Tbilisidə Xocalı soyqırımının 31-ci ildönümü ilə bağlı tanıtma hərəkatı keçirilir. Aksiya Gürcüstandakı “Azərbaycan Evi”nin, AZEBİ və Alyans Gənclər Mərkəzinin birgə təşəbbüsü və təşkilatçılığı ilə “Xocalıya ədalət” beynəlxalq kampaniyası çərçivəsində təşkil edilib.
Aksiya zamanı üzərində gürcü və ingilis dillərində “Xocalıya ədalət” yazısının əks olunduğu 4 ədəd kiçik həcmli yük avtomobili Tbilisinin mərkəzi küçə və prospektləri olan Çavcavadze prospektindən başlayaraq, Rustaveli, Azadlıq meydanı, Pekini, Kostava, Marcanişvili metrostansiyalarının qarşısında və Cereteli prospektlərində, eləcə də əhalinin və nəqliyyatın sıx olduğu küçələr, prospektlərdə və meydanlarda fevral ayının 28-i axşam saat 20:00-dək hərəkət edəcəklər.
Gürcüstandakı “Azərbaycan Evi”nin direktoru Məhəbbət İmanov jurnalistlərə müsahibəsində deyib: “Heydər Əliyev Fondunun vitse-prezidenti, “IDEA” İctimai Birliyinin təsisçisi Leyla Əliyevanın təşəbbüsü ilə 2008-ci ildən başladılan “Xocalıya ədalət” təbliğat və təşviqat kampaniyasına 10 ildən artıqdır ki, biz də qoşulmuşuq. Bu illər ərzində XX əsrin ən böyük qətliamı olan Xocalı soyqırımının tanıdılması və təbliği məqsədi ilə paytaxtda bu illər ərzində bir sıra tədbirlər, yürüşlər, buklet və broşurların paylanılması aksiyaları və konfranslar keçirmişik. Builki aksiyamız fərqli olaraq bütün paytaxtı əhatə etmək məqsədini daşıyır”.
Qeyd edilib ki, bu aksiyaların və tədbirlərin məqsədi 31 il öncə erməni cinayətkarlarının xalqımıza qarşı törətdiyi amansız soyqırımını Gürcüstan ictimaiyyətinə, Tbilisi sakinlərinə, eləcə də paytaxtda olan digər millətlərə çatdırmaqdır.
“Xalq qəzeti”