2022-ci ildə gömrük orqanlarının xətti ilə dövlət büdcəsinə 5 milyard 654,6 milyon manat məbləğində vəsait daxil olmuşdur ki, bu da 4 milyard 605 milyon manat proqnozla müqayisədə 1 milyard 49,6 milyon manat və ya 22,8 faiz, 2021-si illə müqayisədə 1 milyard 311,6 milyon manat və ya 30,2 faiz çoxdur.
Bu barədə Azərbaycan Respublikasının 2022-ci il dövlət büdcəsinin icrasına dair illik hesabatda bildirilib.
Hesabat dövründə gömrük orqanlarının xətti ilə proqnozla nəzərdə tutulduğundan artıq daxilolmalara səbəb əsasən idxalın həcminin əvvəlki illə müqayisədə 2 milyard 834,1 milyon ABŞ dolları və ya 24,2 faiz artması ilə izah olunur.
“Xalq qəzeti”
