Bu gün xalqımızın elm və təhsil tarixində, milli mədəniyyətimizin və ictimai fikir tariximizin inkişafında yeni mərhələnin başlanğıcı sayılan əlamətdar gündən – Azərbaycanda ilk sivil ali məktəbin təsis edilməsindən 105 il ötür. 1919-cu ilin 1 sentyabrında çətin və mürəkkəb bir şəraitdə Azərbaycan Xalq Cümhuriyyətinin Parlamentində daha bir taleyüklü addım atılaraq Bakı Dövlət Universitetinin yaradılması haqqında qanun qəbul edilmişdir. 

BDU milli hökumət dövründə çox qısa zaman ərzindəki fəaliyyəti ilə, sovet haki­miyyəti illərində bütün təqib və təzyiqlərə rəğmən xalqımızın milli şüurunun forma­laşmasında, ölkəmizdə elm və təhsilin in­kişafında bir məbəd kimi müstəsna rol oy­namışdır. Azərbaycan dövlət müstəqilliyini bərpa etdikdən sonra bu missiya daha böyük uğurlarla və daha böyük miqyasda davam etdirilir. 

BDU-nun zəngin inkişaf tarixinə nəzər yetirdikdə doğma universitetimizin əsas uğurlarının və tərəqqi mərhələlərinin ümum­milli liderimiz Heydər Əliyevin adı ilə bağlı olduğunun şahidi oluruq. Ulu öndər ötən əsrin 70-ci illərindən başlayaraq, həm də müstəqil­lik illərində ölkəyə rəhbərlik etdiyi dövrlərdə BDU-ya xüsusi qayğı ilə yanaşmış, ölkənin ilk ali məktəbini elm və təhsilimizin bayraq­darı, eyni zamanda, milli təhsil mərkəzi kimi qiymətləndirmişdir. Bu gün 105 illik yubi­leyini qeyd edən BDU kollektivi Ulu öndə­rin bu xidmətlərini minnətdarlıqla yad edir, universitetimizin dünya şöhrətli məzunu ilə qürur duyur. 105 illik tarix zirvəsindən ötən onilliklərə nəzər saldıqda görürük ki, BDU-nun yubileylərinin ümumxalq önəmi daşıyan hadisə kimi təntənəli şəkildə qeyd olunması ənənəsinin əsasını bu ali məktəbin yetirməsi Heydər Əliyev qoymuşdur.

İlk ali təhsil ocağımızın yaradılmasının 50-ci ildönümündən başlayaraq onun yubi­leyləri məhz Ulu öndərin təşəbbüsü və rəh­bərliyi ilə keçirilmişdir. BDU-nun 50 illik yubiley mərasimində, sovet təbliğatının milli dəyərləri üstələdiyi bir dövrdə Azərbayca­nın ali rəhbərliyinə yenicə gəlmiş Heydər Əliyevin böyük cəsarət nümayiş etdirərək beynəlmiləl auditoriya qarşısında məhz ana dilimizdə çıxış etməsini bu gün də xalqımız böyük ehtiram və minnətdarlıqla xatırlayır. 

Ulu öndər sonralar həmin tarixi hadisəni yada salaraq deymişdi: "Xatirimdədir, uni­versitetin 50 illik yubileyində çıxış edərkən, şübhəsiz ki, öz ana dilimdə, Azərbaycan dilində danışdım. Bu, böyük bir sensasiya kimi qəbul olundu – nə cür olur ki, respub­likanın rəhbəri Azərbaycan dilində çıxış edir. Bəziləri məni bu hadisə münasibətilə təbrik edirdilər, minnətdarlıqlarını bildirirdilər. Di­lini sevən, milli ruhla yaşayan insanlar, doğ­rudan da, bunu böyük bir hadisə kimi qəbul etdilər".

Azərbaycan dövlət müstəqilliyini bər­pa etdikdən sonra BDU Prezident Heydər Əliyevin diqqət və qayğısı sayəsində inkişa­fının yeni və daha parlaq mərhələsinə qədəm qoydu. BDU kollektivi ötən il universite­timizin dünya şöhrətli məzunu, “Mən çox xoşbəxtəm ki, Bakı Dövlət Universitetinin məzunuyam” kəlamı ilə oxuduğu ali mək­təbin adını, şöhrətini zirvələrə ucaldan, onu “Azərbaycan xalqının, Azərbaycan Respub­likasının milli sərvəti, milli iftixarı” adlandı­ran ulu öndər Heydər Əliyevin 100 illik yu­bileyini böyük hörmət və ehtiramla, müdrik rəhbərimizə sonsuz minnətdarlıqla qeyd etdi. 

Azərbaycan Respublikasının Prezidenti cənab İlham Əliyevin 2022-ci il 29 sentyabr tarixli sərəncamı ilə “Heydər Əliyev İli” elan olunmuş 2023-cü il boyu Ulu öndərin irsinin təbliğini, bu xəzinənin gənc nəslə çatdırıl­masını özünün ali məqsədlərindən biri hesab edən BDU kollektivi bu istiqamətdə səyləri­ni daha da artırmış, silsilə tədbirlər keçirmiş­dir. 2023-cü il ərzində müstəqil Azərbaycan dövlətinin memarı, ümummilli lider Heydər Əliyevin həyatı və çoxşaxəli fəaliyyəti ilə bağlı elmi-tədqiqat işləri aparılmış, bey­nəlxalq konfranslar, seminarlar keçirilmiş, kitablar hazırlanmış, xüsusi mühazirələr, us­tad dərsləri və s. təşkil edilmişdir. BDU ailə­sinin hər bir üzvü, professor-müəllim heyə­ti, o cümlədən tələbələrimiz bu tarixi ilin, öyünclü günlərin, sevincli anların bir hissəsi olmaq üçün səy göstərmişdir. 

Bundan əvvəl isə Prezident İlham Əliyevin müvafiq sərəncamı ilə 2019-cu ildə BDU-nun 100 illik yubileyi təntənəli şəkildə qeyd olunmuşdu. Yubileyin keçi­rilməsi ilə bağlı imzalanmış tarixi sənəddə möhtərəm Prezidentimiz BDU-nun tarixinə xüsusi diqqətlə yanaşmış, universitetin ölkədə ali təhsil sisteminin qurulmasında, elmi-tədqiqatların aparılmasında, milli özü­nüdərk prosesinin sürətləndirilməsində tarixi xidmətlərini qeyd etmişdir. BDU-nun 100 illik yubileyi Parisdə UNESCO-nun Baş qərargahında, Vyanada Azərbaycan Mədə­niyyət Mərkəzində, Rumıniyada Qara Dəniz Universitetləri Assosiasiyasının təşkilatçılığı ilə Buxarest Universitetində və digər univer­sitetlərdə və müxtəlif qurumlarda yüksək sə­viyyədə qeyd edilmişdir. 

Yubiley ilində “Bakı Dövlət Universi­tetinin 100 illiyi (1919-2019)” Azərbaycan Respublikasının yubiley medalı təsis edilmiş, yubiley pul nişanı tədavülə buraxılmışdır. Universitetin 113 əməkdaşı ölkə başçısının sərəncamı ilə müstəqil dövlətimizin orden, medal və fəxri adlarına layiq görülmüşdür. Bütün bunlar BDU-nun professor-müəllim heyətini daha əzmlə, fədakarlıqla Azərbay­canda elmin və təhsilin inkişafına öz töhfələ­rini verməyə həvəsləndirmişdir. 

100 illik yubiley mərasimində ölkə baş­çısının iştirakı və proqram xarakterli çıxı­şı universitet kollektivinin qarşısında yeni hədəflər qoymuşdur. Möhtərəm Prezidenti­miz yubiley mərasimindəki tarixi çıxışında BDU-nun ölkəmizin həyatındakı müstəsna rolunu xüsusi vurğulayaraq demişdir: “Azər­baycan Xalq Cümhuriyyəti süqut edəndən sonra BDU yeni ictimai-siyasi dövrdə fəaliy­yətini davam etdirirdi. Yüz il ərzində univer­sitetin 200 minə yaxın məzunu Azərbaycanın müxtəlif sahələrində öz bilik və bacarıqları­nı nümayiş etdirmişdir. Məzunlar arasından görkəmli şəxslər, alimlər, ictimai xadimlər, siyasətçilər, mütəxəssislər çıxmışdır. Onların bir çoxu Azərbaycanın hərtərəfli inkişafına öz dəyərli töhfəsini vermişdir. Azərbaycan xalqının ümummilli lideri, müasir Azər­baycanın qurucusu Heydər Əliyev də Bakı Dövlət Universitetinin məzunu idi. Heydər Əliyev həm sovet dövründə, həm müstəqilli­yin ərəfəsində, həm də müstəqillik dövründə xalq qarşısında, dövlət qarşısında misilsiz xidmətlər göstərmişdir”. 

Bu gün 105 yaşlı ali təhsil ocağının əməkdaşları qarşıda duran hədəflərə çatmaq, ölkə başçısının etimadını ən yüksək səviy­yədə doğrultmaq üçün səylər göstərir, bey­nəlxalq və milli əmək bazarı üçün rəqabətə­davamlı, eyni zamanda, vətənpərvər ruhlu mütəxəssislər hazırlayırlar. 

100 illik şərəfli yubileydən keçən 5 il ərzində BDU, hər zaman olduğu kimi, ölkə Prezidenti İlham Əliyevin və Birinci vit­se-prezident Mehriban xanım Əliyevanın yüksək qayğısı və hərtərəfli dəstəyi ilə öz uğurlarını davam etdirir. Universitetdə müa­sir tələblərə cavab verən idarəetmə islahat­ları aparılır, şərəfli keçmişi, tarixi ənənələri olan ali təhsil və elm ocağının modern dünya universitetləri siyahısında ön yerləri tutması üçün məqsədyönlü fəaliyyət həyata keçirilir. 

Bu gün uğurla həyata keçirilməkdə olan “Universitet-5.0” strategiyası BDU-nun inkişafının təməl prinsiplərini təşkil edir. Strategiyada təhsil, elm, innovasiya, beynəl­miləlləşmə və sosiallaşma istiqamətləri üzrə hədəflər müəyyənləşdirilmişdir. Hazırda uni­versitetdə tarixi ənənələrin və modern dünya təcrübəsinin vəhdəti şəklində tədris müasir, innovativ təlim texnologiyaları əsasında qu­rulur. Elmi-tədqiqat işlərinin məzmunu gü­nün tələblərinə uyğun şəkildə yenilənir. 

Beynəlxalq akademik əlaqələr və ölkə­daxili əməkdaşlıq inkişaf etdirilir, paralel olaraq bu istiqamətdə struktur islahatları həyata keçirilir. Dövlətimizin gəncləşmə si­yasətinə uyğun olaraq kadr islahatları apa­rılır, bacarıqlı və perspektivli gənclər önə çəkilir. Universitet əməkdaşlarının sosial və­ziyyətinin yaxşılaşdırılması üçün mütəmadi olaraq əməli addımlar atılır. 

105 il əvvəl 2 fakültə, 44 nəfər pro­fessor-müəllim heyəti və 1094 tələbə ilə fəaliyyətə başlayan universitet hazırda 16 fakültə, 121 kafedra, 2 elmi-tədqiqat insti­tutu, Tədqiqat, İnkişaf və İnnovasiyalar üzrə Mükəmməllik Mərkəzi, müasir avadanlıqlar­la təchiz edilmiş 5 elmi-tədqiqat mərkəzi və 22 elmi-tədqiqat laboratoriyası, 2 milyondan çox kitab fondu olan Elmi Kitabxana, 5 mu­zey, 5 beynəlxalq institut və mərkəz, 1 təd­ris-təcrübə və istirahət mərkəzi, 1 tədris-təc­rübə bazası, 1 filial, 1 kollec və 1 liseylə müqəddəs missiyasını davam etdirir. 

BDU-nun 2021-2030-cu illər üçün Stra­teji İnkişaf Planında qarşıya qoyulmuş və­zifələr, priroritet istiqamətlər əsasında təhsi­lin inkişafı, elmi-tədqiqatların keyfiyyətinin artırılması, idarəetmə sisteminin dinamikli­yinin təmin edilməsi məqsədilə müntəzəm olaraq islahatlar aparılır. Təhsilalanlar və akademik heyət arasında qarşılıqlı əlaqələr dərinləşdirilir. Yeni nəsil elm və təhsil proq­ramlarının sayı artırılır, əmək bazarının tələblərinə uyğun olaraq yeni ixtisas və ix­tisaslaşmalara tələbə qəbulu aparılır. Tədris resursları mütəmadi olaraq təkmilləşdirilir, təlim prosesini müasir üsullarla və müasir məzmunla həyata keçirmək məqsədilə audi­toriyalar müasir İKT avadanlıqları ilə təchiz olunur, elmi-tədqiqat və tədris laboratoriya­larının maddi-texniki bazası gücləndirilir.

2024-cü ildə BDU-nun 2 saylı təd­ris binası ən yüksək səviyyədə əsaslı təmir edilmişdir. Binanın həyətində yerləşən Şə­hidlər kompleksi də yenidən qurulmuş, bu­rada Zəfər kompleksi yaradılmış, içəridə isə “Zəfər tarixi” lektoriyası istifadəyə verilmiş­dir. Lektoriya Vətən müharibəsində böyük Qələbənin rəmzləri və Ali Baş Komandanın rəhbərliyi altında rəşadətli Azərbaycan Or­dusunun qəhrəmanlıqlarını, eləcə də hazır­da Qarabağda və Şərqi Zəngəzurda aparılan genişmiqyaslı quruculuq işlərini əks etdirən fotoşəkillər və Vətən müharibəsindən bəhs edən ədəbiyyatla zənginləşmişdir. 

Aparılan islahatlar tədris prosesinin, el­mi-tədqiqatların keyfiyyətini artırır, tələbələ­rin ictimai fəallığının artırılmasına, onların Azərbaycançılıq ideyasına, milli-mənəvi dəyərlərə bağlı, əsl vətəndaş kimi formalaş­masına xidmət edir. BDU tələbələrinin ko­mandaları son illər “TEKNOFEST” festival­larında da uğurla çıxış edir, mühüm nəticələr əldə edirlər. 2023-cü ildə BDU komandaları İstanbulda keçirilən “TEKNOFEST-2023” Aerokosmik və Texnologiya Festivalında uğurlu nəticə göstərmişdir. 

Universitetin 4 komandası 6 layihə ilə "TEKNOFEST-2023"ün finalına vəsiqə qa­zanmışdır. 

Bu il BDU tələbələri nüfuzlu robot fes­tivalı olan “Robotex Avrasiya”da ciddi uğur əldə etmişdir. 2024-cü ilin aprel ayında ke­çirilən bu festivalda BDU-nun yarışmada iştirak edən 7 komandasının hər biri qalib olmuş, Universitetimizin iki komandası (“85 Games Studio və “Humantek”) yarışmada birinci, 2 komandası (“Bilig” və “Braden­burg”) ikinci, 3 komandası isə (“AiTech Group”, “QuantumTech” və “TechTitans”) üçüncü yerə layiq görülmüşdür.

BDU tələbələri, eləcə də universitetin nəzdindəki “Gənc istedadlar” liseyinin şa­girdləri beynəlxalq arenada bilik və baca­rıqlarını uğurla nümayiş etdirirlər. 2024-cü il avqustun 5-dən 11-dək Bolqarıstanda ali məktəb tələbələri arasında keçirilən Bey­nəlxalq Riyaziyyat Olimpiadasında BDU tələbələri qızıl və bürünc medala layiq gö­rülmüşdür. Həmçinin 2024-cü ildə İbtidai, orta və yuxarı sinif şagirdləri arasında keçi­rilən beynəlxalq riyaziyyat müsabiqələrində “Gənc istedadlar” liseyinin şagirdləri 25 qı­zıl, 21 gümüş, 24 bürünc medal qazanmışdır. 

Universitetdə tələbələrin təhsili, elmi-tədqiqatlara təşviq olunmaları və on­ların layihələrinin dəstəklənmələri üçün ən müxtəlif innovativ üsul və metodlar tətbiq olunur. Son dövrlər Tələbə Elmi-Texniki Yaradıcılıq Mərkəzinin fəaliyyətə başlaması, “Code for Future” layihəsinin həyata keçi­rilməsi, Xarici Dil Mərkəzinin yaradılması tələbələrimizin bilik və bacarıqlarını daha da artırır, onların fərdi istedadlarının üzə çıxa­rılmasına əlavə əlverişli şərait yaradır. 

Hazırda universitetdə ali təhsilin bütün səviyyələrində 25 minə yaxın tələbə təhsil alır. 3 mindən çox əməkdaş, o cümlədən 1500 nəfərə qədər professor-müəllim heyəti və elmi işçi çalışır. Onlardan 250-dən çoxu elmlər doktoru, professor, 800 nəfərə yaxın əməkdaş isə fəlsəfə doktoru, dosentdir. Bu gün BDU-da 76 ixtisas, 271 ixtisaslaşma üzrə kadr hazırlığı həyata keçirilir. Əmək ba­zarının tələblərinə uyğun yeni ixtisas və ixti­saslaşmaların yaradılması BDU-nun strateji hədəflərindəndir. Son illər BDU-da təhsilin bakalavr və magistratura səviyyələrində bir sıra yeni ixtisas və ixtisaslaşmalar açılmışdır. 

BDU peşəkar kadrlar yetişdirməklə ya­naşı, milli ruhlu vətəndaş yetişdirməyi də özünün ali məqsədi hesab edir. Bu məqsədlə davamlı olaraq tələbələr arasında müvafiq iş aparılır, maraqlı sosial layihələr həyata keçi­rilir. Universitetdə fəaliyyət göstərən tələbə təşkilatları bu prosesin avanqardı kimi çıxış edir. BDU tələbələri ölkəmizdə uğurla hə­yata keçirilən gənclər siyasəti və könüllülük hərəkatına öz mühüm töhfələrini verirlər. 

Tələbələrin yataqxana şəraitinin yax­şılaşdırılması məqsədilə ötən dövr ərzində müasir standartlara cavab verən 216 yerlik “Tələbə evi” istifadəyə verilmişdir. Tələ­bələrin keyfiyyətli, müasir dərslik və dərs vəsaitləri ilə təmin edilməsi üçün Nəşr Evi “bp-Azərbaycan” şirkətinin dəstəyi ilə ən müasir avadanlıqlarla təchiz edilərək yeni­dən qurulmuşdur. BDU ilə “bp-Azərbay­can” şirkəti arasında imzalanmış əməkdaş­lıq müqaviləsi əsasında Elmi Kitabxananın elektronlaşdırılmasına başlanılmışdır. 

Son illər BDU məzunları dövlət qullu­ğuna və digər qurumlara işə qəbulla bağlı keçirilən mərkəzləşdirilmiş imtahanlarda ənənəvi olaraq yüksək nəticələr göstərir, eyni zamanda, tələbələrimiz beynəlxalq, regional və yerli olimpiadalarda, bilik yarışmalarında ön yerlərə layiq görülürlər. Cari ildə “Yüksə­liş” müsabiqəsinin qalibləri arasında BDU-nun 4 məzunu yer almışdır. 2024-cü il üzrə Gənclər üçün Prezident mükafatçılarından 3-ü, “Gənclərin xarici ölkələrin nüfuzlu ali təhsil müəssisələrində təhsil almalarına dair 2022-2026-cı illər üçün Dövlət Proqramı” çərçivəsində 2024-cü ildə xaricdə təhsil al­maq imkanı qazanmış tələbələrdən isə 49-u BDU-nun məzunudur. Prezident İlham Əli­yevin 2023-cü il 24 iyun tarixli sərəncamına əsasən, BDU-nun 8 tələbəsi “Heydər Əliyev adına təqaüd”ə layiq görülmüşdür. 

Universitetdə elmi fəaliyyətin səmərəli təşkili prioritet hesab olunur. Elmi-tədqiqat işlərinin məzmununun yenilənməsi, alınan nəticələrin bilavasitə tətbiq sahələrinə yönəl­dilməsi sahəsində yeni müsbət tendensiya formalaşır. Son illərdə BDU-da sənaye kim­yası, rəqəmsal araşdırmalar, hüceyrə kul­turası və genom redaktəsi, mikrobiologiya və virusologiya, biomühəndislik, kompleks geoloji və geofiziki tədqiqatlar kimi yeni sə­naye yönümlü elmi-tədqiqat laboratoriyaları, Baş Prokurorluq, Ekologiya və Təbii Sərvət­lər Nazirliyi ilə birgə ECOLEAD Klinikası, ICESCO-nun biotibbi materiallar kafedrası, Beynəlxalq Türk Akademiyası ilə birgə süni intellekt etikası kafedrası, Erməni Araşdır­maları və Təlim Mərkəzi, Qərbi Azərbaycan Araşdırmaları Mərkəzi və s. yaradılmışdır.

Dünyanın nüfuzlu beynəlxalq elm və təhsil reytinqlərində mövqeyini möhkəm­ləndirmək BDU-nun prioritet istiqamətlə­rindəndir. Bu istiqamətdə həyata keçirilən məqsədyönlü fəaliyyətin nəticəsidir ki, ha­zırda Azərbaycanın dünya universitetlərinin QS reytinq siyahısında ilk ən yaxşı 1000 uni­versitet siyahısında yer alan yeganə ali təhsil müəssisəsi BDU-dur. Universitet alimlərinin nüfuzlu elmi nəşrlərdə çap edilən məqalələ­rinin dinamikası ildən-ilə yüksəir. 

“Clarivate Analytics” beynəlxalq agent­liyinin rəsmi məlumatına əsasən, BDU-nun H-indeksi artaraq 67-yə yüksəlmişdir. Müqa­yisə üçün qeyd edək ki, bu göstərici 2018-ci ildə 35-ə, ötən il isə 52-yə bərabər olmuşdur. Hər bir əsərə edilən istinadların orta sayı 8.53-ə qədər yüksəlmişdir. Agentliyin rəsmi məlumatına əsasən, BDU-nun əməkdaşları, doktorant və tələbələri “Web of Science” ba­zasına daxil olan dərgilərdə artıq 4436 elmi əsər nəşr etdirmişlər. Bu əsərlərə, ümumilik­də, 37 mindən çox istinad edilib – bu göstəri­ci ötən il 29 min idi. 

Ali məktəb son illər bir sıra reytinqlər üzrə göstəricilərini də artırmışdır. BDU Azərbaycanda “Times Higher Education Subject” reytinq siyahısında yer alan yeganə ali təhsil müəssisəsidir. BDU-nun bu sahə­də daha bir uğuru ilk dəfə olaraq "QS Sus­tainability 2024" reytinqində yer almasıdır. 2024-cü ildə THE qlobal reytinqinə də Azər­baycan ali təhsil müəssisələrindən yalnız BDU daxil olmuşdur. 

Bütün bunlar kollektivimizin birgə, yük­sək səylə çalışması nəticəsində əldə edilmiş uğurlardır. Əminik ki, bu nəticələr ildən-ilə daha da yüksələcəkdir. Universitetimiz müa­sir tələblərə uyğun elmi-tədqiqat mühitini in­kişaf etdirir, beynəlxalq əməkdaşlıq imkan­larını daha da artırır, rəqabətədavamlı elmi araşdırmaların aparılmasına şərait yaradır. 

Beynəlxalq əməkdaşlığa, tələbə və müəl­lim mübadiləsinə xüsusi önəm verən BDU bu istiqamətdə də səylərini davam etdirir. Universitet əmək bazarının tələblərinə uy­ğun mütəxəssislərin hazırlanması məqsədilə ABŞ, Çin, Almaniya, İsrail, İsveçrə, Qa­zaxıstan və s. kimi ölkələrin qabaqcıl univer­sitet və institutları ilə (Yerusəlim İbrani Uni­versiteti, Holon Texnologiya İnstitutu, Anhui Universiteti, Biznes və Beynəlxalq Tədqiqat­lar Universiteti, Linkoln Universiteti, Sat­bayev adına Qazax Milli Tədqiqat Texniki Universiteti, Əl-Fərabi adına Qazax Milli Universiteti və s.) bakalavriat, magistratura, doktorantura pilləsi üzrə 12 beynəlxalq ikili diplom proqramlarını tətbiq edir. 

Ötən tədris ilində də BDU-nun bey­nəlxalq əməkdaşlıq strategiyası uğurla da­vam etdirilmişdir. Bu dövrdə BDU ilə Tür­kiyənin Tokat Qaziosmanpaşa, Orta Doğu Texniki, İstanbul Texniki, Muğla Sıtkı Koç­man universitetləri, Litvanın Mikolas Ro­meris Universiteti arasında “Erasmus” mü­badilə protokolu, Sarsen Amanjolov adına Şərqi Qazaxıstan Universiteti, Qırğız-Türk “Manas” Universiteti arasında “Orhun” mü­badilə protokolu, Türkiyənin Hacettepe, Ba­lıkesir, Ankara Sosial Elmlər universitetləri, İspaniyanın Qranada Universiteti, Özbəkis­tan Elmlər Akademiyasının Mirzə Uluqbəy adına Astronomiya İnstitutu, Qazaxıstanın Atırau Dövlət Universiteti, Yaponiyanın Ka­naqava və Kumamoto Universitetləri, Çinin Pekin Xarici Dillər, Tongji, Hefei Texno­logiya Universiteləri arasında əməkdaşlıq memorandumu və bu istiqamətdə bir sıra digər sənədlər imzalanmışdır. BDU hazırda 50-dən çox ölkənin 160-dan artıq universiteti ilə əməkdaşlıq edir.

BDU xarici universitetlərlə birgə bey­nəlxalq elmi tədbirlərin təşkilinə də üstünlük verir. Son illər bu istiqamətdə bir sıra nəti­cələr əldə edilmiş, o cümlədən ümummilli lider Heydər Əliyevin 100 illik yubileyinə həsr olunmuş beynəlxalq elmi konfranslar, BMT-nin Kosmos Məsələləri üzrə Ofisi (UNOOSA) ilə “Beynəlxalq Kosmik Hava Təşəbbüsü: Günəş, Kosmik Hava və Geos­fer” üzrə BMT/Azərbaycan yüksək işçi semi­narı (United Nations/Azerbaijan Workshop on the International Space Weather Initiati­ve: The Sun, Space Weather and Geosphere), Volkswagen Fondu ilə “Kvant elminin və texnologiyasının müasir meylləri: kvant ma­teriallarından kvant informasiyasına qədər” mövzusunda Beynəlxalq Yay Məktəbi və s. elmi tədbirlər keçirilmişdir.

Nüfuzlu beynəlxalq elmi təşkilatlarla əməkdaşlığı da BDU özünün prioritetlərin­dən hesab edir. 2022-ci ildə Avropa Uni­versitetlər Assosiasiyasının (EUA) və İslam Dünyasının Universitetləri Federasiyasının (FUIW), 2023-cü ildə Beynəlxalq Astronav­tika Federasiyasının (IAF), 2024-cü ildə isə Sənaye və Texnoloji Tədqiqat Təşkilatlarının Dünya Assosiasiyasının (World Association of Industrial and Technological Research Organizations - WAITRO), Avropa Paytaxt­ları Universitetləri Şəbəkəsinin (Network of Universities from the Capitals of Europe - UNICA) üzvü seçilmişdir.

Beynəlxalq əlaqələrlə yanaşı, ölkədaxili əməkdaşlığa da xüsusi önəm verilir. Uni­versitetin sosial missiyasına müvafiq olaraq onun cəmiyyətdə nüfuzunun artırılması is­tiqamətində çoxşaxəli tədbirlər görülmüşdür. Ali məkətəbin elmi potensialının cəmiyyətin sosial problemlərinin həllinə, sosial-iqtisa­di proqramların həyata keçirilməsinə cəlb edilməsi məqsədilə ölkənin dövlət təşkilat­ları, nüfuzlu müəssisə və ictimai birlikləri ilə əlaqələr genişləndirilmiş, birgə sosial la­yihələrin sayı artırılmışdır. 

Dövlət və qeyri-hökumət təşkilatlarının, iri beynəlxalq və özəl şirkətlərin öz sosial la­yihələrini təqdim etdiyi platformaya çevril­məsi məqsədilə tərəfdaş qurumlarla birlikdə fəaliyyət planları tərtib edilmişdir. Univer­sitetdə ölkənin elmi, mədəni, sosial-iqtisadi problemlərinə həsr olunmuş yüksək səviyyə­li konfranslar, seminarlar və digər tədbirlər keçirilmişdir. 

Əmək bazarının mövcud tələbatını, yeni dövrdə mütəxəssislərdən tələb olunan əsas bacarıqları öyrənmək, bu tələbatın kadr ha­zırlığında nəzərə alınması, eləcə də univer­sitet – sənaye işbirliyinin yaradılması, tədris prosesinə sənayedə çalışan mütəxəssislərin cəlb olunması, tələbələrin istehsalatda yeni meyarlarla təcrübə keçməsi, həmçinin birgə layihələrin, elmi-tədqiqat işlərinin aparılma­sı məqsədilə hazırda BDU 57 dövlət, özəl və qeyri-hökumət təşkilatı ilə əməkdaşlıq edir, birgə layihələr həyata keçirir. 

BDU-nun 100 illik yubileyindən sonra keçən 5 il ərzində bir sıra mühüm layihələr həyata keçirilmişdir. Bunlara misal olaraq, “Azərbaycan məcburi köçkünlərinin pozul­muş hüquqlarına dair kompleks beynəlxalq hesabat”ı, “Vətən müharibəsi dövründə yer­li və xarici medianın fəaliyyətinin təhlili”, “Azərbaycan Respublikasının tarixi (1991-2021)“ 2 cildlik kitabının hazırlanması, "Heydər Əliyev: dil, ədəbiyyat və incəsənət" nəşrinin hazırlanması və s. göstərmək olar. Bu layihələr BDU-nun professor-müəllim heyəti tərəfindən yüksək peşəkarlıqla yerinə yetirilmiş və ictimaiyyətə təqdim edilmişdir. 

Bu gün BDU kollektivi və tələbələri Azərbaycan Respublikasında 2024-cü ilin “Yaşıl dünya naminə həmrəylik ili” elan edilməsi haqqında Prezident İlham Əliyevin sərəncamına uyğun olaraq bu istiqamətdə öz fəaliyyət istiqamətini müəyyənləşdirmiş, “Yaşıl dünya naminə həmrəylik ili” ilə əlaqə­dar bir sıra tədbirlər, layihələr həyata keçir­məkdədir. 

Qalib və qüdrətli ölkəmizin gündən-günə inkişaf etməsi, elm və təhsildə əldə olunan nailiyyətlər BDU kollektivini və tələbələ­rimizi doğma universitetimizin 105 illik yubileyini yüksək təntənə ilə qeyd etməyə həvəsləndirir, hər birimizdə sonsuz qürur hissləri yaradır. Əminik ki, möhtərəm Prezi­dentimizin diqqət və qayğısı ilə əhatələnən 105 yaşlı BDU yeni yubileyi ərəfəsində zən­gin ənənələrini daha da inkişaf etdirəcək. Ali məktəb beynəlxalq təcrübədən, dünya elmi­nin nailiyyətlərindən faydalanaraq, Azərbay­can xalqına və beynəlxalq ictimaiyyətə elmi əsaslara, milli və mədəni dəyərlərə söykənən və müasir dövrün tələblərinə cavab verən kadrlar hazırlamaq missiyasını uğurla davam etdirəcək. 

BDU-nun 105 illik yubileyi münasibətilə universitetimizin kolektivini, məzunlarımızı və çoxsaylı tələbələrimizi səmimi təbrik edir, onlara fəaliyyətlərində yeni uğurlar arzulayı­rıq.

Elçin BABAYEV,
Bakı Dövlət Universitetinin rektoru