“Apple” şirkətinin ən böyük tədarükçüsü “Foxconn” gələn ilin aprel ayına qədər Hindistanın cənubundakı Karnataka əyalətində “iPhone” istehsalına başlayacaq. Bu barədə Hindistanın əyalət hökuməti məlumat verib.
Karnataka hökuməti layihənin 1,59 milyard dollar dəyərində qiymətləndirildiyini bildirib. “Foxconn” Karnatakadakı zavodda ildə 20 milyon “iPhone” istehsal etməyi qarşısına məqsəd qoyub.
“Foxconn”un “Apple”-in telefonlarını Hindistanda istehsal etmək qərarı son vaxtlar Vaşinqton ilə Pekin arasında ticarət gərginliyinin artması ilə əlaqədardır.
Qeyd edək ki, Apple telefonlarının çoxu hazırda Çində istehsal edilir. Hindistanda isə bu telefonların hissələri “Apple”-in törəmə qurumları tərəfindən yığılır.
F.SALMANOVA, “Xalq qəzeti”