Ankaradakı nüfuzlu düşüncə məbədi olan Avrasiya Araşdırmalar Mərkəzinin (AVİM) ən çox önəm verdiyi obyekt Qafqazdır. Qurum xüsusilə Ermənistanın regionda yaratdığı münaqişələrin səbəb və nəticələrini təhlil edir. Müsahibimiz AVİM-in direktoru, səfir Alev Kılıçdır.
– Cənab səfir, Azərbaycanın Qarabağ iqtisadi rayonunda yaşayan ermənilər ölkənin digər vətəndaşları ilə eyni hüquqlara malikdirlər. 1988-ci ildə Ermənistandan zorla qovulmuş Qərbi azərbaycanlılar da öz vətənlərinə qayıtmaq, öz ata-baba yurdlarında yaşamaq hüquqlarını bərpa etmək istəyirlər. Bu məsələ haqqında sizin mövqeyinizi bilmək istərdik.
– Erməni siyasətçiləri və separatçı rejimi müdafiə edənlər beynəlxalq ictimai rəyə qarşı təbliğat aparırlar ki, Azərbaycan ancaq torpaqlara yiyələnməkdə maraqlıdır, ermənilərin o torpaqlarda yaşamasını istəmir. Lakin bu iddialar təbii olaraq indiki Ermənistanda, İrəvanda, Zəngəzurda yaşayan Azərbaycan türklərini yada salır. Bu gün o ərazidə türkün qalmadığını görürük. Təbii ki, buradan belə qənaətə gəlmək olar ki, Ermənistan özü yalnız torpağı qəsb etməklə maraqlanır və həmin yurd yerlərinin əzəli sahibi olan türklərin orada yaşamasını istəmir.
“Türksüz Ermənistan” siyasəti, Qərbi azərbaycanlıların ən son 1988–89-cu illərdə öz torpaqlarından zorla çıxarılması bunun ən bariz nümunəsidir. Ona görə də regionun tarixinə nəzər saldıqda, açıqlanmayan çoxlu məsələlərin olduğu və beynəlxalq ictimaiyyətin bu məsələləri o qədər də yaxşı bilmədiyi görünür. Bu baxımdan Prezident İlham Əliyevin açıqlamaları beynəlxalq ictimaiyyətə medalın digər üzünün olduğunu göstərir. Azərbaycan işğal altında olan torpaqlarını azad etməklə tarixi ədalət bərpa olundu. Mən inanıram ki, Qərbi azərbaycanlılar da öz ata-baba torpaqlarına nəinki geri qayıdacaq, bu illər ərzində onlara vurulan maddi-mənəvi zərərin də haqqını Ermənistan dövlətindən geri alacaqlar.
– Biz Türkiyə mətbuatını araşdırarkən 26 fevral 1992-ci il Xocalı qətliamının o dönəm KİV-də kifayət qədər işıqlandırılmasına rast gəlmədik. Sizcə, bunun səbəbi nə ola bilər?
– Əslində, Türkiyə bu prosesləri yaxından izləyib. Sovet İttifaqı dağılarkən Ermənistanın dəstəklədiyi separatçı silahlı birləşmələrin Qarabağda Azərbaycan türklərinə qarşı həyata keçirdikləri qırğınlar hər zaman Türkiyəni yaxından maraqlandırıb. Ancaq o dövrdə Sovet İttifaqının parçalanması prosesi ilə bağlı informasiya axınında müəyyən fasilələr yaranmışdı. Bölgədən daha müfəssəl xəbərlər və fotolar gələndən sonra Türkiyə ictimaiyyəti Xocalı hadisələrinin ağırlığından, mahiyyətindən xəbər tutdu.
Xocalı qətliamı mətbuat və media orqanlarının işıqlandırılması ilə dünyanın gözü qarşısında baş verən faciə kimi tarixə düşdü. Azərbaycan türklərinin Qərbi Azərbaycanda, Zəngəzurda, Qarabağda, Xocalıda, Ağdamda yaşadıqları bütün faciələr Türkiyə və Azərbaycan xalqlarının ortaq ağrısı kimi yaddaşlara həkk olundu.
– Xocalı soyqırımı, Qarabağ mövzusu sizin qurumun tədqiqat obyektidirmi?
– Yalnız Xocalı və Qarabağla bağlı deyil, Zəngəzur məsələsi, Birinci və İkinci Qarabağ müharibəsi, savaşdan sonrakı proseslər üzrə analizlər aparırıq. Ümumiyyətlə, AVİM-in tədqiqat apardığı sahələr arasında Qafqaz regionuna xüsusi diqqət ayrılıb. Bu coğrafiya ilə bağlı elmi məqalələr dərc olunur. Bundan əlavə, AVİM-in nəzdində Ermənistan üzrə araşdırmalar var, “Erməni araşdırmaları icmalı” (Review of Armenian Studies), “Beynəlxalq Cinayətlər və Tarix” (International Crimes and History) akademik jurnallarımız da nəşr olunur. Həmin nəşrlərdə bu sahələr üzrə ekspertlərin təhlilləri, məqalələri yer alır.
– Qarabağ iqtisadi rayonunda, Rusiya sülhməramlılarının müvəqqəti yerləşdirildiyi ərazidə Azərbaycanın təbii sərvətlərindən qeyri-qanuni istifadə olunur. Bunun qarşısının alınması üçün Azərbaycan Ekologiya və Təbii Sərvətlər Nazirliyinin və “AzeriGold” şirkətinin ekspertləri araşdırmalar aparmalıdırlar. Buna imkan verilmədiyi üçün azərbaycanlı fəallar 2022-ci il dekabrın 11-dən Laçın dəhlizində etiraz aksiyası keçirirlər. AVİM rəhbəri kimi, bu məsələlər haqqında fikirləriniz maraqlıdır...
– Ermənistanın 30 ildir regionda davam etdirdiyi işğal Azərbaycanın iqtisadi və təbii sərvətlərinin böyük bir hissəsindən yararlana bilməməsinə, Ermənistanın isə haqsız qazanc əldə etməsinə səbəb olub. Qarabağda və onun ətrafında yerləşən qızıl və mis mədənləri illərlə erməni separatçıları tərəfindən istismar edilib. Bu o deməkdir ki, Azərbaycan üçün ciddi iqtisadi resurslar istifadə oluna bilməz. Digər tərəfdən, bu vəziyyətin başqa təsiri də var. Erməni separatçıları bu resurslardan istifadə etməklə nəinki qazanc əldə edirdilər, həm də işğallarını davam etdirmək üçün maliyyə imkanları qazanırdılar. Ona görə də bu mədənlərin istismarında şərik olan Qərb şirkətləri dolayısı ilə Azərbaycan torpaqlarında işğalın maliyyələşdirilməsinə kömək edirlər.
Digər tərəfdən, illərdir yerüstü və yeraltı su ehtiyatlarının çirklənməsi ilə bağlı Azərbaycanın çox ciddi narahatlıqları var. Çünki Azərbaycanın istifadə etdiyi suyun əhəmiyyətli bir hissəsi Zəngəzur bölgəsindən keçərək Azərbaycana çatır. Bundan əlavə, Azərbaycan tərəfi peyk görüntülərinə əsaslanaraq, mis mədənlərinin fəaliyyətinin təbii həyata və meşələrə böyük ziyan vura biləcəyini bildirir.
Məlum olduğu kimi, suverenlik hüququ dövlətin ərazisini və onun sakinlərini əhatə edən ən fundamental faktordur. Öz ölkəsinin hüdudları daxilində həyata keçirilən bütün fəaliyyətlər barədə məlumatlar alması Azərbaycanın suveren haqqıdır. Ancaq bu məqamda Azərbaycan tərəfin müxtəlif maneələrlə qarşılaşdığını görürük. Təbii ki, belə bir maneə də ictimaiyyətdə haqlı olaraq reaksiyalar yaradır və etirazlara səbəb olur.
– Sizcə Ermənistanın törətdiyi müharibə cinayətlərinin beynəlxalq hüquq çərçivəsində öz həllini tapması üçün Azərbaycan – Türkiyə müttəfiqliyi hansı rol oynaya bilər?
– Qarabağda baş verənlər tarixən də, bu gün də erməni separatçılarının təkbaşına təşkil edə biləcəyi hadisə deyil. Əslində, separatçıların, xüsusən də Ermənistan dövlətindən fərqli dəstək alması, beynəlxalq ictimaiyyətin baş verənlərə səssiz qalması hamıya məlumdur. Ermənistan illərdir məsuliyyəti öz üzərinə götürməkdən yayınsa da, 2020-ci ildə Qarabağ işğaldan azad edildikdən sonra imzalanan müqavilə bu ölkənin münaqişənin birbaşa tərəfi olduğunu etiraf etməsi deməkdir.
Xocalıda baş verənlər tarixə qara ləkə kimi düşüb və insanlığa qarşı cinayətdir. Bu, Türkiyə ilə Azərbaycanın ortaq ağrısıdır. Türkiyə Azərbaycanın bu məsələlərdə haqqını sübut edəcək və ədalətin təmin olunmasına xidmət edəcək hər addımda həmişə olduğu kimi, yenə də qardaş ölkənin yanında olmağa davam edəcək. Ümid edirəm ki, Ermənistanın, bütövlükdə, Azərbaycan dövlətinə vurduğu ziyan – xüsusən Xocalı soyqırımı, Qarabağ məcburi köçkünlərinin pozulmuş haqları beynəlxalq hüquq çərçivəsində öz həllini tapacaq.
M.SULTANOVA,
Ankara