Xəzər dənizinin Azərbaycan sektorunda yerləşən “Azəri-Çıraq-Günəşli” (AÇG) yataqlar blokundan hasilata başlanıldığı 1997-ci ilin noyabr ayından 2023-cü il mayın 1-dək 573 milyon ton neft çıxarılıb. Ümumi neftin 134,2 milyon tonu “Çıraq”, 355,6 milyon tonu “Azəri”, 83,2 milyon tonu isə “Dərinsulu Günəşli” yataqlarının payına düşüb.
“Əsrin müqaviləsi”nin operatoru olan BP-nin son məlumatına əsasən, 2023-cü ilin birinci rübündə AÇG yataqlar blokunda hasilatın ümumi həcmi 386 min barel təşkil edib. Müqayisə üçün qeyd edək ki, ötən ilin eyni dövründə bu göstərici 434 min barelə bərabər olub.
Bu arada, cari ilin 5 ayı ərzində “Azəri-Çıraq-Günəşli” yataqlar bloku üzrə əldə olunmuş gəlirlər də açıqlanıb. Dövlət Neft Fondundan verilən məlumata görə, 2023-cü il yanvarın 1-dən iyunun 1-dək AÇG yataqlar bloku üzrə əldə olunan ümumi gəlirlər 3 milyard 13 milyon ABŞ dolları təşkil edib.
“Xalq qəzeti”