Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə “Aktor” İctimai və Sosial Tədqiqatlar İctimai Birliyi “İctimai və sosial bəla: narkomaniya!” layihəsi çərçivəsində tədbir keçirib.
Qərbi Azərbaycan İcmasının Sumqayıt şəhəri üzrə nümayəndəliyində təşkil edilən görüşdə ictimai birliyin sədr müavini, layihənin rəhbəri Telman Məmmədov narkomaniya ilə mübarizə çərçivəsində təmsil etdiyi təşkilatın təşəbbüs və ideyalarını dəstəklədiyinə görə, QHT-na Dövlət Dəstəyi Agentliyinin və Qərbi Azərbaycan İcmasının rəhbərliyinə təşəkkürünü bildirib. Əlavə edib ki, agentlik hər il elan etdiyi müsabiqələrdə “ağ ölüm”lə mübarizə mövzularına xüsusi həssaslıqla yanaşır.
T.Məmmədov tədbirin keçirilməsi üçün Sumqayıt şəhərinin təsadüfi seçilmədiyini diqqətə çatdırıb. Bildirib ki, şəhər üzrə son statistik göstəricilər qənaətbəxş deyil. Məsələn, 2022-ci il üzrə narkotiklərlə bağlı Narkomanlığa və Narkotik vasitələrin Qanunsuz Dövriyyəsinə qarşı Mübarizə üzrə Dövlət Komissiyasından alınan məlumata görə, təkcə Sumqayıt şəhəri üzrə 2832 cinayət faktı qeydə alınıb. Bu bəla ilə mübarizədə cəmiyyətin səfərbər olmasını vacib sayan layihə rəhbəri nəzərə çatdırıb ki, narkomaniyanın yayılması millətin sağlam həyat tərzi üçün böyük təhlükədir. Narkotik maddələrin qəbul edilməsi ilə insan fiziki və psixoloji cəhətdən məhv olur. Narkomaniya yaddaş və təfəkkürü pozur, həyati proseslərə qarşı laqeydlik yaradır. Cəmiyyətin böhranlı dövründə narkomanlıq artır, sosial münasibətlərə mənfi təsir göstərir.
Narkomaniya ilə mübarizə çərçivəsində əsasən gənclərlə maarifləndirmə işinin aparılmasını vacib sayan Sumqayıt şəhəri polis idarəsinin İctimai Təhlükəsizlik şöbəsinin Yetkin Yaşa Çatmayanlarla Profilaktik işin təşkili şöbəsinin rəisi, polis mayoru Azər Bağırov narkotik vasitələrin təsnifatına, hər keçən il çeşidlənən növünə aydınlıq gətirib. Onun sözlərinə görə, Azərbaycan gənci zərərli vərdişlərin qurbanı deyil, Qarabağ boyda problemin həllində iştirak etmiş fədailəridir. Sumqayıt ərazisində törədilən cinayət işlərinin, oğurluq hadisələrinin çoxunda narkomanların iştirak etdiyini söyləyən şöbə rəisi xatırladıb ki, bu problemlərdən xilas olmaq üçün vətəndaşlar da səy göstərməli, bu faciə yaradan məsələyə qarşı etinasız qalmamalıdılar. Ölkəyə narkotik vasitələrin əsasən, İrandan keçirildiyini vurğulayan polis mayoru nəzərə çatdırıb ki, bütün hallarda Sumqayıtda bu problemin neytrallaşdırılması üçün lazımı qabaqlayıcı addımlar atılır.
Sumqayıt şəhər Narkoloji dispanserinin şöbə müdiri, həkim narkoloq Vüsal Cabbarov da “ağ ölüm”ün təhlükələrindən söz açıb. Onun sözlərinə görə, texniki imkanların genişlənməsi narkotik vasitələrin növünün artmasına təkan verib. Bu isə, öz növbəsində zərərli vərdişlərlə mübarizədə ciddi çətinliklər yaradır, tibb yetərincə yüklənir, həkimlər bəzən aciz qalırlar. O, sonra tədbir iştirakçılarına insanlar arasında narkomanları davranışdan necə tanımağın yolunu izah edib.
Ekspert Cəmilə Fəyyaz, “Aktor” İctimai və Sosial Tədqiqatlar İctimai Birliyinin sədri Sürəyya Məmmədova və digər qonaqlar mövzu ilə bağlı fikirlərini bölüşüblər. Bildiriblər ki, cəmiyyətdə bir problem digərini yaradır. Çıxış edənlər bu problemlə mübarizədə hər kəsi həssas olmağa çağırıblar.
Tədbirin sonunda iştirakçılar öz fikirlərini bildirib, zərərli vərdişlər, o cümlədən narkomaniya ilə mübarizə üçün təkliflərini səsləndirib, ekspertlərə suallar veriblər.
Zərifə HÜSEYNOVA
XQ
