Dağlar diyarı Balakəndəki Bayraq Muzeyində 9 Noyabr Dövlət Bayrağı Gününə həsr olunan tədbirdən öncə Azərbaycan Respublikasının Dövlət Himni səsləndirilib, Ulu öndər Heydər Əliyevin və respublikamızın ərazi bütövlüyü uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib.
Tədbiri açan Balakən Rayon İcra Hakimiyyətinin başçısı İslam Rzayev bildirib ki, Prezident İlham Əliyevin 17 noyabr 2009-cu il tarixli sərəncamı ilə təsis edilmiş Azərbaycan Respublikasının Dövlət Bayrağı Günü müqəddəs bayrağımıza, tarixi keçmişimizə və mənəvi-siyasi dəyərlərimizə dövlət səviyyəsində olan diqqət və ehtiramın göstəricisidir. 1918-ci ilin 9 noyabrında təsis edilmiş üçrəngli dövlət bayrağımız 70 ildən sonra 17 noyabr 1990-cı ildə Ulu öndər Heydər Əliyevin təklifi və Naxçıvan Ali Məclisinin qərarı ilə Naxçıvan Muxtar Respublikasının dövlət bayrağı kimi yenidən qəbul olunub.
Rayon rəhbəri vurğulayıb ki, 44 günlük Vətən Müharibəsində müzəffər Ordumuz tərəfindən işğaldan azad olunmuş şəhərlərimizdə üçrəngli bayrağımızın dalğalanması zəfərə gedən yolumuzu daha da işıqlandırırdı. Zirvə yollarını bir boy da ucaldan Dövlət Bayrağımız ölkəmizin və ordumuzun qüdrətini bir daha göstərir, hər bir vətəndaşı qürurlandırır.
***
Qarşıdan gələn Konstitusiya Günü ərəfəsində isə Ümummilli lider Heydər Əliyevin 100 illik yubileyi ilə əlaqədar olaraq rayon icra hakimiyyətində “Hüquqi dövlət quruculuğunda Heydər Əliyev irsi” mövzusunda dəyirmi masa keçirilib.
Tədbirdə çıxış edən rayon icra hakimiyyətinin başçısı İslam Rzayev Azərbaycan Respublikasının Konstitusiya layihəsinin hazırlanmasının müstəqil dövlətçiliyimizin qurucusu, Ümummilli lider Heydər Əliyevin əsəri olduğunu bildirib. Rayon rəhbəri 1995-ci il iyunun 5-də Ulu öndər Heydər Əliyevin Sədrliyi ilə Konstitusiya Komissiyasının ilk iclasından başlayaraq, 12 noyabr referendumunadək Ümummilli liderin Azərbaycanın Əsas Qanununun hazırlanmasına, onun bütün prinsipial müddəalarının geniş ictimaiyyət tərəfindən müzakirəsinə şəxsən rəhbərlik etdiyini qeyd edib. Ümummilli lider Heydər Əliyevin bu sənədin təkcə dövrün tarixi və siyasi reallıqlarının deyil, bütövlükdə, xalqın milli-mənəvi dəyərlərinin süzgəcindən keçərək qəbul olunmasına çalışdığını və buna da nail olduğunu nəzərə çatdırıb .
İlqar HƏSƏNOV,
XQ-nin bölgə müxbiri
