Bu tədris ilində ölkəmizin sayca artan məktəbləri sırasında işğaldan azad olunmuş ərazilərdəki yeni təhsil ocaqları da olub. Qarabağda 6 məktəbdə ilk zəng çalınıb. Həmin məktəblərdə, ümumilikdə, 780 şagird təhsilə cəlb edilib və onlara 94 müəllim dərs deyir.
Prezident İlham Əliyevin ötən il sentyabrın 21-də Laçın şəhərinə səfəri zamanı üçrəngli dövlət bayrağımızı ucaltması, “Laçın” Qovşaq Yarımstansiyasının təməlqoyma mərasimində iştirakı, habelə rayonun işğaldan azad olunmuş Zabux və Sus kəndlərinin layihələndirilməsi və tikinti işləri, eləcə də Laçın şəhər 2 nömrəli tam orta və Zabux kənd orta məktəbinin bərpası və tikintisi üçün maliyyə vəsaiti ayrılması barədə sərəncamlar imzalamasını bütün laçınlılar kimi, pedaqoji işçilər də hədsiz sevinc və minnətdarlıq hissi ilə qarşılayıblar. Peşə bayramı ərəfəsində isə rayondan gənc müəllim İqbal Mirzəyevin “Tərəqqi” medalına layiq görülməsi bütün laçınlı pedaqoqların əməyinə verilən yüksək qiymət kimi dəyərləndirilir.
Bu il Müəllimlər Gününü daha böyük fərəhlə qeyd edən Laçın rayonunun təhsil işçiləri onu da fəxrlə xatırlayırlar ki, avqustun 25-də Prezident İlham Əliyev və birinci xanım Mehriban Əliyeva rayon mərkəzindəki 2 nömrəli tam orta məktəbin əsaslı təmirdən sonra açılışında, ertəsi gün isə Həkəri çayının sahilində keçirilən “Laçın Şəhəri Günü” tədbirlərində iştirak ediblər. Qeyd edək ki, daha öncə dövlət başçısı özünün 50 illik yubileyini Ağcabədi rayonunun Taxtakörpü qəsəbəsində laçınlı köçkünlərlə, Mehriban xanım isə ad gününü Laçın sakinləri ilə birlikdə keçiriblər.
Cari tədris ilində Laçındakı 2 nömrəli məktəbdə 137 şagirddən ibarət 11 sinif təşkil edilib və 16 müəllim burada tədris aparır. Məktəbin şagird tutumu daha çoxdur. Burada geniş laboratoriya və fənn kabinetləri, texnologiya və informatika otaqları, kitabxana, idman zalı, 182 yerlik akt zalı var.
Bir vaxtlar (6 yaşında) doğma yurdunu tərk etməyə məcbur olub Ağcabədiyə köçən, sonra Bakıda ali təhsil alan Şəbnəm Cəbrayıl ixtisasca ingilis dili müəllimidir. Laçına qayıtmasından qürur duyur. Bunun üçün Taxtakörpü məktəbindəki direktor vəzifəsindən imtina edib. Şəbnəm xanım təyinatla Taxtakörpüyə gedəndə həmin məktəbdə ali təhsilli ingilis dili müəllimi yox idi. Son dövrlərdə isə Azərbaycan Dillər Universitetinə həmin ixtisas üzrə 21 gənc yola salınıb. “Bunun müəllim kimi fəaliyyətimin nəticəsi olduğunu düşünürəm və ilk növbədə laçınlılar üçün uğurlu, faydalı olacağı qənaətindəyəm”, – deyir Şəbnəm müəllim.
Onu da qeyd edək ki, Taxtakörpü məktəbindəki uğurlarına görə gənc direktor 2019-cu ildə “Azərbaycan Respublikasının qabaqcıl təhsil işçisi” döş nişanı ilə təltif edilib. İndi o, atası Tofiq Əhmədovun, nənəsi Şəfiqə Baxışovanın uzun illər çalışdıqları 2 nömrəli tam orta məktəbdə müəllim olmaqla yanaşı, həm də tədris işləri üzrə direktor müavini vəzifəsini icra edir.
Onun iki qızı – Dəniz və Günəş də Laçındakı təzə məktəbdə dərsə gedirlər. Dəniz 6-cı, Günəş isə 2-ci sinif şagirdidir. İşğal dövründə Şəbnəm müəllimgilin evində ermənilər yaşayıb və buranı yararsız hala salıblar. “Evimiz qoyub getdiyimiz kimi deyildi, təkcə dörd divarı olduğu kimi dururdu. Ermənilər buralara müvəqqəti sahib çıxdıqlarını bildikləri üçün bizdən sonra evə heç əl gəzdirməyiblər. Atam rəssam idi, divarları öz əl işi ilə bəzəmişdi. Əl işləri solsa da, qalırdı. Bir vaxtlar altında oynadığımız ağacları da ermənilər qrad mərmiləri ilə dağıtmışdılar. Yerində yeni ağaclar əkmişik. Yəni, ərazi dəyişsə də, xatirələrimdə elə o vaxtlar olduğu kimi canlanır. Qızlarımla söhbətlərimdə o xatirələri çözələməkdən özümü saxlaya bilmirəm”.
Laçında daha bir pedaqoq – ixtisasca ibtidai sinif müəllimi olan Ülviyyə Cəfərova hər səhər məktəbə 2 övladı ilə gedir. O hələlik müəllim kimi çalışmır, məktəbdə Uşaq Birliyinin yerli rəhbəri kimi fəaliyyət göstərir. Böyük qızı Fatimə 9-cu, Zəhra isə 3-cü sinifdə oxuyur. Fatimə peşə bayramları münasibətilə sevimli müəllimlərini təbrik edərək deyib: “Pedaqoqlarımıza çox güvənirəm. Məktəb də, buradakı mühit də əladır. Çox maraqlı dərnəklər təşkil edilib. Coğrafiya, Azərbaycan dili, riyaziyyat, ingilis dili fənlərini çox sevir, həvəslə oxuyuram. Müəllimlərimiz həm bu fənlər üzrə biliyimi, həm də, ümumiyyətlə, bacarıqlarımı artırmaqda mənə lazımi köməklik göstərirlər”.
Onu da deyək ki, tezliklə Ədalət Məmmədov adına Zabux kənd tam orta məktəbində də tədris prosesinə start veriləcək. Orada təhsil alacaq şagirdlər məktəb fəaliyyətə başlayanadək müvəqqəti olaraq Laçın şəhərindəki yeni məktəbdə təhsillərini davam etdirirlər. Sus kəndində də məktəb tikintisinə başlanılıb.
Bəli, gözləri zəfər ziyası ilə işıqlanan laçınlı müəllimlər uzun fasilədən sonra doğma yurdda peşə bayramını keçirməkdən, şagirdlərinin zehnini nurlandırmaqdan son dərəcə məmnundurlar.
Ə.ƏLİYEV
XQ