Fransa Prezidenti Emmanuel Makron ABŞ və Avropa İttifaqının köməyi ilə ölkəsinin Nigerə təsir imkanlarını qaytarmağa çalışacaq.
Bu barədə “İzvestiya”ya Rusiya Elmlər Akademiyasının Avropa İnstitutunun Fransız Araşdırmaları Mərkəzinin rəhbəri Yuri Rubinski bildirib.
Ekspert qeyd edib ki, Afrikada uğursuzluqlar göz qabağındadır, lakin onlar Makron hakimiyyətə gəlməmişdən əvvəl başlayıb: “Fransa ordusu Nigerdə yerli hakimiyyət orqanları ilə, ilk növbədə silahlı qüvvələrlə müəyyən münaqişələrə səbəb olub. Malidə, Burkina-Fasoda, Qvineyada hərbi çevrilişlər olub. Makron ABŞ və Aİ ölkələri ilə birlikdə Afrikadakı mövqeyini bir qədər yaxşılaşdırmağa çalışacaq”.
Rubinskinin sözlərinə görə, Makronun ölkənin Afrika qitəsində mövcudluğunu gücləndirə biləcəyini söyləmək hələ tezdir, xüsusən də fransızdilli Afrikanın Fransanın xarici ticarətindəki payı 5 faizə qədər azalıb.
O, diqqətə çatdırıb ki, fransalı seçicini Fransanın Afrika ilə əlaqələri deyil, Afrika ölkələrindən mühacir axını narahat edir. Bu, əlbəttə ki, Afrikada Fransanın təsirinin bərpası üçün kifayət deyil. Afrika siyasətinin çatışmazlıqlarına yenidən baxmaq üçün səylərin göstəriləcəyi istisna olunmasa da, nəticəni proqnozlaşdırmaq hələ tezdir.
Beləliklə, Nigerdə iyulun 26-da baş vermiş hərbi çevrilişdən bir həftə yarım keçsə də, ölkənin yeni hakimiyyətinin qonşuları, Qərbi Afrika Ölkələri İqtisadi Birliyinin dövlətləri ilə münasibətlərinin necə olacağı hələ də bəlli deyil. Nigerin paytaxtı Niamey isə Parislə yeni əsaslarla əlaqələr qurmağı planlaşdırır. Afrika ölkəsinin əhalisinin hərbçiləri dəstəkləməsi respublika vətəndaşlarının artıq fransızlara ehtiyac duymadıqlarını göstərir. Bundan əvvəl müxtəlif siyasi qüvvələri təmsil edən 94 fransız senatorunun Makrona açıq məktub imzaladığı və Parisin Afrika siyasətinin iflasa uğradığını elan etdiyi bildirilmişdi.
İşğalçı ölkədən, onun şirkətlərindən və ordusundan imtina edən Nigerdə anti-Fransa nümayişləri davam edir. Nigerin iqtisadiyyatına heç vaxt kömək etməyən Fransanın ondan həmişə oğurluq etməsi ilə bağlı fikirlər artıq daha ucadan səsləndirilir.
Əlcəzairi 132 il, Tunisi 75 il, Mərakeşi 44 il, Mavritaniyanı 60 il işğal altında saxlayan Fransanın müxtəlif xalqlara qarşı törətdiyi soyqırımları tarixin ən qanlı və dəhşətli səhifələrindəndir. Bu gün də bu ölkənin xarici siyasətinin əsas istiqamətinin milli, dini, irqi ayrı-seçkilik təşkil etməsi ona qarşı dünyanın hər yerində etirazları artırır.
Leyla QURBANOVA, “Xalq qəzeti”