Novruz Bayramı münasibətilə Samux rayonu ərazisində sakinlər üçün xüsusi bayram yarmarkası təşkil olunub.

Tədbirdə rayon icra hakimiyyətinin başçısı Firdovsi Əliyev, icra hakimiyyətinin əməkdaşları, müxtəlif idarə və müəssisələrin rəhbərləri, şəhid ailələri və çoxsaylı rayon sakinləri iştirak ediblər. Yarmarka həm sosial, həm də bayram ab-havası baxımından diqqət çəkib.

Yarmarka Samux şəhərində yeni salınmış park ərazisində keçirilib. Burada kənd təsərrüfatı məhsulları bazar qiymətlərindən 20–30 faiz daha ucuz qiymətə satışa çıxarılıb. Ümumilikdə 11 tona yaxın müxtəlif növ məhsul sakinlərə təqdim olunub ki, bu da alıcılar tərəfindən böyük maraqla qarşılanıb.

Yarmarkanın əsas məqsədi Novruz Bayramı ərəfəsində əhalinin keyfiyyətli və münasib qiymətli ərzaq məhsulları ilə təmin olunmasına dəstək göstərmək olub. Eyni zamanda bu təşəbbüs yerli istehsalçıların məhsullarının satışına şərait yaradaraq onların fəaliyyətinə dəstək verməyə xidmət edib.

Hamlet Qasımov
XQ-nin Gəncəbasar müxbiri