Antiterror tədbirlərinin iştirakçısı, qazi Elmar Elxan oğlu Ağayev antiterror əməliyyatında azğın ermənilərə qarşı igidliklə vuruşub. 

Elmar 2004-cü ildə Lerik rayonunun Noda kəndində anadan olub. 2022-ci ildə hərbi xidmətə çağırılıb və kəşfiyyat qrupunda xidmətə başlayıb. Ötən il tə­limlərdə öyrəndiklərini lokal antiterror tədbirləri zamanı bacarıqla tətbiq edə bi­lib. Gərgin döyüşdə ciddi xəsarət almış yoldaşları ilə müalicə almaq üçün Ağdam Mərkəzi Xəstəxanasına göndərilib. Müa­licədən sonra yenidən qulluq etdiyi hərbi hissəyə qayıdaraq, Vətənə xidmətini da­vam etdirib.

Qazi Elmar Ağayevin dedikləri:

– Həmin vaxt ərazi bütövlüyümü­zün tam bərpası bütün əsgər heyətimizin tək arzusu olub. Bunun üçün son dam­la qanımıza kimi vuruşmağa hazır idik. Sentyabrın 19-da səhər saatlarında kəş­fiyyat qrupumuz komandir Kamran Cəb­rayılovun rəhbərliyi ilə Ağdam–Ağdərə arasında mövqe tutdu. Orada ağır, gərgin döyüşlərdə silahı yerə qoymayan erməni terrorçu qruplaşmasının çox sayda əsgə­rini məhv etdik. Sərrast atəşlərlə düşməni pərən-pərən saldıq. Kəşfiyyat dəstəmiz­dən ciddi xəsarət alanlar olsa da, sona qədər inamla irəliləyirdik. Azərbaycan Ordusunun qarşısında tab gətirə bilməyən separatçı dəstələri sentyabrın 20-də ağ bayraq qaldıraraq təslim olmaq tələbinə boyun əydilər. 

Bu gün fəxr edirəm ki, ərazi bütöv­lüyümüzün tam təmin olunması uğrun­da vuruşan Vətən oğullarından biriyəm. Bundan sonra da hər zaman şanlı Azər­baycan Ordusunun formasını geyinərək Vətənimizin müdafiəsinə qalxmağa hazı­ram. 

Elmarın valideynləri – atası Elxan kişi, anası Əfsanə xanım onunla fəxr et­diklərini vurğulayıb deyirlər ki, minlərlə qəhrəman Vətən oğulları kimi, Elmarın da torpaqlarımızın namərd ermənilərdən təmizlənməsi uğrunda gedən döyüşlərdə iştirakının qürurunu yaşayırlar. 

Sonda qeyd edək ki, Elmarın ötən il lokal xarakterli antiterror tədbirlərində göstərdiyi hünəri “Şücaətə görə” medalı ilə qiymətləndirilib.