4 min 133 qaziyə əlillik təyin edilib 

Dövlət Tibbi-Sosial Ekspertiza və Reabilitasiya Agentliyi indiyədək 4 min 133 nəfər Vətən müharibəsi iştirakçısına əlillik təyin edib. Əlilliyi təsdiqlənənlərin hər birinə proaktiv qaydada sosial ödə­nişlər təyin olunub.

Əlilliyin qiymətləndirilməsində obyek­tivliyin və şəffaflığın, ədalətli yanaşmanın təmin olunması daim diqqətdə saxlanılır. Agentlik bu kateqoriyadan olanların ope­rativ və əyani müayinə olunmaları üçün müasir diaqnostik, instrumental, labora­tor avadanlıqlarla təchiz edilib. Qiymət­ləndirmə prosesində şəffaflığın təmin olunması məqsədilə müayinələrin foto və videoçəkilişləri də aparılır.

Hərbi səbəblə əlaqədar əlilliyin təyin edilməsi üçün vətəndaşa Hərbi Həkim Komissiyası şəhadətnamə təqdim et­dikdən və qeydiyyatda olduğu səhiyyə müəssisəsi elektron göndərişi (forma 88) rəsmiləşdirdikdən sonra agentlikdə mü­vafiq dövlət qurumlarının nümayəndələ­rindən ibarət komissiya əyani müayinə həyata keçirir.

203 mindən çox işsiz məşğulluq tədbirləri ilə əhatə olunub

Dövlət Məşğulluq Agentliyi yanvar–iyun aylarında 203 min 100 şəxsi aktiv məşğulluq tədbirləri ilə əhatə edib.

Onlardan 84 min 400 nəfərin müna­sib işlərlə təminatı həyata keçirilib. 1,9 min şəxs isə özünüməşğulluq proqramı çərçivəsində kiçik ailə təsərrüfatlarını yaratmaları üçün aktivlərlə təmin olunub. Qeyd olunan dövrdə agentlik 8 min 500 işsiz və işaxtaran üçün peşə hazırlığı kursları təşkil edib, 108 min 300 şəxsə peşəyönümü xidmətlər göstərib.

22 əlil uşaq övladlığa verilə bilər

Sosial Xidmətlər Agentliyinin valideyn himayəsindən məhrum olmuş uşaqlar üçün sosial xidmət müəssisələrində, uşaq evi və internat müəssisələrində və Uşaq Psixonevroloji Mərkəzində 22 əlil uşağın övladlığa verilə bilməsi müəyyən olunub. Onlar barədə məlumatlar nazir­liyin “Valideyn himayəsindən məhrum olmuş uşaqlar, himayədar ailə və övladlı­ğagötürmə” altsisteminə daxil edilib.

Övladlığa veriləcək həmin uşaqlar üçün fərdi inkişaf planı hazırlanıb. Bu za­man uşaqların yaşı, sağlamlığı, istəkləri, bacarıq və digər xüsusiyyətləri nəzərə alınıb. Qeyd edək ki, valideyn himayə­sindən məhrum olmuş uşaqlar üçün so­sial xidmət müəssisələrindən övladlığa götürülən əlil uşağa görə, onu övladlığa götürən şəxs üçün aylıq 600 manat müa­vinət nəzərdə tutulub. Bu müavinətin üzərinə uşağın orqanizmin funksiyaları­nın pozulması dərəcəsinə uyğun məbləğ də əlavə edilir. 

Beləliklə, sosial xidmət müəssisələ­rindəki əlil uşağın övladlığa götürülmə­sinə görə aylıq sosial ödənişin ümumi məbləği uşağın əlillik göstəricisi 81–100 faiz olduqda, 1170 manat (gözdən əlilliyə görə olduqda, 1270 manat), 61–80 faiz olduqda, 920 manat, 31–60 faiz olduqda, 850 manat təşkil edir.

128 min şəxsə 350 min xidmət 

Vətən müharibəsindən sonra həyata keçirilən genişmiqyaslı sosial dəstək pa­keti çərçivəsində şəhid ailələri üzvləri və müharibə veteranları olan 105 min nəfərə 118 min aylıq sosial ödəniş, 23 min 200 şəxsə birdəfəlik ödəmə təyin olunub. 

Şəhid ailələri, müharibə ilə əlaqədar əlil olan şəxslərin mənzillə təminatı proq­ramı 5 dəfə genişlənib, onlara 6 min 72 mənzil və fərdi ev, müharibə ilə əlaqədar əlil olan şəxslərə 528 avtomobil təqdim edilib. Şəhid ailələri üzvləri və müharibə iştirakçıları olan 11 min şəxsə 65 min 600 sosial-psixoloji dəstək və reabilitasiya xidməti göstərilib. Bundan başqa, mü­haribə ilə əlaqədar əlilliyi olan 2 min 173 şəxs 58 min 700 reabilitasiya vasitəsi, o cümlədən 476 şəxs 572 ədəd yüksək texnologiyalı müasir protezlə təmin olu­nub. Şəhid ailələri üzvləri və müharibə iştirakçıları olan 22 min şəxs işə düzəlib, 10 min 600 şəxs özünüməşğulluq proq­ramına cəlb olunub.

Postmüharibə dövründə qeyd olunan sosial dəstək paketi 128 min şəxsi əhatə edərək, onlara dəstək yönümlü 350 min xidmət göstərilib.

476 hərbçiyə müasir protez verilib

Prezident İlham Əliyevin tapşırığına əsasən, müharibə ilə əlaqədar əlilliyi olan şəxslərin sosial dəstəklə əhatə olunma­sı və reabilitasiyası üçün aparılan işlərin bir istiqaməti də həmin şəxslərin yüksək texnologiyalı, son nəsil protezlərlə təmin edilməsidir.

Vətən müharibəsindən sonra Əmək və Əhalinin Sosial Müdafiəsi Nazirliyi I və II Qarabağ müharibəsi ilə əlaqədar əlil olan 476 hərbçini 572 ədəd yüksək tex­nologiyalı, son nəsil protezlə təmin edib. Ötən ildən Vətən müharibəsi iştirakçıları­nın müasir idman protezləri ilə təminatına da başlanılıb.

Aktivlik və funksionallığı ilə seçilən yüksək texnologiyalı protezlərlə istifadəçi sərbəst hərəkət imkanına malik olur. Bu protezlərlə sosial həyata daha tez və ra­hat inteqrasiya edir, hətta idmanla məş­ğul olaraq idman yarışlarında da iştirak edə bilir.

Çağırışçıların yekun tibbi müayinəsi

Bir sıra kateqoriyalar üzrə rəy verilmiş müddətli həqiqi hərbi xidmətə çağırılan­ların tibbi şəhadətləndirilməsi zamanı ye­kun tibbi müayinələr Dövlət Tibbi-Sosial Ekspertiza və Reabilitasiya Agentliyinin nəzdində yaradılmış Tibbi Qiymətləndir­mə Mərkəzində aparılır.

Mərkəzdə ixtisaslaşmış peşəkar hə­kim-mütəxəssislər 4 kateqoriya üzrə – sı­radankənar həqiqi hərbi xidmətə yararlı­lıq haqqında (B kateqoriyası); sağlamlıq vəziyyətinə görə həqiqi hərbi xidmətə müvəqqəti yararsız hesab edilməklə çağırışa möhlət verilməsi haqqında (Ç kateqoriyası); dinc dövrdə həqiqi hərbi xidmətə yararsızlıq, müharibə dövründə məhdud yararlılıq haqqında (C kateqori­yası); həm dinc dövrdə, həm də müha­ribə dövründə hərbi xidmətə yararsızlıq haqqında (D kateqoriyası) rəy verilmiş çağırışçıların yekun tibbi müayinəsinə başlayıblar. 

Sonda müayinəyə dair qərar elekt­ron sistemə daxil ediləcək və bu barədə çağırışçıya elektron qaydada məlumat veriləcək.

Zərifə HÜSEYNOVA
XQ