5 Dekabr Beynəlxalq Könüllülər Günüdür

Həmrəylik, könüllülük, sosial məsuliyyət kimi ali dəyərlər bu gün hər bir cəmiyyət üçün böyük əhəmiyyət kəsb edir. BMT Baş Assambleyasının qətnaməsi ilə 1985-ci ildən 5 Dekabr Beynəlxalq Könüllülər Gününün təsis edilməsi məhz belə önəmli məsələyə diqqət yetirmək baxımından xüsusilə əhəmiyyətlidir. 

Ölkəmizdə könüllülük hərəkatı­nın tarixi “ASAN xidmət”lə başlayır, – desək yanılmarıq. Bu gün inamla deyə bilərik ki, Azərbaycanda öz iradəsi və sərbəst seçimi ilə heç bir maddi qa­zanc güdmədən cəmiyyətin inkişafına böyük töhfələr verən könüllülər ordusu formalaşıb. Düzdür, milli dəyərlərimiz, adət-ənənələrimiz könüllülüyün bütün formalarının bundan əvvəlki dövrlər­də də cəmiyyətimizdə bərqərar olması üçün münbit şərait yaratmışdı. Bütün dövrlərdə, istər həssas qruplara aid olan insanların ətrafında, istərsə sahib­siz heyvanların müdafiəsində, eləcə də ekoloji problemlərin həlli və ətraf mühi­tin qorunması istiqamətində könüllülərin fəaliyyəti gözə dəyirdi. Amma bugünkü kimi böyük bir hərəkata çevrilməmiş­di. Minlərlə gəncin artıq könüllü kimi “ASAN xidmət” mərkəzlərində fəaliyyət göstərərək sonradan müxtəlif vəzifələr­də ölkəmizin gələcək inkişafı üçün ça­lışmaları bu gün mühüm amillərdəndir. 

Azərbaycanın ev sahibliyi ilə ke­çirilən “Eurovision-2012” mahnı mü­sabiqəsi, “Bakı-2015” birinci Avropa Oyunları, 2017-ci il IV İslam Həmrəyli­yi Oyunları, “Formula -1” və digər mö­təbər tədbirlərin uğurlu təşkili könül­lülərsiz mümkün deyildi. Bütün bunlar beynəlxalq miqyasa çıxarılacaq böyük potensiallı, həmçinin təcrübəli könüllü bazasının formalaşmasında mühüm rol oynayıb. Bu gün ono minlərlə gənc kö­nüllü kimi bütün sahələrdə çalışaraq cə­miyyətə nümunə olmağı bacarır.

Onlardan biri – Nəzirə Rəhimli Azərbaycan Dövlət İqtisad Universi­tetində təhsil alır. “Könüllülük həyat tərzimə çevrilib”, – deyir Nəzirə:

– Kimsə, xüsusən də tələbələr dü­şünə bilərlər ki, könüllü fəaliyyətlə məş­ğul olmaq dərslərə, yaxud digər fəaliy­yətlərə mane olur. Bu, belə deyil. Mən, məhz könüllülüklə sosiallaşmaq, özümü inkişaf etdirmək üçün geniş imkanlar qa­zandım. Bu günə qədər könüllü olaraq ölkəmizdə keçirilən dövlət əhəmiyyətli bir çox yerli və beynəlxaq layihələrdə və tədbirlərdə iştirak edərək təcrübə topla­mış, öz potensialımı inkişaf etdirmişəm. 

Könüllülük könüldən fəaliyyət göstərmək deməkdir. Ötən ilin sonların­da Azərbaycanın Qarabağ iqtisadi rayo­nunda faydalı yataqların qanunsuz istis­marı əleyhinə Xankəndi–Laçın yolunda başlamış etiraz aksiyalarına ürəyimin səsi ilə qatıldım. Nə qış fəslinin iliklə­ri donduran amansız çovğunlu-boranlı soyuğu, nə hiyləgər düşmənin hər za­man təxribata hazır olması, nə də digər çətinliklər biz könüllüləri qorxutmurdu. Öz iradəsi ilə sərbəst şəkildə aksiyaya qatılan Azərbaycan gənclərində könüllü­lük prinsiplərinin nə qədər güclü olması dünyaya bir daha aydın oldu. Məhz kö­nüllülük əsasında nümayiş etdirdiyimiz birliklə göstərdik ki, iradəmiz sarsılmaz­dır və xarakterimizdən irəli gələn tədbir­ləri, həm də müqəddəs vəzifə kimi qəbul edirik. Könüllülük mənə yeni dostlar, maraqlı təcrübələr qazandırmaqla ya­naşı, fərqli mühitlərdə müxtəlif vəzifələri icra etmək üçün də geniş imkanlar açır.

Bu gün könüllülük hərəkatını tələ­bələrsiz təsəvvür etmək çətindir. Tələ­bə-könüllülərlə işi sistemləşdirmək, könüllülük fəaliyyətini daha da stimul­laşdırmaq, gənclərin asudə vaxtlarını səmərəli keçirmək üçün 2015-ci ildə “Bir” Tələbə-Könüllü” Proqramı, onun əsasında isə 2019-cu ildə “Bir Könüllü” Tələbələrin - Əməkdaşlığı İctimai Birliyi yaradılıb. 30 mindən çox tələbə könül­lünü öz sıralarında birləşdirən “Bir Kö­nüllü” Təşkilatı ötən müddət ərzində bir çox irimiqyaslı layihələrə dəstək göstə­rib. Geniş kütləni əhatə edən tədbirlə­rin idea müəllifi və təşkilatçısı qismin­də daim calışan qurum bu günə qədər Heydər Əliyev Fondu, Milli Olimpiya Ko­mitəsi, “Yüksəliş” İctimai Birliyi, UNDP (Birləşmiş Millətlər Təşkilatının İnkişaf Proqramı), AFFA, “Sports Marketing Group” şirkəti, Kapital Bank və digər bö­yük qurumlarla əməkdaşlıq nəticəsində yüzlərlə irimiqyaslı layihə həyata keçirib.

Təşkilatın könüllülərlə iş üzrə meneceri Nemət Rzayev idman, təh­sil və mədəniyyət, sosial yönümlü layihələrdə qurumun könüllülərinin fəal iştirak etdiklərini dedi:

– Azərbaycan könüllüləri üçün ən həlledici sınaqlardan biri də sentyabrın 27-də başlayan və noyabrın 10-dək da­vam edən Vətən müharibəsi oldu. Məhz yüzlərlə könüllü Vətən müharibəsinin ilk günlərindən Azərbaycan Ordusunun sıralarına yazılaraq torpaqlarımızın düş­mən işğalından azad olunması uğrunda döyüşlərə atıldı. Qarabağ həqiqətlərinin dünyaya çatdırılması üçün tələbə-kö­nüllülər müxtəlif sosial şəbəkələrdə yük­sək fəallıq göstərərək “#PrayForGanja” həştəqi ilə 1 milyondan çox tvit atılma­sına töhfə vermiş, yaradılan xüsusi kö­nüllü qrupları Qarabağla bağlı faktların müxtəlif dillərə tərcümə olunmasına dəstək olublar. Tələbə-könüllülər ara­sında vətənpərvərlik ruhunun yüksəldil­məsi və birlik nümayiş etdirilməsi üçün sosial şəbəkələrdə hazırlanıb paylaşılan xüsusi posterlər və postlar 1 milyondan çox baxış sayı əldə edib, qazilər və rəsmi nümayəndələrlə görüşlər təşkil olunub. Hazırda könüllülərin karyera im­kanlarının artırılması, bilik və bacarıq­larının inkişafı üçün layihələr üzərində çalışılır. Qeyd edək ki, mütəmadi olaraq təşkilat tərəfindən təlimlər, dil kursları və görüşlər keçirilir.

Həmsöhbət olduğum daha bir kö­nüllü gəncin – “Gənc Könüllülər” İcti­mai Birliyinin üzvü Aydan Abbasova­nın ürəyi qurub-yaratmaq arzusu ilə doludur: 

– Müzəffər Ali Baş Komandan İlham Əliyevin qətiyyəti, rəşadətli Azərbaycan Ordusunun peşəkarlığı, xalqımızın qələ­bə əzmi sayəsində torpaqlarımızın iş­ğaldan azad edilməsi ilə hər birimiz fəxr edirik. Azad edilən Vətən torpaqlarının yenidən çiçəklənməsində, inkişafında könüllülərin də iştirakı mühüm rol oyna­yır. Biz gənclər düşmən işğalından azad olunan torpaqlarımızın dirçəldilməsi, yenidən qurulması və bərpası işlərində var-gücümüzlə iştirak etməyə hər za­man hazırıq.

Leyla QURBANOVA
XQ