Ukraynada ağır döyüşlər davam edir. Gün ərzində 40 hərbi toqquşma olub. Hazırda Ukrayna əsgərlərinin yaxşı hazırlanmış Rusiya müdafiə xəttini yarması çətindir.
Bu barədə NATO-nun baş katibi Yens Stoltenberq Almaniyadakı hərbi sənaye müəssisələrindən birinə səfəri zamanı bildirib: "Əks-hücum hələ ilkin mərhələdədir. Biz bilirik ki, ukraynalıları çətin yol gözləyir. Onlar Rusiyanın ciddi müqaviməti ilə üzləşirlər. Rusiya hərbçiləri minalanmış sahələr, tank əleyhinə səngərlər və “əjdaha dişləri” ilə müdafiə xətləri çəkiblər. Ukrayna Silahlı Qüvvələrinə onların öhdəsindən gəlmək üçün müasir texnika lazımdır. Əgər alyans Ukraynada uzunmüddətli münaqişəyə hazır olmaq istəyirsə, ilk növbədə, etibarlı müdafiə sənayesinə diqqət yetirməlidir. Bu qarşıdurma getdikcə “logistika döyüşü”nə çevrilir”.
Yens Stoltenberq Almaniyanın müdafiə naziri Boris Pistorius ilə birgə bəyanatında deyib: “Ən önəmlisi avadanlıqları, dəstək və müxtəlif tip sistemləri təmir edə bilən uzunmüddətli etibarlı müdafiə sənayesinə malik olmaqdır”.
Ukrayna Silahlı Qüvvələrinin əks-hücum zamanı ciddi müqavimətlə qarşılaşdığını bu ölkənin dövlət başçısı Volodimir Zelinski və müdafiə nazirinin müavini Anna Malyar da təsdiq edir. Zelinski deyib: “Döyüş meydanında irəliləmə istədiyimizdən daha yavaş gedir”.
Anna Malyar isə öz Telegram kanalında bildirib ki, ölkə silahlı qüvvələri əks-hücum əməliyyatları zamanı çətinliklərlə üzləşir və bu, Ukrayna hakimiyyətinin istədiyi qədər sürətlə getmir: “Aydındır ki, insanlar filmdəki kimi olmasını istəyirlər - montaj, çox tez, saat 13:00-da film başladı və 1 saat 20 dəqiqədən sonra bitdi. Və nə baş verdiyi aydındır”. Onun qeyd etdiyi kimi, "həyatda belə olmur və müharibə tamamilə fərqli bir vəziyyətdir. Ukrayna Silahlı Qüvvələri şiddətli müqavimətlə qarşılaşır, çətinliklərlə, tədricən irəliləyir”.
Yüksək çinli xanım Ukrayna ordusunun əks-hücumunun təsirliyini yalnız irəliləyə bildiyi kilometrlərlə və ya işğaldan azad olunmuş yaşayış məntəqələrinin sayı ilə qiymətləndirməyin düzgün olmadığını bildirib: “Hücumun nəticələrini qiymətləndirmək üçün bir çox meyarlar var. Ukrayna hərbçilərinin qarşısında bir çox vəzifələr qoyulub. Bunlar yerinə yetirilməlidir. Hücumun başladığı bütün istiqamətlərdə, az da olsa, irəliləyiş var. Ordusunun əsas zərbəsi isə hələ qabaqdadır”.
Anna Malyar bildirib ki, bir sıra ərazilərdə Ukrayna Silahlı Qüvvələrinin döyüşçüləri hücum əməliyyatı keçirir, digər ərazilərdə isə müdafiəyə keçərək Rusiya ordusunun hücumunun qarşısını almağa çalışırlar.
Rusiya tərəfi isə əks-hücum zamanı Ukrayna ordusunun böyük itkilər verdiyini bildirir. İyunun 13-də hərbi komandirlərlə görüşündə Vladimir Putin Ukrayna qoşunlarının hücum zamanı böyük itkilər verdiyini və heç bir istiqamətdə uğur əldə etmədiyini söyləyib. İyunun 20-də Dövlət Dumasının Müdafiə Komitəsinin rəhbəri Andrey Kartapolov isə bildirib ki, Ukrayna Silahlı Qüvvələrinin əks-hücumunun dəf edilməsi “3 həftəyə” başa çatdırıla bilər. Bundan sonra, deputatın qeyd etdiyi kimi, Rusiya qüvvələri özləri “fəal hərəkətlərə” keçəcəklər.
Hazırda Rusiya hərbçiləri əsas səylərini şiddətli döyüşlərin getdiyi 4 istiqamətdə: Limanski, Baxmut, Avdeyevski və Maryinskidə cəmləşdirir. Bu istiqamətlərdə ağır döyüşlər davam edir. Bundan başqa, Rusiya Krımın müdafiəsini gücləndirməyə başlayıb. Armyansk şəhərindən 3,5 kilometr şimalda Krımı Xerson vilayəti ilə birləşdirən dar körpünün üzərində uzunluğu 9 kilometr olan geniş müdafiə zonası qurub. Rusiya üçün əsas məsələ yarımadaya nəzarətdir.
Ukraynanın Yujno-Donetsk, Zaporojye və Artyomovsk istiqamətlərində əks-hücum əməliyyatı iyunun 4-də başlayıb. Eyni zamanda, Ukrayna Silahlı Qüvvələrinin əsas zərbəsi cəbhənin Zaporojye istiqamətində cəmləşib. Kiyev NATO mütəxəssisləri tərəfindən təlim keçmiş və Qərb texnikası ilə silahlanmış briqadaları döyüşə atıb.
Rəsmi Kiyevin mövqeyinə görə, müharibə Ukraynanın bütün torpaqlarının, o cümlədən Krımın azad olunması ilə başa çatmalıdır. Bu planın həyata keçməsi üçün Qərbin hərbi yardımları davam edir. Artıq ABŞ Ukraynaya yeni hərbi yardım paketini elan edib. Bu paketin həcmi 1,3 milyard dollardır. Əvvəl də Vaşinqton Ukraynanı nə qədər lazımdırsa, dəstəkləməyə hazır olduğunu söyləmişdi.
Xatırladaq ki, bu müharibədə Rusiya tərəfi 222 minə yaxın hərbçisini itirib.
Pünhan ƏFƏNDİYEV,
“Xalq qəzeti”
