Ermənistan Azərbaycanın sülhlə bağlı irəli sürdüyü humanist şərtlərə əməl etməkdən boyun qaçırmaqda davam edir.
Rəsmi İrəvan həyasızcasına aksiyaların Azərbaycanın siyasi hakimiyyəti tərəfindən təşkil olunduğunu, yolun blokadaya alındığını və bölgədəki erməni əhalisinin humanitar böhran yaşadığını iddia edir. Reallıqda qarşı tərəfin səsləndirdiyi iddiaların heç bir əsası yoxdur. Bu aksiyalar ermənilərin Rusiya sülhməramlı kontingentinin müvəqqəti xidmət apardığı Azərbaycan ərazilərində yerləşən faydalı qazıntı yataqlarının qeyri-qanuni istismarı, sərvətlərimizin talanması, ekologiyaya ziyan vurulması ilə əlaqədar keçirilir. Aksiya iştirakçıları vətəndaş mövqeyi ortaya qoyaraq, qeyri-qanuni fəaliyyətlərin dayandırılmasını tələb edirlər.
Məsələ ilə əlaqədar Xarici işlər naziri Ceyhun Bayramov BMT Baş katibinə ünvanlandığı məktubda bildirir ki, Laçın yolu ilə hərəkətin heç bir nəzarət olmadan həyata keçirilməsi qeyri-mümkündür. Bir qrup azərbaycanlı ekofəalın Xankəndi–Laçın yolunda keçirdiyi etiraz aksiyasının, guya, “Azərbaycan hökuməti tərəfindən təşkil olunduğu” və “Azərbaycanın təbii qazın və digər kommunal xidmətlərin verilməsinə mane olduğu” barədə Ermənistanın iki əsas iddiasının Beynəlxalq Ədalət Məhkəməsi tərəfindən rədd edilməsi faktı məktubda diqqətə çatdırılır.
Bu qərar bir daha sübut edib ki, Azərbaycan hökuməti vətəndaş cəmiyyəti nümayəndələrinin Laçın yolunda etiraz aksiyası ilə bağlı heç bir məsuliyyət daşımır və onların legitim etiraz hüquqlarının qarşısının alınmasına məcbur edilə bilməz. Bununla yanaşı, məhkəmə Ermənistanın yoldan “azad istifadə” etmə tələbini dəyişdirməklə, əslində, Laçın yolundan hərbi və iqtisadi məqsədlər üçün sui-istifadə edilməsinə qarşı olduğunu diqqətə çatdırıb.
Məktubda ermənilərin Laçın yolundan sui-istifadə halları diqqətə çatdırılır və Azərbaycanın səlahiyyətləri çərçivəsində yoldan istifadənin təhlükəsizliyinə zəmanət verdiyi nə Azərbaycan hökumətinin, nə də etirazçıların yolda hərəkətə maneçilik törətmədikləri vurğulanır. Məktubda, həmçinin Beynəlxalq Qızıl Xaç Komitəsinin və Rusiya sülhməramlı kontingentinin humanitar təyinatlı avtomobillərinin keçidi barədə məlumat təqdim edilir. Qeyd olunur ki, avtomobillərin yoldan istifadəsinin “blokada” və “gərgin humanitar böhran” vəziyyəti barədə iddiaların əsassız olduğu bildirilir.
Laçın yolundan istifadənin qanuni və şəffaf olması, yoldan sui-istifadə hallarına yol verilməməsi, bu səylərin tərkib hissəsi kimi, Laçın yolunun başlanğıcında sərhəd-nəzarət keçid məntəqəsi yaradılması təklifi məktubda xüsusi olaraq vurğulanır. Ermənistanın bu təklifdən heç bir əsas gətirmədən imtina etməsinin İrəvanın Laçın yolunda şəffaflıqda maraqlı olmadığını və sui-istifadə hallarını davam etdirmək niyyətinin göstəricisi olduğu diqqətə çatdırılır.
Dünyanın aparıcı KİV-i də erməni yalanlarını ifşa edir, Laçın–Xankəndi yolunda etiraz edən azərbaycanlıların tələblərinin yerinə yetirilməsinin beynəlxalq hüququn prinsiplərinə uyğun olduğunu yazırlar. Beynəlxalq ictimaiyyət məsələnin mahiyyətindən xəbərdardır, ermənilərin məkrli planlarından əl çəkməsini tələb edir.
Nihat ƏLİYEV,
politoloq-iqtisadçı:
– Gənclər gecə-gündüz qara, çovğuna məhəl qoymadan Laçın yolunda ölkəmizin milli maraqları naminə ayaqdadırlar. 2020-ci ildə Vətən müharibəsində xalqımıza Böyük Zəfər qazandıran Azərbaycan gəncləri indi də suverenliyimizin tam bərqərar olması üçün dinc aksiyaları ilə mübarizələrini davam etdirirlər.
Cənab İlham Əliyevin hakimiyyəti dövründə yetişən gənclik Vətən müharibəsində hansı qəhrəmanlıq nümayiş etdirdisə, bu gün də missiyasını qəhrəmanlıqla davam etdirməkdədir. Belə gəncliklə bütün xalqımızın fəxr etməsi labüddür. Hansı ki, Prezident İlham Əliyev də o gəncliklə fəxr etdiyini dəfələrlə çıxışlarında bildirib. Xalqımız da Azərbaycan gəncliyinə güvənir, onunla fəxr edir. Əlbəttə ki, yetişməkdə olan nəsil bu diqqətdən stimul, güc alaraq apardığı haqq mübarizəsində öz əzmini, iradəsini nümayiş etdirir.
Aksiya başladığı gündən Qarabağımıza erməni separatçıları qeyri-qanuni yükləri daşıya bilmirlər. Bütün dünya bir daha gördü ki, Azərbaycan insanı öz haqlarının, hüquqlarının tələbində israrlıdır, ərazilərinin talan edilməsinə əsla imkan verməyəcək. Bu aksiya ilə Azərbaycan bir çox siyasi dvidendlər də əldə etmiş oldu.
Gəncliyin mübarizəsinin öz nəticəsini verdiyini indidən proqnozlaşdırmaq olar: Tələblər yerinə yetiriləcək, ərazilərimizdə ekoloji terrora son qoyulacaq, Qarabağa qanunsuz yüklərin daşınmasının qarşısı alınacaq. Bunun necə baş verəcəyi də çox sadədir: Azərbaycan öz sərhədində nəzarət-buraxılış məntəqələri, gömrük postları qoyacaq. Əlbəttə, mübarizənin tam qələbə ilə bitəcəyi gün uzaqda deyil.
Rizvan FİKRƏTOĞLU, “Xalq qəzeti”