Milli Məclisin Mədəniyyət komitəsinin sədri, tanınmış ictimai xadim və jurnalist Qənirə Paşayeva sentyabrın 28-i gecə radələrində müalicə aldığı xəstəxanada vəfat edib. Ömrünün çiçəklənən dövründə, 49 yaşında Qənirə xanımın dünyasını dəyişməsi ölkəmizdə hamını dərindən kədərləndirdi. Böyük arzuları var idi Qənirə xanımın. Nə yaxşı ki, ən böyük istəyi sağlığında çin oldu – Qarabağ Zəfərinin sevincini hamımızla birgə yaşadı.
Qənirə Paşayeva təkcə ölkəmizdə yox, qardaş türkdilli dövlətlərdə də, xüsusən Türkiyədə tanınır və sevilirdi. Türkiyənin Azərbaycandakı səfiri Cahit Bağcını da dəfn mərasiminə bu sevgi gətirmişdi: “Qənirə xanım Paşayevaya son qardaşlıq vəzifəmizi yerinə yetirməyə gəldik. Allah rəhmət eləsin”. Heydər Məscidində keçirilən vida mərasimində xalqımızın öz sevimli qızına dərin ehtiramını ifadə etdi.
Əbədiyyətə qovuşan unudulmaz soy-daşımız ll Fəxri xiyabanda canı qədər əziz bildiyi Vətən torpağına tapşırıldı. Dəfn mərasimində dövlət rəsmiləri, deputatlar, mərhumun ailə üzvləri, yaxınları və ictimaiyyət nümayəndələri iştirak edirdilər. Dəfndə iştirak edənlərin kədəri, sanki, üzlərinə göz yaşları ilə yazılırdı.
Deputat Vüqar İsgəndərli Azərbaycan ictimaiyyətinə çox ağır itki üz verdiyini bildirdi: “Biz Qənirə xanımı itirdik. Xalqına, millətinə bağlı ziyalı, mübariz insan idi. Ümumiyyətlə, türk dünyası üçün çox önəmli şəxsiyyətlərdən biri kimi yetkinləşmişdi. İlk gəncliyindən xalqına və dövlətinə sədaqətlə xidmət etdi. Onun xatirəsi hər zaman bizim qəlbimizdə yaşayacaq”.
Dəfndə iştirak edənlərdən biri də Qənirə xanımın deputat həmkarı Fazil Mustafa idi: “Mən hesab edirəm ki, Qənirə xanım xoşbəxt insan oldu, ən böyük arzusu olan Qarabağın azad olunmasının şahidi oldu. O, XXI əsrdə Azərbaycan qadınının yüksək ictimai fəallıq göstəricisi idi. Bu fədakarlığın, fəallığın göstəricisidir ki, onu son mənzilə yola salmağa bu qədər insan gəlib”.
Milli Məclisin sədr müavini Əli Hüseynlidə dərin hüznlə başsağlığı verdi: “Bu itki təkcə Milli Məclisin, dövlət qurumlarının deyil, bütövlükdə, ictimaiyyətin itkisidir”.
Azərbaycan Kərkük Mədəniyyət və Əməkdaşlıq Mərkəzinin sədri Məlahət Qurbanova kədərini belə bölüşdü: “Biz hamımız Qarabağın alınmasını, qələbəsini yaşadıq. Ancaq Qənirə xanım şəhidlərə Qarabağın tam azad olunması xəbərini verməyə tələsdi”.
Azərbaycanda Qadın Sahibkarlığının İnkişafı Assosiasiyasının icraçı katibi Mətanət Ağamirli üzüntüsünü belə bildirdi: “Hesab edirəm ki, Qənirə Paşayeva qısa ömründə milyonların sevgisini qazanan, seçilən bir şəxsiyyət oldu”.
Azərbaycan Mətbuat Şurasının sədri Rəşad Məcid də Qənirə xanımı son mənzilə yola salanlardan idi: “Yeni bir zəfər müjdəli günlərdə, Qarabağda suverenliyimizin bərpa olunduğu bir vaxtda Qənirə xanımı itirmək çox ağır oldu. Belə enerjili insanın, istedadlı jurnalistin, yurdsevər millət vəkilinin dünyadan vaxtsız getməsi böyük itkidir”.
Milli Məclisin Ailə, qadın və uşaq məsələləri komitəsinin sədri Hicran Hüseynova da hüznlü idi: “Mən deyərdim ki, çox qeyri-adi bir insan idi, çünki bu qədər insanın sevgisini qazanıb. Onun ölümü milli qadın hərəkatı üçün də ağır itki oldu.”
Mərasimdə Tovuzda məktəb direktoru olan Xəyal Nağıyev Qənirə xanımın həmyerlilərinin dərin hüznünü ifadə edərək mərhumun ailəsinə və onu sevənlərinə başsağlığı verdi: “Qənirə xanım Qarabağ həqiqətlərini hər zaman yüksək tribunalarda dünyaya çatdıran mübariz bir qadın oldu.olub. 44 günlük müharibə dövründə zəfərimizin sevincini qürurla, iftixarla dünyaya paylaşdı”.
Bəli, Qənirə Paşayeva belə bir əqidə ilə yaşadı ki, insan ölkəsinə gərəkli, insanlara faydalı olan işlər görməlidir. O bunu bacardı: insanlığın o başında gələn bu əzəli həqiqəti bizim günlərdə öz nümunəsi ilə təsdiqlədi. O, çox sayda ümid çıraqlarnın pərvanəsi oldu.
XQ