Bakının ən qədim kəndlərindən olan Keşlədəki məscid 4 əsr bundan əvvəl Şah Abbas zamanında tikdirilmişdir. Elə buna görə də o vaxtdan “Şah Abbas məscidi” adlanır. Əhəng daşı ilə kvadrat şəklində inşa olunmuş məscid və ətrafındakı 130 kvadratmetrlik yardımçı tikililər 4 əsrdir ki, müsəlmanların xidmətindədir.
Son illərdə paytaxtımızda və Bakıətrafı qəsəbələrdə aparılan tikinti-quruculuq və abadlaşdırma tədbirləri ilə bağlı qədim Keşlə məscidi də diqqətdən kənarda qalmayıb. Azərbaycan Respublikasının Prezidenti İlham Əliyevin təşəbbüsü ilə keçən il məsciddə əsaslı yenidənqurma və bərpa işləri görülüb.
Əvvəlcə Azərbaycan İnşaat və Memarlıq Elmi-Tədqiqat İnstitutunun əməkdaşları tərəfindən məscidə baxış keçirilmiş, mühəndis müayinəsi və texniki vəziyyəti haqqında rəy verilmiş, konstruksiya layihəsi hazırlanmışdır. Rəyə uyğun olaraq, bünövrədə möhkəmləndirmə, binada isə mövcud mikroçatların aradan qaldırılması məqsədilə lazımi işlər görülmüşdür.
Təmir və bərpa işləri aparılarkən binanın ilkin tarixi görünüşünün qorunub saxlanılmasına xüsusi diqqət yetirilmiş, məscidin və ətrafdakı tikililərin üzlük daşları yenilənmişdir.
Məscidin günbəz örtüyü yenisi ilə əvəz olunmuş və binanın memarlıq üslubuna uyğun olaraq, hündürlüyü 20 metr olan minarə inşa edilmişdir. Həyətdə imam üçün (70 nəfərlik) otaq, əlavə ibadət xana, (80 nəfərlik) ehsan zalı, dəstəmaz almaq üçün xüsusi yerlər, mətbəx, anbar, qazanxana, təsərrüfat otaqları tikilmiş və bərpa olunmuşdur.
Məscidin həyətinə daxil olmaq üçün iki yerdən giriş qapısı və ümumi memarlıq üslubunu tamamlayan 52 metr uzunluğunda hasar inşa olunmuşdur.
Keşlədəki Şah Abbas məscidi yerli əhəmiyyətli memarlıq abidəsi kimi, dövlət tərəfindən qorunur.
Q.PİRİYEV,
E. AĞALAROV (foto)
XQ