Bu gün ən müqəddəs peşə sahiblərinin bayramıdır, desək, yanılmarıq. Çünki hər birimizin üstündə müəllimlərin böyük əməyi var. Şagirdlərinin gözündə elm, bilik işığı yandıran müəllimlərdən ibarət fədakar bir kollektiv də azadlığına qovuşmuş Zəngilan rayonunun Ağalı kənd tam orta məktəbində çalışır.
Bütün ölkədə olduğu kimi, Ağalı məktəbində də adi iş günlərindən biridir, amma bir qədər bayram əhvallı gündür. Məktəbin gənc direktoru Nərmin Həsənova dedi:
– İşğaldan azad olunmuş Zəngilan rayonunun Ağalı kənd orta məktəbinin rəhbəri kimi bu bayramı qeyd etmək bir başqa duyğudur. Məktəbimizin açılışı 2022-ci il sentyabrın 15-də olub. Şagirdlərimiz, müəllimlərimiz, bütün sakinlərimiz doğma yurdda yaşadıqları üçün çox sevinclidirlər. Bu, adamda, doğrudan da, çox gözəl ovqat yaradır. Həm də biz müəllimlərin üstündə sabaha hazırladığımız uşaqlara görə böyük məsuliyyət yükü var. Mən bundan əvvəl Zəngilan rayon 14 nömrəli məktəbdə tarix müəllimi işləmişəm. Direktorluğa imtahan verdim və qərara gəldim ki, Ağalı kənd orta məktəbinə gəlim, təklifimi qəbul etdilər, məni göndərdilər bu məktəbə.
Nərmin müəllim həyatının daha bir unudulmaz günündən də iftixarla bəhs etdi:
– Ötən il mayın 27-si idi. Biz həmin gün Ağalıda cənab Prezidentimizlə və Mehriban xanımla görüşdük. Görüş zamanı Mehriban xanım məni Ağalı kənd tam orta məktəbinə direktor təyin olunduğum üçün təbrik etdi və gənc ailəmizə öz xeyir-duasını verdi. Xatirə şəkilləri çəkdirdik. Həqiqətən, möhtəşəm gün idi.
Ağalı müəllimləri buraya ilk köçən sakinlərdir. Təzə məktəbin, pedaqoqların üzərinə çox məsul vəzifə düşüb. Məktəb 360 şagird yerlikdir. Şagirdlərə biliklə bərabər, doğma torpaqlarımızın tarixi haqqında daha çox məlumat verilməli, güclü vətənpərvərlik ruhu aşılanmalıdır ki, yurd yerlərinin qədrini bilsinlər, dostu-düşməni tanısınlar.
Nərmin müəllim onu da vurğuladı ki, şagird müəllimini sevməsə onun tədris etdiyi fənni oxuyub öyrənə bilməz: “Elə bilirəm ki, qısa müddətdə bunu edə bilmişik və edəcəklərimiz də hələ çoxdur. Buraya dönmüş ilk sakinlər kimi, həm təhsilin inkişafında, həm milli adət-ənənələrin qorunmasında və təbliğində üzərimizə çox böyük yük və məsuliyyət düşür”.
Qeyd edək ki, 2021-ci ilin aprelin 26-da Prezident İlham Əliyev tərəfindən Zəngilanın 1-ci, 2-ci, 3-cü Ağalı kəndlərini əhatə edən birinci “Ağıllı kənd” layihəsinin təməli qoyulub. Qısa müddətdə “Ağıllı kənd” layihəsinin mərhələli açılışları olub. Azərbaycan Prezidenti İlham Əliyev və Birinci vitse-prezident Mehriban Əliyeva mərasimdə iştirak ediblər. Ağalı kənd sakinlərinin ilk qrupu 2022-ci il iyulun 19-da, ikinci qrupu isə sentyabrın 7-də və 10-da doğma yurdlarına qayıdıblar.
Direktor sonda onu da dedi ki, qarşıda görüləsi işlər çoxdur: “Ağalı kəndində təhsilin yüksək səviyyədə olmasına daha çox diqqət yetirəcəyik. Bunun üçün hər cür şərait yaradılıb. Məktəb hazırda mövcud olan bütün innovativ texnologiyalarla təmin edilib. Təhsil müəssisəsində olan avadanlıqlar müasir standartlara cavab verir, ağıllı və smart lövhələrimiz var. Həmçinin, kitabxanamız xeyli zəngindir”.
R.QURBANLI
XQ
