“ScienceAlert”in verdiyi xəbərə görə, “Rockwell Collins” aerokosmik şirkətinin hazırda təqaüddə olan mühəndisi David Jensen maraqlı layihə ilə gündəmə gəlib. O, asteroid üzərində yeni kosmik stansiyanın və eyni zamanda insanlar üçün koloniya tikilməsi planını təkif edib.
Mütəxəssis tərəfindən hazırlanmış 65 səhifəlik sənədə əsasən, asteroidi ölçüsünə, Yer kürəsinə nə dərəcədə yaxın olmasına və kimyəvi tərkibinə görə seçmək lazımdır. Jensenin fikrincə, bunun üçün ən uyğun obyekt 2003-cü ildə kəşf edilmiş “Atira” asteroididir.
“Atira” 4.8 kilometr diametrə malikdir və onun hətta öz peyki də mövcuddur. Asteroid Günəş sistemində yaşayış zonası (kosmik obyektin səthində suyun maye şəklində mövcud olmasına şərait yaradan kosmik zona) üzrə dövr edir və planetimizdən 1.8 AV (astronomik vahid / 1 AV = 149 597 870 km) məsafədə yerləşir.
Layihədə qeyd edilib ki, asteroiddə insanlar üçün nəzərdə tutulmuş koloniya “kökə” formasında inşa edilməlidir. Birincisi, toroid forma asteroiddə süni cazibə qüvvəsini yaratmaq üçün daha əlverişlidir. İkincisi, bu cür koloniyanın radiasiyadan və mikroölçülü meteoritlərdən qorunması üçün o qədər də çox tikinti materialı sərf olunmayacaq. Üçüncüsü isə, belə stansiyada daha çox yaşayış zonası salmaq mümkün olacaq.
David Jensen tikinti materialı kimi suitələyici şüşədən istifadəni təklif edir. Koloniyanın inşasında robotlardan istifadə olunacaq. Yer kürəsindən “Atira”ya yalnız lazımi təchizat göndərilməldir. Yerdə qalan bütün xammal isə asteroiddən əldə edilməlidir. Lakin stansiyadakı bir neçə robotun və lazımi təchizatdan ibarət yükün minimal kütləsi 8,6 ton ola bilər. Qeyd edək ki, hazırda müasir dövrümüzdə heç bir raket bu qədər yükü bir dəfəyə kosmik obyektə çatdıra bilməz. Lakin 2-3 ildən sonra “SpaceX” şirkətinin “Starship + Super Heavy” sistemi bu gücdə ola biləcək.
Mütəxəssisin hesablamalarına görə, layihə 4,1 milyard dollara başa gələcək. Bu, NASA-nın Aydakı bazaya sərf edəcəyi vəsaitdən (93 milyard dollar) çox azdır. Asteroiddə bu cür koloniyanın inşası 12 ilə yekunlaşa bilər.
Səadət RZAYEVA, “Xalq qəzeti”