Son illər ölkəmizdə uğurla həyata keçirilən davamlı inkişaf strategiyasına uyğun olaraq kənd təsərrüfatının sürətli inkişafı məqsədilə çoxşaxəli dövlət dəstəyi sistemi qurulub, bu sahənin potensialının reallaşdırılmasına yönəldilən resursların həcmi artırılıb.
Bununla bərabər, meliorasiya–irriqasiya sisteminin yenidən qurulması və təkmilləşdirilməsi üçün dövlət büdcəsi vəsaitləri hesabına son 10 il ərzində 390 min hektardan çox sahədə torpaqların su təminatı yaxşılaşdırılıb, 188 min hektar sahə yeni suvarılan torpaqlar qrupuna əlavə edilib. Həmçinin suvarılan sahələrdə müvafiq dövlət dəstəyi sayəsində tətbiq olunan müasir suvarma sistemlərinin payı artıq 5 faizdən çox yüksəlib.
Həyata keçirilən layihələr nəticəsində ötən il ərzində respublikada kənd təsərrüfatının ümumi məhsulunun faktiki qiymətlərlə dəyəri 10 milyard 984,2 milyon manat təşkil edib ki, onun da 5 milyard 446,2 milyon manatı heyvandarlıq, 5 milyard 538 milyon manatı isə bitkiçilik məhsullarının payına düşüb. Ölkə üzrə kənd təsərrüfatının istehsalı əvvəlki illə müqayisədə 3,4 faiz artıb.
Cari ilin yanvar-mart aylarında isə respublikada ümumi daxili məhsul (ÜDM) istehsalının 2,6 faizini kənd təsərrüfatı sahəsinin payına düşməsi, yanvar-fevral aylarında 895,6 milyon manat dəyərində kənd təsərrüfatı məhsulları istehsal edilməsi və həmin göstəricinin ötən ilin eyni dövrü ilə müqayisədə 3,3 faiz çox olması kənd təsərrüfatının inkişaf strategiyasın uğurla gerçəkləşdirilməsinin məntiqi nəticəsidir.
Aqrar sektorda inkişaf dinamikasını diqqətə çatdırmaq üçün, ilk növbədə, statistik göstəricilərə əsaslanaraq bildirək ki, bu il Azərbaycanın əksər rayonlarında yazlıq bitkilərin əkini optimal müddətdə başa çatdırılıb, 55 min hektara yaxın sahədə yazlıq bitkilər, o cümlədən 9 min hektara yaxın sahədə dənli və dənli paxlalı bitkilər əkilib.
Kənd Təsərrüfatı Nazirliyindən aldığımız məlumata əsasən, cari il 1 058 398,9 hektar sahədə taxıl əkilib ki, bunun 658 383,7 hektarı buğda, 400 015,2 hektarı isə arpa sahəsidir.
Qeyd edək ki, ötən ilin iyul ayında imzalanan “Ərzaqlıq buğda ilə özünütəminetmə səviyyəsinin yüksəldilməsinə dair bir sıra tədbirlər haqqında” Prezident fərmanına əsasən, 5 il müddətində pilot suvarma sistemindən istifadə edərək keyfiyyətli məhsul yetişdirən hüquqi və fiziki şəxslərə dəyirman və Dövlət Taxıl Fonduna təhvil verdikləri məhsula görə subsidiya ayrılacaq. Aqrar Subsidiya Şurasının qərarına əsasən bu subsidiyanın həcmi hər tona görə 100 manat təşkil edəcək. Eyni zamanda, dövlət pilot suvarma sistemlərinin idxalı da subsidiyalaşdırılacaq, dəyərin 60 faizi qarşılanacaq, qalan 40 faizə isə güzəştli kredit ayrılacaq.
Onu da deyək ki, artıq taxıl biçini prosesinin idarə olunması məqsədilə Kənd Təsərrüfatı Nazirliyində və dövlət aqrar inkişaf mərkəzlərində qərargahlar yaradılıb. Biçinin optimal müddətdə başa çatdırılması, məhsulun vaxtında və itkisiz yığılması üçün nazirliyin prosesdə iştirak edən qurumlarının fəaliyyətlərinin qərargah tərəfindən koordinasiya olunması, taxıl biçininin gedişatının gündəlik olaraq nəzarətdə saxlanılması və operativ zəruri tədbirlərin həyata keçirilməsi qərara alınıb.
“Aqroservis” Açıq Səhmdar Cəmiyyəti tərəfindən biçinlə bağlı hazırlıqlar da yekunlaşıb. Hazırlıq ərəfəsində bütün rayonlar üzrə biçinə cəlb ediləcək mövcud kombaynlara texniki baxış keçirilib, nasaz vəziyyətdə olan texnikalarda təmir- sazlama işləri görülüb. Hazırlıqların ilkin mərhələsində cari ildə taxıl biçininin itkisiz və mütəşəkkil həyata keçirilməsi məqsədilə kombaynları idarə edəcək mexanizatorlara ödənişsiz təlimlər keçirilib. Cari ildə müxtəlif markalı kombaynlar üzrə ümumilikdə, 283 mexanizator təlimlərə cəlb olunub. Təlimlərdə yüksək nəticə əldə edən mexanizatorlara sertifikatlar verilib.
Həmçinin biçin zamanı dislokasiya planına nəzarət olunması üçün kombaynlar “GPS” nəzarət sistemi ilə təchiz edilib. Bu innovativ nəzarət sistemi biçin zamanı operativliyin reallaşdırılması, biçin prosesinə və dislokasiya planına nəzarət edilməsi və şəffaf idarəetmə mexanizminin qurulmasını şərtləndirir.
Hər il olduğu kimi bu il də kənd və qəsəbələrdə biçin prosesinin növbəlilik əsasında həyata keçiriləcəyi nəzərdə tutulub. Növbəliliyin yaradılmasına icra nümayəndəlikləri və bələdiyyələr tərəfindən dəstək göstəriləcəyi planlaşdırılıb. Biçinə və növbəlilik sisteminə nəzarətin təmin olunmasının isə Dövlət Aqrar İnkişaf Mərkəzləri (DAİM) tərəfindən gerçəkləşdiriləcəyi qərara alınıb.
Bu il taxıl biçini prosesinə 2 minədək taxılbiçən kombaynın cəlb olunması nəzərdə tutulur. Bunlardan 670-sı “Aqroservis” ASC-nin balansında olan kombaynlardır.
Kənd Təsərrüfatı Nazirliyinin “Aqroservis” ASC tərəfindən 2023-cü il taxıl biçininə hazırlıqla bağlı biçini həyata keçirən mexanizatorlarla görüşlər keçirilib. İlk görüş Biləsuvar rayonunda “Aqroservis” ASC-nin İdarə Heyətinin sədri Elmin Rəhmanov, Biləsuvar və ətraf rayonların Dövlət Aqrar İnkişaf Mərkəzlərinin (DAİM) rəhbərlərinin iştirakı ilə reallaşıb. Daha sonra bu görüşlər ardıcıl olaraq bütün ölkəni əhatə etməklə davam etdirilib. Sabirabad, Füzuli, Ağcabədi, Bərdə, Şəmkir, Yevlax, Şəki, Qobustan, Siyəzən və Xaçmaz rayonlarında keçirilən görüşlərə bütün ətraf rayonlarda biçin aparacaq mexanizatorlar cəlb olunub.
Görüşlərdə taxıl biçininin itkisiz və mütəşəkkil həyata keçirilməsi, biçin zamanı qarşıya çıxa biləcək problemlər və onların həllinə dair məsələlər müzakirə edilib. Mexanizatorların təklifləri dinlənilib. Onlara taxıl biçini zamanı biçin qaydaları bir daha izah edilərək, üzərlərinə düşən vəzifə və məsuliyyət barədə məlumatlar verilib.
Aprel ayından başlayaraq davam edən tədbirlər may ayının 30-da “Aqroservis” ASC-nin Xaçmaz Regional Nümayəndəliyində Xaçmaz, Quba, Qusar, Xızı rayonlarında biçin aparacaq mexanitorlarla keçirilən görüşlə yekunlaşıb.
Hazırda respublikanın 24 rayonunda arpa biçini davam edir. Biçin prosesinə 532 kombayn cəlb olunub. Kombaynlardan 304 ədədi fiziki və hüquqi şəxslərə, 228 ədədi isə “Aqroservis” ASC-yə məxsusdur. İyunun 2-dək respublikanın 24 rayonunda 21 min hektar arpa sahəsi biçilib, sahələrdən 48 min tondan çox məhsul yığılıb.
Mirağa ƏHMƏDOV,
iqtisadçı-ekspert
Respublikamızda son illər ərzində kənd təsərrüfatının modernləşdirilməsi, aqrar sektorda mövcud problemlərin həllinə sistemli və kompleks yanaşılması istiqamətlərində mühüm uğurlar əldə edilib. Prezident İlham Əliyev tərəfindən aqrar islahatların müasir mərhələsi ilə bağlı qəbul olunan qərarlar, bu sahənin institusional, iqtisadi və texnoloji inkişaf mexanizmlərinin təkmilləşdirilməsi istiqamətində kompleks layihələrin icrası kənd təsərrüfatının keyfiyyətcə yeni inkişaf dövrünə keçməsini şərtləndirib.
Bütün bu tədbirlərin nəticəsində yerli istehsal potensialı güclənib və ərzaq məhsullarının rəqabətqabiliyyətliliyi artıb, eyni zamanda, ərzaq təhlükəsizliyinin dayanıqlılığının təmin olunması və əsas ərzaq məhsulları ilə özünütəminetmə səviyyəsinin yüksəlməsi gerçəkləşib.
Azərbaycanın ərzaq təhlükəsizliyi sahəsindəki nailiyyətləri nüfuzlu beynəlxalq qurumların hesabatlarında da əksini tapıb. Qlobal Ərzaq Təhlükəsizliyi İndeksi üzrə hesabata əsasən, respublikamızın ümumi ərzaq təhlükəsizliyi indeksində ardıcıl olaraq yüksəlmə müşahidə olunur. Hazırda ərzaq təhlükəsizliyinin dayanıqlılığının gücləndirilməsi üçün yeni institusional mexanizmlərin yaradılması həyata keçirilir.
Ölkədə strateji əhəmiyyətli mallar üzrə daha səmərəli təchizat zəncirinin formalaşdırılması, bu sahədə qabaqcıl tənzimləmə və idarəetmə təcrübəsinin tətbiqi, eləcə də daxili bazarın qısamüddətli mənfi təsirlərə davamlılığının artırılması üçün təsis olunan Dövlət Ehtiyatları Agentliyi uğurla fəaliyyət göstərir. Yeri gəlmişkən, Azərbaycan Prezidentinin 2022-ci il 19 iyul tarixli “Ərzaqlıq buğda ilə özünütəminetmə səviyyəsinin yüksəldilməsinə dair bir sıra tədbirlər haqqında” Fərmanına əsasən, ölkənin ərzaqlıq buğda ilə özünütəminetmə səviyyəsinin yüksəldilməsi, habelə ərzaqlıq buğda istehsalının təşkili məqsədilə yaradılan yeni mexanizmlər də Azərbaycanın ərzaq təhlükəsizliyinə önəmli töhfələr verir.
Aqrar sektorda yeni sığorta sisteminin tətbiqi də kənd təsərrüfatının inkişafını daha da sürətləndirib. Belə ki, bu sahədə istehsal olunan məhsulların Aqrar Sığorta Fondu ilə özəl sığorta şirkətləri tərəfindən birgə sığortalanması investisiya risklərini azaldıb, fermerlərə dövlət dəstəyini gücləndirib, məşğulluğa müsbət təsir edib və sığorta bazarını genişləndirib.
Vaqif BAYRAMOV, “Xalq qəzeti”