Türkiyədə zəlzələdən zərər çəkənlərə Azərbaycanın bütün şəhər və rayonlarından göndərilən humanitar yardımların ardı-arası kəsilmir.
Təbii ki, hazırda fəlakət zonasında evsiz-eşiksiz qalmış insanların isti sığınacaqlarla təmin edilməsi daha vacibdir. Ona görə də son vaxtlar müasir modul tipli evlər hazırlanaraq mərhələli şəkildə Türkiyəyə göndərilir. Qısa müddətdə və yüksək keyfiyyətlə hazırlanan 1 və 2 otaqlı həmin evlərdə bütün lazımi şərait yaradılıb.
Belə evlərdən 5-i də Şəmkir Rayon İcra Hakimiyyətinin sifarişi ilə hazırlanıb və qardaş ölkəyə yola salınıb.
Qeyd edək ki, Şəmkir sakinləri tərəfindən fəlakətin ilk günlərindən ziyan çəkmiş əhaliyə lazım olan isti paltar, yataq dəstləri, müxtəlif ərzaq və sənaye məhsulları, dərman preparatları, qızdırıcılar, generatorlar, çadırlar göndərilib. Bütövlükdə isə Şəmkirdən 5 TIR humanitar yardım Kahramanmaraş, Malatya, Adıyaman və digər bölgələrə yola salınmışdır.
Hamlet QASIMOV,
“Xalq qəzeti”nin bölgə müxbiri