Düşmənə sarsıdıcı zərbələr endirən Azərbaycanın dəmir qanadlı şahinləri də milli hərbi aviasiya tariximizə şanlı səhifələr yazıblar. Onlar müharibə zamanı döyüş uçuşları aparıb, hava məkanını qorumağa və aldadıcı manevrlər edərək üstünlüyü əldə saxlamağa nail olublar. İgid şahinlərdən biri də lokal antiterror tədbirlərində şəhid olmuş Elcan Balabəyli idi.
Elcan 1992-ci ildə Naxçıvan şəhərində doğulub. Əvvəlcə oradakı Heydər Əliyev adına Hərbi Liseydə, sonra Azərbaycan Ali Hərbi Təyyarəçilik Məktəbində oxuyub. 2014-cü ildə təhsilini hava hücumundan müdafiə ixtisası üzrə başa vuraraq leytenant hərbi rütbəsi alıb. Bir il Azərbaycan Ordusunun Təlim-Tədris Mərkəzində təkmilləşdirmə kursu keçib. 2015-ci ildən Azərbaycan Silahlı Qüvvələri sıralarında nümunəvi zabit kimi xidmət edib, kapitan hərbi rütbəsinə qədər yüksəlib.
Döyüş və ictimai-siyasi hazırlığın yüksəldilməsində, hərbi intizamın möhkəmləndirilməsində əldə etdiyi nailiyyətlərə görə dəfələrlə yuxarı komandanlıq tərəfindən diplom və fəxri fərmanlarla təltif olunan Elcan Balabəyli 2016-cı ilin aprel döyüşlərində, 2022-ci ilin qisas əməliyyatında fəallıq göstərib. 27 sentyabr 2020-ci ildə başlanan Vətən müharibəsinə qatılıb, 3 gün sonra Füzuli rayonu istiqamətində yaralanıb. Müalicəsi tamamlanmamış təkidlə yenidən xidmət yerinə qayıdıb, döyüş yolunu Şuşaya qədər davam etdirib.
Ötən ilin sentyabrında Qarabağda lokal xarakterli antiterror tədbirləri zamanı Ağdərə istiqamətində gedən döyüşlərdə düşmənin snayper atəşinə tuş gələrək, qəhrəmancasına şəhid olub.
Qəhrəman şəhidimiz 20 sentyabr 2023-cü ildə doğulduğu Naxçıvan şəhərində torpağa tapşırılmışdır. “Vətənə xidmətə görə” ordeninə, “İgidliyə görə”, 3-cü dərəcəli “Qüsursuz xidmətlərə görə”, Füzulinin, Xocavəndin və Şuşanın azad olunmasına görə medallarına və digər təltiflərə layiq görülmüşdür.
