Sumqayıt Dövlət Dram Teatrında yazıçı- dramaturq Hidayət Orucovun "Burdan min atlı keçdi" əsərinin motivləri əsasında "İrəvanda nəyim qaldı..." tamaşasının premyerası gerçəkləşib.
Tədbirdə Sumqayıt Şəhər İcra Hakimiyyətinin başçısı Zakir Fərəcov, millət vəkilləri, idarə, müəssisə, təşkilat rəhbərləri və teatrsevərlər iştirak edib.
Premyeradan öncə tamaşanın məsləhətçisi Qərbi Azərbaycan İcmasının Sumqayıt nümayəndəsi Ramiz İsmayılov çıxış edərək bildirdi ki, bu qəbildən olan tamaşaların hazırlanması zəruridir, tariximizin, mücadilə səhifəmizin gənclərə öyrədilməsi baxımından maarifçilik missiyası daşıyır.
Natiq vurğuladı ki, görkəmli dövlət xadimi Heydər Əliyevin həmin dövrlərdə milli təəssübkeşliyi, imperiya daxilində Azərbaycan üçün göstərdiyi fədakarlıq gənc nəslə çatdırılmalıdır. Ulu öndərin anadan olmasının 102-ci il dönümünü Sumqayıt teatrının belə dolğun əsərlə qarşılaması alqışa layiqdir.
Daha sonra tamaşa nümayiş olundu.
Qeyd edək ki, "İrəvanda nəyim qaldı..." tamaşası yaxın tariximizin gerçək tarixi faktlarını, Azərbaycanın qədim yurd yeri İrəvanda zaman-zaman soydaşlarımıza qarşı aparılan gizli təxribatları, erməni ideoloqlarının ərazi iddialarını və Ulu öndər Heydər Əliyevin Qərbi Azərbaycanda yaşayan soydaşlarımızın siyasi müstəvidə müdafiəsinə qalxmasını özündə ehtiva edir.
Səhnə əsərinin quruluşçu rejissoru və musiqi tərtibatçısı Xalq artisti Firudin Meherremov, quruluşçu rəssam Mustafa Mustafayevdir.
Tamaşa alqışlarla qarşılandı.
Və sonda Xalq artisti Firudun Məhərrəmov mötəbər qonaqlara minnətdarlığını bildirdi, Sumqayıt Dövlət Dram Teatrının repertuarında hər zaman milli mücadilə tariximizi əks etdirən, dövlətçilik sevgisini aşılayan tamaşaların ərsəyə gəldiyini söylədi.
XQ
