Son 200 ildə qlobal istiləşməyə görə insanlar məsuliyyət daşıyır. İndi Yer kürəsi XIX əsrin sonlarında (Sənaye İnqilabından əvvəl) olduğundan 1,1°C və son 100 min ilin istənilən vaxtından daha istidir.
Yüksələn temperatur isə gələcəkdə baş verəcək faciələrin xəbərçisidir. Çünki Yer kürəsi hər şeyin bir-biri ilə əlaqəli olduğu bir sistemdir, bir sahədəki dəyişikliklər digər sahələrdə dəyişikliklərə təsir edir. Hazırda iqlim dəyişikliyinin nəticələrinə şiddətli quraqlıqlar, su çatışmazlığı, güclü meşə yanğınları, dəniz səviyyəsinin qalxması, daşqınlar, qütb buzlaqlarının əriməsi, fəlakətli tufanlar və biomüxtəlifliyin itirilməsi və digərləri daxildir. Məsələn, dəniz səviyyəsinin qalxması və duzlu suyun torpağa təsirləri o həddə çatıb ki, adalarda yaşayan insanlar köçmək məcburiyyətində qalır. Uzun sürən quraqlıq və torpaqların şoranlaşması isə insanları aclıq təhlükəsi ilə üz-üzə qoyur.
Dəniz biomüxtəlifliyi üçün hətta, temperaturun 2 dərəcə istiləşməsi çox risklidir. Çünki, iqlim dəyişikliyi mərcan riflərinin yox olmasına və bəzi balıq növlərinin məhvinə səbəb olur. Nəticədə balıq ovu da azalır.
O insanların səhhətinə də təhlükə yaradır. Çox isti hava səbəbindən ölüm halları artır.
Əsrin sonunadək istiləşmə 2,8°C artacaq
Birləşmiş Millətlər Təşkilatının hesabatlarında qeyd edilir ki, qlobal temperatur artımının 1,5°C-dən çox olmamaqla məhdudlaşdırılması bizə ən pis iqlim təsirlərindən qaçmağa və yaşamaq üçün əlverişli iqlimi saxlamağa kömək edəcək. Bununla belə, hazırkı araşdırmalar göstərir ki, bu əsrin sonunadək qlobal istiləşmə 2,8°C artacaq. Buna ən çox səbəb olan ölkələr Çin, ABŞ, Hindistan, Aİ, İndoneziya, Rusiya və Braziliyadır. 7 ölkə qlobal istixana qazının, təxminən, yarısının səbəbkarıdır.
Su niyə çatışmır?
Su və iqlim dəyişikliyi ayrılmaz şəkildə bağlıdır. İqlim dəyişikliyi dünyanın su ehtiyatlarına kompleks təsir göstərir. Təkcə su qıtlığını deyil, həm də bununla bağlı fəlakətləri (məsələn, daşqınlar və quraqlıqlar) daha da gücləndirir, çünki artan temperatur yağışların yağıntı rejimini və bütün su dövranını pozur, dağlardakı buzları əridir. Bu səbəbdən də buzlaqlarda və qar örtüyündə saxlanılan su ehtiyatları XXI əsr ərzində azalacaq. İri dağ silsilələrinin ərimiş suları ilə təmin olunan bölgələrdə su problemi yaşanacaq. Məsələn, Hind, Braxmaputra və Yantzı kimi bəzi çaylar hələlik Himalaydakı buzlaqların əriməsi hesabına qidalanır. Buzlaqlar isə iqlimin istiləşməsi nəticəsində əvvəlki vəziyyətdə bərpa olunmur və onun sahəsi hər il azalır. 30-40 ildən sonra həmin çaylarda suyun səviyyəsi minimum həddə düşəcək. Bu ərazidə isə dünya əhalisinin ən azı 30 faizi yaşayır.
Amazon meşələrinin sürətlə qırılması və yandırılması isə bu çayın bir çox qollarının qurumasına səbəb olur. Oxşar vəziyyət digər regionlar, o cümlədən Azərbaycan üçün də xarakterikdir.
Ekspertlər qeyd edirlər ki, buzlaqların əriməsi (Antraktida buzlaqları da daxil olmaqla) dənizlərin səviyyəsinin qalxmasına səbəb olur. Bu da qrunt sularının daha da şoranlaşması, sahilyanı ərazilərdə insanlar və ekosistemlər üçün şirin suyun əlçatanlığını azaldır. Bu səbəbdən içməli su çatışmazlığından əziyyət çəkən regionların siyahısı genişlənir.
2 milyard insan sudan əziyyət çəkir
İçməli su mənbyi azaldığı bir vaxtda isə əhalinin sayı artır. Əhali artdıqca suya da tələb artır. Hazırda dünyada təxminən 2 milyard insanın təhlükəsiz içməli suya çıxışı yoxdur və dünya əhalisinin təxminən yarısı ilin müəyyən bir hissəsində ciddi su qıtlığı yaşayır. Bu rəqəmlərin artacağı və tendensiyanın iqlim dəyişikliyi və əhalinin artımı (WMO) ilə daha da şiddətlənəcəyi gözlənilir. Bildirilir ki, 2030-cu ildə planetimizin əhalisinin 47 faizi içməli su qıtlığından əziyyət çəkəcək.
Su qıtlığı, quraqlıq isə birbaşa kənd təsərrüfatına təsir edir. Planetimizin bir çox regionlarında yaşayış şəraitini pisləşdirir, ərzaq qıtlığı yaradır. Proqnozlara görə, 2050-ci ildə qarğıdalı, düyü və buğda məhsullarının istehsalı 25 faizədək azalacaq. Əhalinin sayı isə nəzərdə tutulan dövrdə 9 milyardı keçəcək. Yəni dünyada əhalinin sayı artacaq, su qıtlığı səbəbindən əsas kənd təsərrüfatı məhsullarının istehsalı azalacaq. Çünki istehlak edilən şirin suyun böyük hissəsi – orta hesabla təxminən 70 faizi kənd təsərrüfatında istifadə olunur.
Problemin yaranmasına digər səbəb isə insanların yemək alışqanlığının dəyişməsidir. Bu sizə qəribə gələ bilər. Məsələn, insanlar XXI əsrdə daha çox ət yeməyə başlayıblar. Bu zaman bir kiloqram ət istehsalı üçün tələb olunan suvarma suyunun həcmi 1 kiloqram meyvə yetişdirmək üçün tələb olunandan 7 dəfə çoxdur. Artan əhalinin bəslənməsi üçün fermerlər 60 faiz daha çox su istifadə etmək məcburiyyətindədir.
Üçüncü dünya ölkələrində sənayeləşmə və kənd təsərrüfatının kortəbii inkişafı və onların maliyyə mənbələrinin məhdudluğu problemi daha da ağırlaşdırır. Bu gün Hindistan və Braziliyada 1 kiloqram taxıl yetişdirmək üçün ABŞ və Çindən iki dəfə çox su istifadə olunur.
Ölkələrin həm də sənayesi sürətlə inkişaf edir. Aydındır ki, suya da tələbat artır.
Səhralaşma prosesini də sürətləndirir
Su çatışmazlığı və onun yaratdığı quraqlıq isə yaşayış məskənlərini tədricən “cəhənnəmə” çevirir, səhralaşma prosesini sürətləndirir. Qlobal iqlim dəyişikliyi on milyonlarla insanı inkişaf etmiş ölkələrə miqrasiyasına təkan verir. Transsərhəd suları və su çatışmazlığı tədricən siyasi-iqtisadi təzyiq vasitəsinə çevrilir.
Bir sözlə su, yaxın dövrdə neftdən baha olacaq və hətta müharibələrə səbəb ola bilər. Bu, günün reallığıdır. Hətta havadan tes-tez barıt iyi gəlir. Məsələn, Nil çayının aşağı axında yerləşən və su ehtiyacının 90 faizindən artığını həmin çaydan təmin edən Misir Efiopiyanın Mavi Nil çayı üzərində tikdiyi su anbarı səbəbindən çox ciddi su və qida böhranı ilə üzləşəcəkdir.
Qahirə Nil çayının su həcmində hər hansısa bir dəyişikliyi “qırmız xətt” kimi görür. Çünki bu ölkə ərazisinin cəmi 3 faizini təşkil edən əkinə yararlı torpaqlarının ən azı 35 faizini itirməsi ilə nəticələnə bilərdi. Bu da 100 milyondan artıq əhalisi olan ölkə üçün fəlakətə çevrilərdi. Hətta bu vəziyyət Misirlə Efiopiya arasında az qala müharibəyə səbəb olacaqdı. Qahirə birbaşa müharibəyə girməsə də Efiopiya üsyançılarına hərtərəfli hərbi yardım göstərirdi.
Hazırda iki ölkə arasında müharibə təhlükəsi bu gün də qalmaqdadır.
İordan çayının içməli suyu İsrail, Fələstin, İordaniya və hətta Suriya arasında, Dəclə və Fərat çaylarının içməli suyu isə Türkiyə, İraq və Suriya arasında gələcəkdə ciddi problem yaradacaq. Bu cür nümunələr isə kifayət qədər çoxdur. Yalnız bir neçəsini xatırlatdıq. Göründüyü kimi, dünya ölkələri üçün bir əcəl zəngi o qədər uzaqda deyil.
Kimin nə deməsindən asılı olmayaraq, hazırda dünyada su qıtlığı özünü ciddi şəkildə göstərir. Unutmayaq ki, dünyada əhalinin sayı sürətlə artır, kənd təsərrüfatı və sənaye inkişaf edir, şəhərləşmə prosesi gedir, iqlim dəyişir, amma su mənbələri azalır. Su problemi beynəlxalq əməkdaşlıq yolu ilə həll olunmalı və bütün ölkələr qlobal su problemini birlikdə həll etməlidir. Hələ ki, gec deyil.
Gələcək inkişaf ilk növbədə ekoloji problemlərin, o cümlədən su probleminin həll olunmasından asılı olacaq. İndi hərəkətə keçilməlidir ki, sonralar milyardlarla vəsait xərclənməsin.
Pünhan ƏFƏNDİYEV, “Xalq qəzeti”