Dövlət başçısının tapşırıqları əsasında əhalinin sosial mü­dafiəsinin gücləndirilməsi, həssas qrupların qayğı ilə əhatə olunması istiqamətində aparılan ardıcıl sosial islahatlar, əldə olu­nan sosial nailiyyətlər ilbəil vətən­daşların sosial müdafiəsini güc­ləndirir. Bu fikirləri DOST İnklüziv İnkişaf və Yaradıcılıq Mərkəzində keçirilən 2023-cü ildə korporativ sosial məsuliyyət tədbirlərində fəal iştirakı ilə seçilən sosial tərəf­daşların mükafatlandırılması mə­rasimində əmək və əhalinin sosi­al müdafiəsi naziri Sahil Babayev səsləndirib. 

Mərasimdə gənclər və idman naziri Fərid Qayıbov, KOBİA İdarə Heyətinin sədri Orxan Məmmədov, Ombudsman Səbinə Əliyeva, Azərbaycan Sahibkar­lar Təşkilatları Milli Konfederasiyasının prezidenti Məmməd Musayev, Medianın İnkişafı Agentliyinin İcraçı direktoru Əh­məd İsmayılov, “Azərişıq” ASC-nin sədri Vüqar Əhmədov, Ailə, Qadın və Uşaq Problemləri üzrə Dövlət Komitəsinin sədr müavini Sədaqət Qəhrəmanova, Azər­baycan Həmkarlar İttifaqları Konfedera­siyasının sədr müavini Cavanşir Alxasov, Ədliyyə Nazirliyinin Penitensiar Xidməti­nin rəis müavini Oqtay Məmmədov, de­putatlar Məlahət İbrahimqızı, Arzu Nağı­yev, Vüqar İskəndərov, Fatma Yıldırım, digər hökumət və qeyri-hökumət qurum­larının nümayəndələri və işəgötürənlər iştirak ediblər. 

S.Babayev aktiv məşğulluq proq­ramlarının, o cümlədən özünüməşğulluq proqramının da ildən-ilə genişləndiyini, məşğulluğun təminatı istiqamətində gö­rülən işləri qeyd edib. Məşğulluq proq­ramlarının icrasında, həssas qrupların məşğulluğunun təminatı sahəsində so­sial tərəfdaşların göstərdiyi dəstək, bu sahədə özəl sektora aid şirkətlərlə birgə aparılan işlər diqqətə çatdırılıb. Habelə şəhid ailələrinin üzvləri və müharibə iş­tirakçılarının məşğulluğuna dəstək işlə­rində sosial tərəfdaşlarla fəal əməkdaşlıq təcrübəsinin olduğu vurğulanıb. 

Digər çıxış edənlər özəl sektorun həssas qruplara yönələn dəstək proq­ramlarında, onların məşğulluq məsələlə­rinin həllində sosial tərəfdaşlar olaraq fəal iştirakını yüksək dəyərləndiriblər. Qeyd edək ki, korporativ sosial məsuliy­yət tədbirlərində fəal iştirak edən sosial tərəfdaşların 2022-ci ildən nazirlik tərə­findən hər il üzrə mükafatlandırılması tədbirləri keçirilir. Budəfəki tədbirdə də 11 nominasiya üzrə sosial tərəfdaşlara mükafatlar təqdim edilib. Şəhid ailələ­ri üzvlərinin, müharibə iştirakçılarının, əlillərin, qadınların, gənclərin, pensiya yaşına iki ildən az qalmış şəxslərin, cə­zaçəkmə yerlərindən azad edilənlərin məşğulluğunun təminatına dəstək verən ən aktiv özəl sosial tərəfdaşlara, habelə “Əmək və Məşğulluq” altsistemi üzərin­dən göndərişlər əsasında ən çox əmək müqaviləsi bağlayan və bu altsistemə ən çox vakansiya yerləşdirən özəl sosial tərəfdaşlara mükafatlar təqdim edilib. 

Sosial sahədə həyata keçirilən isla­hatlardan danışarkən onu da qeyd etmək yerinə düşər ki, Dövlət Məşğulluq Agent­liyi ilə Qazaxıstan Respublikasının Əmək və Əhalinin Sosial Müdafiəsi Nazirliyi yanında Əmək Resurslarının İnkişafı Mərkəzi arasında Fəaliyyət Planı da im­zalanıb. Fəaliyyət Planını agentliyin idarə heyətinin sədri Mustafa Abbasbəyli və Qazaxıstanın Əmək Resurslarının İnki­şafı Mərkəzinin prezidenti Daulet Arqan­dıkov imzalayıblar. 

Mərasimdə M.Abbasbəyli Azərbay­can və Qazaxıstan arasında ikitərəfli əlaqələrdən bəhs edib, məşğulluq sahə­sində əlaqələrin genişlənməsinə xüsu­si önəm verildiyini vurğulayıb. Agent­liyin fəaliyyət istiqamətləri, məşğulluq sahəsində aparılan islahatlar, əldə olu­nan nailiyyətlər barədə məlumat verib. D.Arqandıkov rəhbərlik etdiyi qurumun xidmətlərindən bəhs edib. Fəaliyyət Planı üzrə həyata keçiriləcək əməkdaş­lığın qarşılıqlı faydalı olacağını bildirib. Qarşılıqlı əlaqələrin və birgə fəaliyyətin təkmilləşdirilməsi məqsədilə imzalanan və 2024-cü ili əhatə edən plan əmək münasibətlərinin rəqəmsallaşdırılması, peşə hazırlığı, işsiz şəxslərin məşğulluq imkanlarının artırılması istiqamətlərində əməkdaşlığı nəzərdə tutur.

Bundan başqa, Dünya Bankı Qrupu­nun “Business Ready” reytinq hesabatı­nın “İşçi qüvvəsi” indikatoruna dair biznes subyektləri ilə məlumatlandırma görüşləri də davam etdirilir. Ölkəmizin aparıcı kon­saltinq şirkətlərinin nümayəndələri ilə keçirilən növbəti görüşdə əmək və əha­linin sosial müdafiəsi nazirinin müavini, Biznes mühiti və beynəlxalq reytinqlər üzrə Komissiyanın Əmək bazarı üzrə işçi qrupunun rəhbəri Anar Kərimov aparılan işləri diqqətə çatdırıb. Ölkəmizdə əmək bazarının inkişaf etdirilməsi və əmək qanunvericiliyinin təkmilləşdirilməsi, işçi qüvvəsinin bacarıqlarının və rəqabət qabiliyyətinin artırılması istiqamətlərində atılan addımlar qeyd edilib. “Business Ready” hesabatının “İşçi qüvvəsi” indika­toru ilə bağlı aparılan işlər, əldə olunan nəticələr də müzakirə olunub. Əmək və məşğulluq sahəsində islahatlar, habelə əmək qanunvericiliyinin təkmilləşdirilmə­si prosesində özəl sektor ilə əməkdaşlı­ğın genişləndirilməsinin önəmi vurğula­nıb.

Şəhid ailələrinə qayğı da diqqət­də saxlanır. Ötən gün Sosial Xidmətlər Agentliyi və Azərbaycan Hava Yolları Qapalı Səhmdar Cəmiyyətinin birgə təş­kilatçılığı ilə şəhid övladlarının və ailə üzvlərinin Milli Aviasiya Akademiyasının nəzdində fəaliyyət göstərən Pilotların Hazırlığı Mərkəzinə ekskursiyanın təşkili dövlətə əmanət övladlara qayğının nü­munəsi kimi qiymətləndirilməlidir. Vətən müharibəsi şəhidlərinin övladlarının və ailə üzvlərinin asudə vaxtının səmərəli təşkili və cəmiyyətə inteqrasiyası məqsə­di daşıyan görüşdə 44 günlük Vətən mü­haribəsində canlarını qurban verən igid­lərimizin 20 övladı iştirak edib.

Onlara məlumat verilib ki, Pilotların Hazırlığı Mərkəzi 2010-cu ildən etibarən fəaliyyət göstərir. Mərkəz nəzəri və prak­tiki hazırlıq şöbələrindən ibarətdir. Nəzəri hazırlıq şöbəsində 300-dən artıq ixtisa­sartırma kurslarına hər il 7 mindən artıq aviasiya sahəsində çalışan mütəxəssis cəlb olunur. Praktiki hazırlıq şöbəsində isə peşəkar mülki aviasiya pilotlarının ha­zırlığı üçün vacib olan uçuş simulyatorla­rı quraşdırılıb. Mərkəzdə “Airbus A320”, “Boeing 757/767”, “ATR-42/72”, “Emb­raer 190”, “Cessna 172S” təyyarələri həmçinin Mi-8AMT helikopter pilotları tə­lim keçir. Uçuş simulyatorunda aviasiya elminin və texnikasının müasir yeniliklər tətbiq olunmaqla, bu sahədə ən yüksək olan FFS D və FNPT 2 səviyyəsi təmin olunur.

İştirakçılar müasir standartlara uy­ğun qurulan trenajor mərkəzinin imkan­ları barədə məlumatlandırılıblar və uçuş simulyatorları ilə yaxından tanış olublar. Ekskursiya şəhid övladlarının və ailə üzv­lərinin böyük marağına səbəb olub və on­larda xoş təəssüratlar yaradıb.

Şəhid ailələri kimi, qazilərə göstə­rilən diqqət, o cümlədən reabilitasiya xidmətlərinin sayı da ilbəil artır. Dövlət Tibbi-Sosial Ekspertiza və Reabilitasiya Agentliyinin reabilitasiya mərkəzlərin­də son illər tətbiqinə başlanan yeni xid­mətlərdən danışanda robotik terapiya xidmətini xüsusi qeyd etməliyik. Son bir ildə həmin mərkəzlərdə 800-dən çox əlilə 2700-ə yaxın robotik reabilitasiya xidmətləri göstərilib. Robot reabilitasiya sistemləri dayaq-hərəkət və sinir siste­minin sağlamlıq vəziyyətinin diaqnozu və müalicəsində istifadə olunur. Robotik terapiya fiziki terapiya prosesində əlilliyi olan şəxslərin intensiv və hərtərəfli ney­roreabilitasiyasına, onlarda sinir sistemi­nin bərpasına, mümkün olan funksionallı­ğı bərpa etməyə kömək edir. Bu terapiya üsulu insult, travmatik beyin və onurğa beyni zədələnmələri, parkinson, şaxəli skreloz, serebral iflic və digər diaqnozlu əlilliyi olan şəxslərin sosial-psixoloji və fizioterapevtik reabilitasiyasında tətbiq edilir.

Z.BAYRAM
XQ