Xroniki pankreatit mədəaltı vəzin iltihabi xəstəliyidir. Onkoloq Yelizaveta Vasilyeva pankreatitin xərçəngə çevrilmə ehtimalından danışarkən deyib ki, mədəaltı vəz xərçəngi tibdə ən təhlükəli və sürətli inkişaf edən xəstəlikdir.
Həkim onun ilkin mərhələdə aşkar etməyin, demək olar ki, mümkün olmadığını, tam simptomsuz inkişaf etdiyini bildirib: “Çox zaman isə hiyləgərcəsinə digər həzm problemləri altında gizlənir. Mədəaltı vəzin iltihabı, hüceyrələrinin nekrozu ilə nəticələnən pankreatit bu orqanda şişlərin yaranmasının əsas faktorlarından biridir. Əgər pankreatit irsidirsə, o zaman risk daha da artır.
Uzun illər davam edən, xüsusən nəzarət olunmayan pankreatitlər mədəaltı vəz xərçəngi riskini 25 dəfə artırır. Bu o deməkdir ki, mədəaltı vəz xəstəliyi olanlar maksimum diqqətli olmalıdırlar”.
Onkoloq mədəaltı vəz xərçənginin risk faktorlarından danışıb. Bildirib ki, çox siqaret çəkmək, alkoqol qəbulu, heyvani qızartma ət və yağlara meyillilik təhlükəsi yarada bilər. O, həmçinin mədəaltı vəz xərçənginin yaranmasında irsi faktorun və şəkər xəstəliyinin rolu olduğunu qeyd edib. Deyib ki, diabet xəstələrində 10 il sonra mədəaltı vəz çökə bilir. Tədqiqatlar sübut edib ki, məhz şəkərli diabetin olması artıq mədəaltı vəzin fəaliyyət və stukturunun pozulmasının ilk əlamətidir.
Z.HÜSEYNLİ
XQ