollar/rubl pariteti 2022-ci il martın 25-dən bəri ilk dəfə olaraq 95-dən yuxarı qalxıb. Bundan sonra Rusiya Mərkəzi Bankı avqustun 10-dan 2023-cü ilin sonuna qədər xarici valyuta almaqdan imtina etmək qərarına gəlib. Bununla rublun ucuzlaşması müvəqqəti dayandırılıb.
Mərkəzi Bank bunu niyə edir və rubla necə kömək edəcək? “Freedom Finance Global”ın analitiki Vladimir Çernov deyib: “Mərkəzi Bank rublun dəyərinin kəskin ucuzlaşmasından narahatdır, çünki bütün idxal malları bahalaşır və bu da tədricən Rusiyada qiymətlərin artmasına səbəb olur. Mərkəzi Bankın əsas vəzifəsi isə inflyasiya ilə mübarizədir. Buna görə də tənzimləyici dolların 98 rubldan yuxarı qalxdığını görəndə, istehlak qiymətlərinin artım tempini sürətləndirməmək qərarına gəldi”.
Mərkəzi Bankın xarici valyuta almaqdan imtina qərarından sonra rublun, həqiqətən, enişi dayandı və bir az möhkəmləndi.
Xatırladaq ki, bu ilin ilk aylarında neft və qaz gəlirləri sanksiyalar səbəbindən azaldığı üçün Rusiya büdcəsi kəsirlə üzləşmişdi. Büdcə kəsirini ödəmək üçün ehtiyatları xərcləmək lazım gəlirdi. Lakin sonrakı aylarda neftin qiyməti qalxmağa başladı. Buna görə də, Mərkəzi Bank avqustun 7-dən ehtiyatları artırmaq üçün yenidən valyuta almağa başladı. Eyni zamanda, Maliyyə Nazirliyi fonddan xarici valyuta satışını davam etdirdi. Bütün valyuta alqı-satqısı əməliyyatları nəzarətdə saxlanıldı. Ona görə də, Mərkəzi Bank bunun rublun məzənnəsinə təsir etməyəcəyini hesabladı. Lakin rublun devalvasiyası tənzimləyicinin fikrini dəyişdirdi.
İndi yalnız valyutanın satışı qalır, alış isə dayandırılıb. Yəni, Rusiya ehtiyat toplayana qədər, ancaq onları xərcləyəcək. Beləliklə, xarici valyuta almaqdan imtina rublu dəstəklədi.
Ekspertlər belə müsbət təsirin uzun müddət davam edəcəyinə şübhə edirlər. Çernov deyib: “Xarici valyutanın alınmasından imtina birjada ona olan tələbi azaltdı. Bu da nəzəri olaraq onun dəyərini aşağı salmalıdır. Beləliklə, Mərkəzi Bank bu gün rublun ucuzlaşmasını dayandırmaq və onun bir dollar üçün 100 rubl olan mühüm psixoloji həddi keçməsinin qarşısını almaq üçün müdaxilələr edib. Ola bilsin ki, rubla daha güclü dəstək üçün növbəti addıma hazırlaşmaq üçün vaxt qazanılıb. 2023-cü ilin üçüncü rübündə dollar/rubl paritetini 93–103 rubl diapazonunda gözləyirik. Dördüncü rübdə büdcə gəlirləri və xərcləri planlaşdırılan hədəflərə cavab verərsə, rubl möhkəmlənə bilər”.
Bəs rublun ucuzlaşması Azərbaycana nə kimi təsir edə bilər? İqtisadçı ekspert Pərviz Heydərov bildirib ki, dollara nisbətdə rubl yeni psixoloji həddə yaxınlaşmaqdadır. ABŞ puluna nisbətən, Rusiya valyutasının tezliklə üçrəqəmli həddədək ucuzlaşacağı da istisna deyil. Artıq Rusiyada 1 dollar almaq üçün 98 rubl ödəmək lazımdır. Son 1 ayda rubl 8 faiz çox dəyər itirib. Əsas ticarət tərəfdaşlarımızla milli valyutaların dəyərsizləşməsi manatın nominal effektiv məzənnəsini möhkəmləndirir. Bu isə qeyri-neft ixracatına təsirsiz ötüşməyə bilər.
Qonşu Rusiya kimi Türkiyənin də milli valyutası dollara nisbətən dəyər itirməkdədir. Türkiyədə lirə də yeni psixloji həddə yaxınlaşmaqdadır. Hazırda 1 dollar 27 lirə ilə dəyişdirilir. Ankaranın yeni iqtisadi siyasətinə rəğmən, milli valyutanın ucuzlaşmasının qarşısını almaq mümkün deyil. Əslində, qısa müddətli dövrdə buna nail olmağın mümkünsüzlüyü öncədən də bəlli idi. Hər iki valyutaya təzyiqlər davam edir. Türkiyədə məzənnənin, sadəcə, orta müddətli dövrdə sabitləşəcəyi gözlənilir. Sanksiyalar isə rublu sıxmaqdadır. Bu baxımdan, Rusiya iqtisadiyyatı ilə bağlı pozitiv olmayan proqnozlar da valyuta bazarına təsirsiz ötüşmür.
Milli Məclisin deputatı Vüqar Bayramov bildirib: Bu ölkələr Azərbaycanın əsas ticarət tərəfdaşlarıdır. Türkiyə Azərbaycanın ümumi ticarət dövriyyəsində və eləcə də qeyri-neft ixracatında ikinci ən böyük tərəfdaşdır.
Qonşu ölkələrin valyuta bazarlarında baş verənlərin manatın məzənnəsinə təsirlərinə gəldikdə isə, xatırlatmaq lazımdır ki, kursun müyyənləşməsində əsas iqtisadi amillər ölkəyə daxil olan valyutanın həcmi, eyni zamanda, dövlət Neft Fondu tərəfindən hərraca çıxarılan valyutanın məbləğidir. Amma xarici tərəfdaşlarımızda milli valyutaların məzənnələri də, əslində, iqtisadi amillərdən biridir.
Azərbaycanda hələ ki, məzənnə rejiminə keçirilməyib. Mərkəzi Bank prosesə birbaşa intervensiya etmək imkanlarını qoruyub saxlayır. Ona görə də bu il manatın məzənnəsinin necə dəyişməsi birbaşa Azərbaycan Mərkəzi Bankının mövqeyindən asılı olacaq.
Nəticə etibarilə, ölkəmiz qonşu Rusiya və Türkiyənin milli valyutalarının ucuzlaşmalarının mənfi təsirlərindən etibarlı şəkildə qorunur.
Pünhan ƏFƏNDİYEV, “Xalq qəzeti”